26.04.2016

ФИДОЙИ БЎЛИШ ТАЛАБ ЭТИЛАДИ

Ўзбекистон Халқ демократик партияси Навоий вилоят кенгашининг нав­батдаги пленумида маҳаллий Кенгашлар депутатлари, «Фаол аёллар» ва «Истиқбол» ёшлар қанотлари ­вакиллари ҳамда партия ­фаоллари электорат манфаатларини ҳимоя қилиш масалаларида ўзаро фикр алмашишди.

Партия ташкилотлари ҳамда ­гуруҳларининг фаолияти танқидий таҳлил этилди, уларнинг зиммасидаги вазифалар кўриб чиқилди.

Вилоят партия кенгаши ­раиси Акмал Асатов партия ташкилотлари ва гуруҳларининг электорат манфаатларига хизмат қиладиган ташаббусларини кучайтириш, ижтимоий-иқтисодий ривожлантиришга қаратилган ҳудудий дастурлар ижроси устидан депутатлик ҳамда жамоатчилик назоратини изчил йўлга қўйиш масалалари ҳақида сўз юритди.

— Партиямиз Харакат дастурини амалга оширишда асло хотиржамликка, ўзибўларчилик кайфиятига берилиб бўлмайди, — деди у. — Ўтган даврда маҳаллий Кенгашлардаги партия гуруҳларимиз ташаббуси билан ҳудудларни ижтимоий-иқтисодий ривожлантиришга доир муайян масалалар ўрганилди. Хусусан, 11 масала партия гуруҳларида, 3 масала доимий комиссияларда муҳокама этилди, 1 масала эса сессия­га киритилди. Бу натижалар қониқарли эмас, албатта. Партиямиз Ҳаракат дастури ижросини таъминлашда Хатирчи, Учқудуқ, Конимех, Нурота, Зарафшон шаҳар кенгашлари сусткашликка йўл қўйди. Жорий йилда бор имкониятларимизни ишга солиб, электорат манфаатларини ҳимоя қилиш билан боғлиқ фаолиятимизни янада кучайтириш талаб этилади.

Насиба Содиқова, Навоий вилоят хотин-қизлар қўмитаси раиси, халқ депутатлари Кармана туман Кенгаши депутати:

— Бир нарсани доимо ёдда тутишимиз керак. Яъни, партия ташкилоти, унинг депутати учун ғоя ва дас­тур ижроси, электорат манфаати йўлидаги масаланинг катта-кичиги бўлмайди. Ишимизда амалий натижалар кўпайиши, сайловчилар ишончини оқлаш учун ҳудудларнинг ижтимоий-иқтисодий ривожланиш ҳолатини кенг таҳлил қилишимиз, аҳоли орасига янада чуқурроқ кириб боришимиз зарур. Айниқса, Соғ­лом она ва бола йилида қилишимиз лозим бўлган ишлар жуда кўп. Масалан, жойларда ўтказилаётган тарғибот тадбирларида эрта никоҳнинг олдини олиш, яқин қариндошлар турмуш қуришининг салбий оқибатларини аҳоли ўртасида тушунтиришимиз керак.

Тадбирлар фақат ташвиқот ва тар­ғиботдан иборат бўлиб қолмасдан, уларда электоратимиз қандай муаммоларга дуч келаётганини таҳлил этишга кўпроқ эътибор қаратилса, тўғри бўлади. Бу ишларни бажариш бошланғич ташкилотларимиздан янада ташаббускор, партия аъзоларимиздан эса фаол бўлишни тақозо этади.

Пленумда, шунингдек, халқ депутатлари вилоят Кенгашидаги партия гуруҳи аъзолари Муҳаббат Темирова, Иба Наризова ҳамда бош­қалар сўзга чиқиб, олдинда турган вазифалар ҳақида ўз фикрларини билдириб ўтишди.

Пленум якунида кун тартибидаги масалалар юзасидан тегишли қарор қабул қилинди.

 

Илҳом САТТОРОВ,

«Ўзбекистон овози» мухбири.



DB query error.
Please try later.