16.04.2016

МАЛАКА СЕРТИФИКАТИ

чет тили фани ўқитувчиларининг салоҳиятини белгилайди

Миллий матбуот марказида Вазирлар Маҳкамаси ҳузуридаги Давлат тест маркази томонидан «Чет тилларни билиш даражасини аниқлашда педагогик ўлчовлар» мавзусида матбуот анжумани ташкил этилди.

— Президентимизнинг Чет тилларни ўрганиш тизимини янада такомиллаштириш чора-тадбирлари тўғрисидаги қарорида бир қатор муҳим масалалар белгиланган, — дейди ­Давлат тест маркази чет тилларини билиш ва ­эгаллаш даражасини баҳолаш бошқармаси ­бошлиғи ­Севара Зуфар­хўжаева. — Шунга асосан мамлакатимизда чет тилларни биринчи синфдан бошлаб ўқитиш, янги ­давлат таълим стандартларини ишлаб чиқиш ва амалиётга татбиқ этиш, олий таълим муассасаларида махсус фанларни чет тилида ўқитиш ҳамда чет тилларни билиш даражасини баҳолашнинг миллий тизимини жорий этиш каби йўналишлар бўйича қатор ишлар амалга оширилди.

Маълумки, Вазирлар Маҳкамасининг Чет тилини билиш даражасини аниқлаш ва малака сертификатини бериш тўғрисидаги Низомини тасдиқлаш ҳақидаги қарори қабул қилинган эди. Ушбу қарорга мувофиқ талабгорларнинг чет тилини билиш даражаси аниқланиб, уларга махсус сертификат берилмоқда. Сертификатнинг амал қилиш муддати уч йил.

— 2014-2016 йиллар давомида малака сертификатини олиш мақсадида 878 киши ариза билан муро­жаат қилган бўлиб, шундан 761 нафари инглиз тили бўйича имтиҳон топширди, — ­дейди Давлат тест маркази директори ўринбосари ­Фарҳод Мирзаев. — Тест синовлари учун қўйилган ­талабни бажарган 450 нафар педагогларга сертификат берилди.

— Тест синовлари В1, В2 ва С1 даражаларига давлат намунасидаги сертификат олиш учун 9 тилда, яъни ­инг­лиз, немис, француз, корейс, япон, турк, араб, испан, хитой тилларида ўтказилади, — дейди Севара Зуфар­хўжаева. — Ҳозирга ­келиб СЕFR (Common European Framework of Reference for Languages — Чет тилларни ўзлаштириш умумевропа классификация­си) тавсияси асосида тест топшириқларининг янги формати ишлаб чиқилди ва жорий этилди.

Давлат тест маркази чет тилларини билиш ва эгаллаш даражасини баҳолаш бошқармасининг расмий сайти — www.nsfla.uz фаолият кўрсатмоқда. Ушбу сайт орқали тест синовларига оид маълумотлар ва материаллар эълон қилинади, талабгорларга рўй­хатдан ўтиш бўйича тавсия­лар берилади, амалий ёрдам кўрсатилади. Шунингдек, тест синовига тайёргарлик кўриш бўйича услубий қўлланма жойлаштирилган бўлиб, ҳамма фойдаланиши мумкин. Шунинг­дек, жорий этилган интерактив хизматлар орқали фойдаланувчилар ариза бериши ҳамда топширган тест натижаларини билиши имконияти ҳам яратилган.

 

Темур АЪЗАМ,

«Ўзбекистон овози» мухбири.



DB query error.
Please try later.