07.04.2016

ЖИСМОНИЙ ШАХСЛАР

йиллик даромадлари тўғрисида декларация топширишлари зарур

Сурхондарё вилоят давлат солиқ бош­қармаси томонидан «Жисмоний шахсларнинг жами йиллик даромадларини декларациялаш тизимининг ўзига хос хусусиятлари» мавзусида матбуот анжумани ташкил этилди.

Марказий ва маҳаллий оммавий ахборот воситалари ходимлари иштирок этган тадбирда амалдаги қонунчиликка мувофиқ, жисмоний шахсларнинг асосий иш жойидан ташқари бошқа корхона, ташкилотларда ўриндошлик асосида ишлаб, ўзига тегишли мол-мулкни ижарага бериш ҳамда қонун билан тақиқ­ланмаган бошқа турдаги фаолиятлар билан ­шуғулланиб, чекланмаган миқдорда даромад олиш­лари қонун билан кафолатлангани алоҳида таъкидланди.         

— Қонунларимизда жисмоний шахсларнинг ушбу даромадлари бў­йича жами йиллик ­декларацияни доимий яшаш жойидаги давлат солиқ хизмати органига ҳисобот йилидан кейинги йилнинг 1 апрелидан кечиктирмай тақдим этилиши белгилаб қў­йилган, — дейди Сурхондарё вилоят Давлат солиқ бошқармаси матбуот хизмати раҳбари Илёс Раҳматов. — Декларация доимий яшаш жойидаги давлат солиқ хизмати органига шахсан бориб топширилиши, почта орқали буюртма хат шаклида, шунингдек, электрон шаклда ҳам тақдим этилиши мумкин.

Матбуот анжуманида бу борадиги қонунчилик талабларини ижро этиш механизми ҳақида ҳам атрофлича маълумотлар берилди. Уй-жой ва нотурар жойларни ижарага бериш шартномаси нотариал идоралар томонидан тасдиқланмаган бўлса, Маъмурий жавобгарлик тўғрисидаги Кодексининг 159-моддасига биноан энг кам иш ҳақининг беш бараваридан ўн баравари миқдорида жарима солинишига сабаб бўлиши, даромадлари тўғрисидаги декларацияни вақтидан кечиктириб ёки атайлабдан нотўғри маълумотлар кўрсатилган ҳолда тақдим этган фуқароларга нисбатан эса Маъмурий жавобгарлик тўғрисидаги кодексининг 174-моддаси билан энг кам иш ҳақининг бир бараваридан уч бараваригача жарима қўлланилиши ҳақида тушунтирилди.

Матбуот анжуманида журналистлар ўзларини қизиқтирган саволларга жавоблар олишди.

 

Абдумалик ҲАЙДАРОВ,

 «Ўзбекистон овози» мухбири.



DB query error.
Please try later.