16.04.2016

ДАВЛАТ ДАСТУРИ ИЖРОСИДА ПАРТИЯЛАРНИНГ ЎРНИ

Ўзбекистон Халқ демократик партияси Наманган вилояти кенгаши томонидан «Соғлом она ва бола йили» Давлат дастури ижросини таъминлашда депутатлик бирлашмалари иштирокини янада кучайтириш мавзуида тадбир ўтказилди.

Халқ депутатлари вилоят, туман ва шаҳар Кенгашлари раҳбарлари, бошланғич партия ташкилотлари етакчилари, партия фаоллари, оммавий ахборот воситалари ходимлари иштирок этган тадбирда Президентимиз раҳнамолигида амалга оширилаётган давлат сиёсатида хотин-қизлар, айниқса,  оналар ва болалар саломатлигини мустаҳкамлаш устувор масала этиб белгилангани алоҳида таъкидланди.

— «Соғлом она ва бола йили» Давлат дастури  аҳоли саломатлигини таъминлаш йўлида амалга оширилаётган ишларнинг мантиқий давомидир, — дейди  Ўзбекистон Халқ демократик партияси Наманган вилояти кенгаши раиси Дилором Абдураҳимова. — Мазкур дастур ижросини таъминлашга барча давлат ва нодавлат ташкилотлари, жумладан, сиёсий партиялар ҳам ўзининг муносиб ҳиссасини қўшмоқда.

Тадбирда аҳолига кўрсатиладиган тиббий хизматларнинг юқори сифатини таъминлаш, оилаларда соғлом маънавий муҳит ва соғлом турмуш тарзини мустаҳкамлаш, ёш авлодни жисмонан соғлом, юксак интеллектуал салоҳиятли инсонлар этиб тарбиялаш, чекка қишлоқларда ҳам хотин-қизлар учун зарур ижтимоий-маиший шароит яратиш, эрта турмуш ва яқин қариндошлар ўртасидаги никоҳларнинг олдини олиш масалалари юзасидан фикр алмашилди.

 

А.САТТОРОВ,

ЎзА мухбири.



DB query error.
Please try later.