12.04.2016

АМИР ТЕМУРНИ АНГЛАШ — ЎЗЛИГИМИЗНИ АНГЛАШ ДЕМАКДИР

2016 йил, 9 апрель. Буюк бобомиз Амир Темур таваллуд топганлигининг 680 йиллиги муносабати билан пойтахтимиздаги Соҳиб­қирон улуғвор ҳайкали қад кўтарган хиёбонга парламент аъзолари, вазирлик ва ташкилотлар вакиллари, ёзувчи ва шоирлар, олимлар, санъаткорлар, талабалар, кенг жамоатчилик ва дипломатик корпус ҳамда оммавий ахборот воситалари вакиллари йиғилишди.

Тадбирни Халқаро Амир Темур хайрия жамоат фонди раиси Нозим Ҳабибуллаев очиб, Амир Темурнинг жаҳон тамаддунида тутган ўрни, ўша даврда Соҳибқирон томонидан амалга оширилган бунёдкорлик ишлари, илм-маърифат, маънавиятга берилган эътибор ҳақида фикр юритди.

— Бундан 20 йил аввал Президентимиз Ислом ­Каримов ташаббуси билан мамлакатимизда Амир ­Темур йили, деб эълон қилинди ва Соҳибқирон таваллудининг 660 йиллиги халқаро миқёсда кенг нишонланган эди. Улуғ бобомиз шарафига орден таъсис этилди, Тошкент, Самарқанд ва Шаҳрисабзда муҳташам ҳайкаллари қад ростлади, — деди Ёзувчилар уюшмаси раиси, Ўзбекистон халқ ёзувчиси Муҳаммад Али. — Айнан давлатимиз раҳбари раҳнамолигида Амир Темурнинг номи, бой мероси тикланди. Президентимиз сўзбошиси билан «Темур тузуклари» мукаммал ҳолда янгидан чоп этилди. Шу кунларда юртимизнинг барча жойларида, бир қатор хорижий давлатларда буюк бобомиз таваллудининг 680 йиллигига бағишланган тадбирлар бў­либ ўтмоқда. Жумладан, апрель ойининг охирларида Нидерландиянинг Реден университетида ҳам ана шу мавзуга бағишланган халқаро конференция бўлиб ўтади, унда ўн нафар ўзбекистонлик олимлар ҳам иштирок этиши кўзда тутилмоқда.

— Амир Темур буюк саркарда сифатида шарқ ва ғарб халқларини яқинлаштирган тарихий шахсдир, — деди тадбирда иштирок этган Франциянинг Ўзбе­кис­тондаги Фавқулодда ва мухтор элчиси Жак-Анри Ольс. — Ўша даврда Франция ва Амир Темур ҳукмронлиги остидаги давлат ўртасида савдо-иқтисодий муносабатлар мустаҳкам қарор топган эди. Кўплаб франциялик тарихчи ва тадқиқотчилар Амир Темур ҳаёти ва фаолияти, унинг Европа давлатлари учун аҳамиятини чуқур ўрганиб, ўз илмий изланишларини китоб ҳолида чоп қилдирган. Бу жараён бугунги кунда ҳам изчил давом этмоқда.

Дарҳақиқат, Соҳибқирон Амир Темур таваллудининг 680 йиллиги фақат мамлакатимизда эмас, дунё бўй­лаб кенг нишонланмоқда. Жаҳондаги 50 дан ортиқ давлатнинг олимлари ва тад­қи­қотчилари томонидан унинг бунёдкорлик ишлари, илм-маърифат, маънавиятга бўлган муносабатларига оид асарлар ёзилган. Амир Темур тўғрисида яратилган 60 дан зиёд саҳна асарлари дунёнинг турли давлатларида намойиш қилиб келинмоқда.

Тадбирда ёшлар Амир ­Темур бобомизнинг ибратли ҳаёти, адолатпарварликка йўғрилган фаолияти ҳақида дунё олимлари томонидан билдирилган фикрларни ўзбек, инглиз, рус, француз, япон ва бошқа тилларда ўқиб берди. 

Шаҳрисабз шаҳридан 25 март куни «Буюк ­Соҳибқирон Амир Темур таваллуд топганлигининг 680 йиллигига — 680 минг қадам» шиори билан йўлга чиққан ва 9 апрель куни эрта тонгда Соҳибқирон ҳайкали ўрнатилган хиёбонга етиб келган 65 ёшли ҳаваскор спортчи ­Абдужаббор Холбоев ҳам тадбирда сўзга чиқди.

— Мен кўпдан буён буюк саркарда бобомизнинг 680 йиллик муборак тўйига тайёргарлик кўриб юрган эдим. Мана, ниҳоят ниятим амалга ошди, — деди у. — Ана шу табаррук сана муносабати билан 680 туп дарахт кўчати ўтқаздик.

— Мен Сурхондарё вилоятининг Жарқўрғон туманиданман, — дейди ­меҳнат фахрийси Ҳусан ­Болтаев. — Ҳар йили Амир Темур туғилган кунда Тошкентга келиб, ­Соҳибқирон ҳайкалини зиёрат қиламан, тантанали тадбирда қатнашаман. Ўтган йили ҳам келганман. Сабаби шуки, Амир Темур бошлаган эзгу ишлар давомини, оламшумул ўзгаришларни бугунги кунда пойтахтимизда, вилоятлар марказларида, шаҳар ва қишлоқларда ўз кўзим билан кўриб қувонаман, бу ислоҳотларга йўлбошчилик қилаётган Президентимиздан миннатдорман. 

Шундан сўнг тадбирга йиғилган давлат ва жамоат ташкилотлари вакиллари томонидан Амир Темур ҳайкали пойига гулчамбарлар қўйилди.

Тадбир доирасида Ўзбекистон Республикаси Фанлар Академияси Темурийлар тарихи давлат музе­йида бўлиб ўтган «Амир Темур ва темурийлар давридаги илм-фан ва маданият ривожининг жаҳон тамаддунидаги ўрни» мавзуидаги республика илмий-амалий анжуманида олим ва тадқиқотчилар ­Соҳибқирон­нинг илм-фан, маданият ривожидаги ўрни тўғрисида фикр юритдилар.

Анжуман доирасида темурийлар даврига оид ноёб қўлёзмалар, Амир Темур ҳақида дунё тарихчилари ва ёзувчилари томонидан ёзилган ҳамда ҳозирги давр­да буюк саркарда ҳаёти ва фаолияти акс эттирилган асарлар кўргазмаси намо­йиш этилди, темурийлар тарихига оид энг яхши тасвирий ва публицистик асарлар танлови ғолиблари тақдирланди.

Маросимда Ўзбекистон Республикаси Президентининг Давлат маслаҳатчиси Хайриддин Султонов иштирок этди.

 

Нуруллоҳ ДОСТОН,

«Ўзбекистон овози» мухбири.



DB query error.
Please try later.