23.04.2016

САЙЛОВЧИЛАР ИШОНЧИ

зиммамизга янада улкан масъулият юклайди

Ўзбекистон ХДП Жиззах вилоят кенгаши пленумида шаҳар ва туман партия ташкилотлари раислари, халқ депутатлари маҳаллий Кенгашлардаги партия гуруҳлари раҳбарлари, йирик бошланғич ташкилотлар етакчилари иштирок этишди.

Кун тартибидаги масала юзасидан ЎзХДП вилоят кенгаши раиси, халқ депутатлари вилоят Кенгашидаги партия гуруҳи раҳбари Мўътабар ­Каримованинг маърузаси тинг­ланди:

— Партиямизнинг 2015-2019 йилларга мўлжалланган Ҳаракат дастурида олис қишлоқлар ва туманларда яшаётган аҳоли, айниқса, аёллар учун ижтимоий, маиший ва тиббий нуқтаи назардан зарур шарт-шароитлар яратиш, намунали лойиҳалар асосида замонавий уй-жойлар, инф­ратузилма объектлари барпо этиш, қишлоқ аҳолисининг тоза ичимлик суви, табиий газ билан таъминланиши, сервис хизматлари даражасини юксалтириш борасидаги ишларни изчил давом эттириш назарда тутилган. Шундан келиб чиқиб, ўтган йилда электорат манфаатлари билан боғлиқ 13 масала партия гуруҳларида, 11 масала сессияларда муҳокама қилинди.

Афсуски, Янгиобод, Арнасой туманларидаги депутатларимиз, партия гуруҳларининг иши тўғрисида ижобий фикр билдириш қийин. Улар Ҳаракат дастурида белгиланган масалаларни ўрганиш, муҳокама қилиш билан чекланиб, мавжуд муаммоларга ечим топишга етарлича эътибор беришмади. Натижада партия электорати манфаатлари билан боғлиқ масалалар маҳаллий Кенгашларнинг доимий комиссиялари, сессиялари муҳокамасига ўз вақтида киритилмади.

Сиёсий ва фуқаролик маърифати тизимида ташкил этилган уч босқичли машғулотларда 10 минг нафардан ортиқ партия электорати ҳамда жамоатчилик вакиллари қамраб олингани яхши, албатта. Аммо Арнасой, Дўстлик, Зарбдор, Зомин, Жиззах туманлари партия кенгашларининг сусткашлиги оқибатида маш­ғулотлар ўтказиш, мавзуларни ўрганиш, тарғибот ва ташвиқот ишларида бир хиллик, ноанъ­анавий услублардан фойдаланишга интилмаслик сингари камчиликлар кўзга ташланиб қолаётир.

Депутатларимизнинг фаоллиги, уларнинг партия маҳаллий кенгашлари, бошланғич ташкилотлар билан ҳамкорлигидан ҳам қониқиш қийин. Тўғри, ўтган йили маҳаллий Кенгашлардаги депутатларимиз сайловчилар билан учрашувлар ўтказишди. Улардаги мурожаатлар, таклифлар асосида корхона, ташкилотлар раҳбарларига 446 депутатлик сўрови юборилди. Бироқ депутатларимизнинг барчасини ҳам бирдек фаол, деб айтолмаймиз. Туман, шаҳар Кенгашларидаги айрим депутатларимиз ўзлари аъзо бўлган доимий комиссиялар ишида фаол иштирок этишмаяпти, сайловчилар кўтарган масалаларнинг ечими бўйича амалий натижаларга эришиш учун ваколатлардан тўлиқ фойдаланишмаяпти. Бу ҳол Янгиобод, Зарбдор, Дўстлик, Арнасой туманида кўпроқ кўзга ташланаётир.

Бу йил Ҳаракат дастурида кўзда тутилган 16 масалани партия гуруҳлари, доимий комиссияларда муҳокама қилиш, зарурат туғилганда, сессиялар кун тартибига киритиш белгиланган. Ўйлаймизки, бу борада 14 депутатлик бирлашмаси, шаҳар ва туман кенгашлари, барча бошланғич ташкилотларимиз фаоллик, қатъият, ташаббускорлик кўрсатишга қодир.

Муҳокамаларда халқ депутатлари Жиззах вилоят Кенгаши депутати Акром Иномов, Бахмал туман кенгаши раиси Шарофиддин Каримов, пар­тия фаоли Ҳусан Холбоев, Жиззах шаҳар Кенгаши депутати Ҳалима Негматова сўзга чиқишди. Партия кенгашларининг ижтимоий ҳамкорлар билан алоқаларини мустаҳкамлаш, депутатлар ва бошланғич ташкилотларнинг изчил ҳаракат қилишини таъминлаш муҳим масала экани алоҳида таъкидланди. Тадбирлар таъсирчанлигини ошириш, уларда долзарб ижтимоий масалаларни қамраб олиш лозимлиги қайд этилди. Пленум қабул қилган қарорда ушбу масалаларда тегишли чора-тадбирлар белгиланди.

 

Иброҳим ЖОНУЗОҚОВ,

«Ўзбекистон овози» мухбири.



DB query error.
Please try later.