02.04.2016

ФАРЗАНДЛАРИНГИЗГА КИТОБ СОВҒА ҚИЛИНГ

шунда уларни нафақат сиз, балки китоблар ҳам тарбиялайди

1967 йилда Халқ­аро болалар китоби кенгаши томонидан қабул қилинган қарорга кўра, жаҳоннинг кўпгина мамлакатларида даниялик буюк эртакчи Ханс Кристиан Андерсеннинг таваллуд куни — 2 апрель Халқаро болалар китоб­и куни сифатида нишонланади.

Дарҳақиқат, китоб — бебаҳо хазина. Уни мутолаа қилиш ор­қали инсон ўз маънавий дунёсини бойитади. Китоб ақл ва тафаккурни ўстиради, жараён ва ҳодисаларни таҳлил қилишга ёрдам беради. Донишмандлардан бири айтганидек: «Китоб барча бун­ёдкорлик, яратувчанлик ва ақл-идрок, илму дониш асосидир, ҳаётни ўргатувчи мураббийдир».

Республика болалар кутубхонасида ҳар йили Халқаро болалар китоби куни муҳим байрам сифатида нишонланади. Байрам муносабати билан тайёрланган дастур доирасида болалар китоби ҳафталиги ўтказилади, кутубхона болалар билан гавжум бўлади. Кичик ёшдаги болалар учун Андерсен асарлари бўйича викториналар, катта ёшдаги болалар учун эса таниқли шоир ва ёзувчилар билан учрашувлар, турли кўрик-танловлар ва маданий-маърифий тадбирлар, кутубхона бўйича саёҳат, таниқли хонандалар ижросида мусиқий чиқишлар, саҳна кўринишлари ва китоб кўргазмалари ташкил этилади.

Шу кунларда юртимиздаги барча таълим ва маданият муас­сасаларида, кутубхоналарда болалар китоби байрами муносабати билан «Фарзандимга китоб совға қиламан» лойиҳаси доирасида акциялар ўтказилмоқда.

Байрам тадбири ташкилотчилари томонидан болаларни маънавий ва етук шахс қилиб тарбиялашда китобнинг тутган ўрнига алоҳида урғу берилади. Болажонлар иштирокида турли-туман танловлар уюштирилиб, мактаб, лицей ва коллежларда болалар адиблари билан учрашувлар, китоб кўргазмалари ҳамда байрам дастурлари намойиш этилади.

Болаларнинг маънавий дунё­сини янада бойитиш мақсадида «Энг яхши китобхон оила», «Энг билағон ўқувчи», «Китобсеварлар» кўрик-танловлари, китобхонлик кечалари ва илмий-амалий конференциялар ўтказилади. Бундай тадбирлар болаларни кўпроқ китоб ўқишга қизиқтиришда ва кутубхоналарга жалб қилишда ўз самарасини бермоқда.

Тадбирда ёш китобхонлар ўзбек ва жаҳон адабиёти хазинасидан саралаб олинган асарлар, хусусан, шеърлар, қиссалар, эртаклар, афсона ва ривоятлар ҳамда замонавий адабий жараён билан ҳам яқиндан танишадилар. Барча мактабларнинг ахборот-ресурс марказларида ўқувчиларни кутубхоналарга кўпроқ аъзо қилиш мақсадида «Очиқ эшиклар куни» ўтказилади. Бундай тадбирлар болажонларнинг келажакда баркамол шахс бўлиб вояга етишига замин яратади.

Мамлакатимизда матбаа маҳсулотларининг халқаро талабларга мувофиқ бўлишини таъминлаш, болалар адабиётини ривожлантириш, ўқув адабиётлари ва дарсликларнинг сифатини ошириш масаласига ҳам жиддий эътибор қаратилмоқда.

Юртимиз нашриёт-матбаа ижодий уйлари томонидан чоп этилаётган болалар китобларининг сифати юксаклиги халқаро доираларда ҳам эътироф этилмоқда.

Китобнинг мўъжизакорлиги шундаки, уни ўқиган, у билан дўст тутинган бола ота-онасини ҳам, Ватанини ҳам севишни, қадрлашни ўрганади.

 

Зулфия БОҲОУДДИНОВА,

Республика болалар кутубхонаси бўлим бошлиғи.



DB query error.
Please try later.