21.04.2016

ВАТАН ОЛДИДАГИ ЖАСОРАТ

ҳеч қачон унутилмайди

Президентимизнинг 9 май умумхалқ байрами — ­Хотира ва қадрлаш куни ўтказилиши, шунингдек, 1941-1945 йиллардаги Иккинчи жаҳон урушида фашизм устидан қозонилган ғалабанинг 71 йиллиги нишонланиши муносабати билан ҳамда уруш қатнашчилари ва ногиронларини моддий рағбатлантиришга қаратилган фармони мамлакатимизда инсон қадр-қиммати нақадар юксак эканлигини яна бир бор намоён этди.

Мазкур фармонда ҳокимликлар, вазирликлар ҳамда жамоат ташкилотлари олдига муҳим вазифалар қўйилди. Бугунги кунда зиёлилар, олимлар, депутатлар, умуман, кенг жамоатчилик вакиллари томонидан ушбу фармоннинг аҳамияти хусусида фикр-мулоҳазалар билдирилмоқда.

Ҳасан НОРМУРОДОВ, «Нуроний» жамғармаси Самарқанд вилоят бўлими раиси, халқ депутатлари вилоят Кенгашидаги ЎзХДП гуруҳи аъзоси:

— Президентимизнинг Иккинчи жаҳон уруши қатнашчилари ва ногиронларини қўллаб-қувватлаш, моддий рағбатлантириш борасидаги фармони юртимиздаги барча нуронийларнинг кўнглини кўтаради, юрагига мадор бўлади, умрига-умр қў­шади.

Ушбу фармоннинг эълон қилиниши мамлакатимизда умуммиллий ҳаракатни бошлаб берди. 9 май — Хотира ва қадрлаш куни арафасида нафақат уруш ва меҳнат фронти фахрийлари, балки барча кексалар қадрланади, уларга чуқур ҳурмат-эҳтиром кўр­сатилади.

Бугун Самарқандда фар­­­мон ижросини таъминлаш, байрамни муносиб кутиб олиш учун қизғин ҳозирлик кўрилмоқда. Ёшлар иштирокида тар­ғибот гуруҳлари ташкил этилмоқда, уч авлод учрашувлари, турли маданий-маърифий тадбирлар ўт­казиш режаси ишлаб чиқилди. Ҳозир вилоятда 5 минг нафардан ортиқ уруш ва меҳнат фронти фахрийлари истиқомат қилмоқда.

Ўтказиладиган тадбирларда кексаларнинг ҳаёт йўлини ёшларга ўрнак қилиб кўрсатишга алоҳида эътибор қаратилади. Фарзандларимизга уруш даврининг оғир кунларини ҳикоя қилиб бериш ор­қали бугунги нурафшон кунларнинг қадрига етиш кераклиги уқтирилади.

Элмурод ҚАРШИЕВ, Республика «Маҳалла» хайрия жамоат фонди бош мутахассиси:

— Президентимиз фармонида белгиланганидек, Ватанимиз озодлиги ва шаъну шарафи ҳимоячиларига бағишланган махсус учрашувлар ва маърифий-бадиий кечалар ўтказиш ишларида «Маҳалла» хайрия жамоат фонди ва унинг ҳудудий ташкилотлари фаол иштирок этади.

Бундай тадбирлар жорий йилнинг 25 апрелидан 15 майига қадар давом этиши кўзда тутилган. Бу каби учрашувлар республикамизда мавжуд 10 минг­га яқин маҳаллаларнинг барчасида ўтказилади. Байрам тадбирларида кексаларга совға-саломлар топширилади.

Бу сингари байрам кечалари Мурувват ва Саховат уйларида ҳам ташкил этилади. Нуронийларга моддий ёрдам кўрсатилади.

Шунингдек, вилоят ва туман марказларида уруш ва меҳнат фронти фахрийлари учун байрам тантаналари уюштирилади. Маданият бўлимлари томонидан концерт дастурлари намо­йиш этилади.

Умуман, бу каби маданий-маърифий тадбирларнинг бир муҳим жиҳатига алоҳида эътибор қаратишни истардим. Яъни, уруш қатнашчилари иштирокида ўтказиладиган учрашувлар ёшларни ватанпарварлик руҳида тарбиялашга хизмат қилади, уларни ота-онани ҳурмат қилиш, бугунги шарт-шароит ва имкониятлардан унумли фойдаланишга даъват этади.

 

Нурали ОРИПОВ,

«Ўзбекистон овози» мухбири.



DB query error.
Please try later.