05.04.2016

ЎЗБЕКИСТОН МЎЪЖИЗАЛАРИ

мақола ва кўрсатувларимизнинг бош мавзуси бўлади

Бу — хитойлик журналист­ларнинг фикри

Шанхай Ҳамкорлик Ташкилотига Ўзбекистон раислик қилаётган жорий йилда юртимиз тараққиётига асос бўлган «ўзбек модели»га хорижий ­оммавий ахборот воситалари ходимлари томонидан қизиқиш ҳар доимгидан ҳам юқори бўлмоқда.

— Ўзбекистон ҳар йили ЯИМ ҳажми 8 фоиз атрофида ўсиб бораётган дунёдаги кам сонли давлатлардан бири эканлиги эътиборимизни торт­ди, — дейди ХХРнинг Шэньси провинцияси халқ ҳукумати телерадиокор­пора­ция­­си бўлим мудири Се Нан. — Биз бир ҳафта давомида ўзимиз учун ғоят гўзал, халқи меҳмондўст ва тинчликсевар ҳамда бағрикенг мамлакатни кашф этдик.

Ўтган йили 16 нафар фар­ғоналик журналистлар Хитойда бўлиб, унинг энг йирик саноат корхоналари, ўқув юртлари, илмий муассасалари фаолияти билан танишган, ОАВ таҳририятларида ўзаро тажриба алмашганди. Хитойлик бир гуруҳ журналистлар Ўзбекистон журналистлари ижодий уюшмаси Фарғона вилоят бўлими таклифига биноан юртимизга келди. Улар бир ҳафта давомида Тошкент, Фарғона, Бухоро, Самарқандда ҳамкасб­лари билан учрашди. Изчил ривожланаётган юртимиз иқтисоди ва таълим соҳаси билан яқиндан танишиб, юртимиз ҳақида «Мустақил Ўзбекистоннинг шахдам одимлари» номли туркум телекўрсатув учун лавҳалар тайёрлади.

Фарғона ва Хитойнинг Шэньси провинцияси жур­налист­лар ижодий уюшмалари келгусида ахборот алмашиш, ҳамкорликда ўқув-семинарлар ўтказиш, мухбирларнинг малакасини ошириш масалаларида ҳам келишиб олдилар.

— Ўзбекистон нафақат Марказий Осиё, балки ­қитъамизда жадал ривожланаётган давлат эканини кўрдик. Қўш­ма корхоналарда хорижий инвесторларга қулай шароитлар яратиляпти. Фарғона ва Самар­қанд­нинг интенсив боғлари Европа ёки Хитой боғларидан сира қолишмайди. Мамлакат раҳбарининг ёш­ларга бераётган эътибори ҳайратланарли даражада. Мен шу мавзулар юзасидан «Ўзбекистондан мактублар» рукни остида туркум мақолалар ёзишни бошладим, — дейди Шэньси провинцияси халқ ҳукуматининг «Шэньси жибао» кундалик газетаси бўлим мудири Цзя Юйфен.

— Тошкентда Халқаро бизнес ва технологиялар ассо­циациясида ҳамда Самарқанд вилояти тадбиркорлари билан бўлган учрашув менда унутилмас таассурот қолдирди, — дейди «Шэньси жибао» газетасининг мух­бири Чжао Сяолян. — Ўзбекис­тон хусусий мулк дахлсизлигини таъминлаш, тадбиркорликни қўллаб-қувватлаш борасида анча илдамлаб кетибди.

Хитойлик журналистлар Буюк Ипак йўлидаги кўҳна Мар­ғилонда ҳунармандчилик, хусусан, ипакчилик соҳасида иш олиб бораётган устазодалар суҳбатида бўлдилар, Тошкент давлат шарқшунослик инс­титутининг хитойшунослик факультетида ўқув жараёни билан танишдилар, Ўзбекистон давлат жаҳон тиллари университетининг янги биносини бориб кўрдилар.

— Самарқанд, Бухоро, Тошкент ва Қўқондаги тарихий обидалар бир умрга қалбимиздан жой олди, — дейди Шэньси телерадиокорпорацияси тасвирчиси Цзоу Цзюнь. — Мен кўплаб мамлакатларда ижодий сафарда бўлганман. Лекин Ўзбекистон уларнинг ҳеч бирига ўхшамайди, бугунги кун ва тарих уйғунлашган жозибадор макон экан.

 Тошкентнинг Бош майдони, Шаҳидлар хиёбони, Ҳазрат Имом мажмуаси, айниқса, хитойлик журналистларда катта таассурот қолдирди.

— Биз Фарғонада бўлганимизда Буюк Ипак йўлидаги қадим Қубода будда ҳайкали топилганини эшитиб, ҳай­ратга тушдик. Юртингизда ­ўт­мишда ҳам диний бағрикенглик ҳукм сургани эътиборга сазовор.

Ўзбекистон мусулмонлари идораси раиси, муфтий ­Усмонхон Алимов билан шу ҳақдаги суҳбатимизни алоҳида кўрсатувга мавзу қилиб белгиладик, — дейди Се Нан.

Ҳамкасбларимиз шу йилнинг июнь ойида Шэньси провинциясининг маркази Сиань шаҳрида «Мустақил Ўзбекистон манзаралари» фото кўр­газмасини ташкил этишни мўлжаллашмоқда.

 

Муҳаммаджон ОБИДОВ,

«Ўзбекистон овози» мухбири.



DB query error.
Please try later.