26.04.2016

МАЪНАВИЯТЛИ ЁШЛАР

тараққиётга муносиб ҳисса қўшади

Ўзбекистон ХДП Марказий Кенгаши ташаббуси билан Ўрта Чирчиқ туманида маънавий-маърифий тадбир ўтказилди.

 Унда Ўзбекистон ХДП Марказий Кенгаши масъуллари, Олий Мажлис Қонунчилик палатасидаги партия фракцияси, халқ депутатлари Тошкент вилоят Кенгашидаги партиямиз гуруҳи аъзолари, Ўзбекистон Ёзувчилар уюшмаси аъзолари, Ўзбек миллий академик драма ­театри актёрлари ва ёшлар иштирок этди.

Тадбир доирасида ёш­лар маънавияти, уларнинг онгига салбий таъсир кўрсатаётган ахборот хуружларининг олдини олиш билан боғлиқ масалалар ҳақида фикр алмашилди. Ёшларнинг бўш вақтларини мазмунли ўтказиш, спортга кенг жалб қилиш борасида таклифлар билдирилди. Юзма-юз мулоқотлар ёшларда мус­тақил фикр­лаш кўникмасини мус­таҳ­кам­лашда муҳим аҳа­мия­т касб этиши таъкидланди.

Абдуназар АҲМЕДОВ, ЎзХДП Тошкент вилоят кенгаши бўлим мудири:

— Тадбир интилувчан ёшларни бир мақсад ат­ро­фида жамлаш, йигит-қизларни турли ёт ғоялар таъсиридан асраш, уларнинг мафкуравий иммунитетини янада кучайтириш мақсадида ташкил этилди. Биламизки, партиямиз Сайловолди дастурида ёш­ларни ҳар жиҳатдан қўллаб-қувватлашга алоҳида урғу берилган. Партиямизнинг бугунгидек ташаббуслари бу борадаги вазифаларни самарали ижро этишга, ёшларни жипслаштиришга хизмат қилади, деб ўйлайман.

Акмал УМАРАЛИЕВ, Олий Мажлис Қонунчилик палатаси депутати, Ўзбекистон ХДП фракцияси аъзоси:

— Мустақиллик йилларида юртимизда ёшларнинг ҳақ-ҳуқуқларини таъминлашга оид кўплаб қонунлар ва қонуности ҳужжатлари қабул қилинди. Уларнинг барчаси йигит-қизлар ўз иқтидорини намойиш этиши учун муносиб шарт-шароит яратишга хизмат қилмоқда.

Маълумки, ёшларни ёт ғоялар таъсиридан асраш, ижтимоий қўллаб-қувватлашнинг энг самарали йўли уларнинг бандлигини таъминлаш ҳисобланади. Ўзбекистон Халқ демократик партияси Сайловолди дастурида ҳам ушбу масалаларда қатор вазифалар белгиланган. Шундан келиб чиқиб, ўз таркибида фаол ёшларни бирлаштирган, уларнинг ташаббусларини ҳар томонлама қўллаб-қувватлашга бел боғлаган пар­тия­миз қатор ташаббусларни илгари сурмоқда.

Хусусан, барча даражадаги депутатлар томонидан битирувчиларни ишга жойлаштиришда юзага келаётган камчиликлар таҳлил қилиниб, уларни бартараф қилиш чоралари кў­риляпти. Айниқса, коллеж битирувчиларини мутахассислиги бўйича ишга жойлаштириш юзасидан кўрилаётган чора-тадбирлар ижросини таъминлаш, маълумотларнинг ҳақ­қо­ний­лигини ҳар бир коллеж бўйича мунтазам ўрганиб боришга алоҳида эътибор қаратилмоқда. Корхона ва иш берувчиларнинг касб-ҳунар коллежларига бириктирилиши, «коллеж — корхона» ­алоқаларининг тако­мил­лашти­рилиши ижобий самара бермоқда.

Биз бир нарсани ҳамиша ёдда тутишимиз керак. Бекор юрган боланинг хаёлига турли ёт ғоялар осонлик билан ўрнашиб олади. Шу боис биз ёшларнинг бўш вақтини мазмунли ўт­казиш, уларни иш билан таъминлаш жараёнларида фаоллик кўрсатишимиз керак, деб ўйлайман.

Шунингдек, тадбирда ёшларни ватанпарварлик руҳида тарбиялаш, юрт тақдирига дахлдорлик ҳиссини кучайтириш билан боғлиқ масалалар юзасидан Ўзбек миллий академик театри актёрлари, Ўзбекистон Республикасида хизмат кўрсатган ­артистлар ­Тоҳир Саидов, Лола ­Элтоева ҳамда Ўзбекистон Ёзувчилар уюшмаси аъзоси, «Ёшлик» журнали Бош муҳаррири Нодир Жонузоқов ўз фикр-мулоҳазаларини билдиришди.

Тадбир жонли мулоқот тарзида давом этди. Унда ёшлар ўзларини қизиқтирган саволларга атрофлича жавоб олишди.

 

Алишер РАВШАНОВ


Фикр ва мулохазалар

Защита от автоматических сообщений

Сўнгги янгиликлар: