29.03.2016

НАВРЎЗ ҚУВОНЧЛАРИ

юртга тинчлик ва фаровонлик олиб келади

Равшан АБДУЛЛАЕВ, Ўзбекистон ХДП Уйчи туман кенгаши раиси, халқ депутатлари Наманган вилоят Кенгашидаги партия гуруҳи аъзоси:

— Президентимизнинг Наврўз байрамига бағишланган тантанали маросимдаги сўзи ҳар бир юрт­дошимизни ҳаяжонга солди.

«...Агарки, бугунги кунда халқ­аро майдонда тобора авжига чиқаётган кескинлашув, можаро ва қарама-қаршиликларни, ҳали-бери давом этаётган қон тўкишларнинг олдини олиш, пайдо бўлаётган муаммоларни фақатгина тинч­лик ва сиёсий музокаралар йўли билан ҳал қилишга қайтсак, халқимиз ибораси билан айтганда, олам гулистон бўларди».

Давлатимиз раҳбарининг бу сўзлари замирида бутун дунёда осойишталикнинг барқарор бўлиши, аввало, узоғу яқиндаги қўни-қўшни, дўст-биродарлар билан ўзаро аҳиллик ва ҳамжиҳатликка боғлиқ, деган чуқур маъно мужассам.

Наврўзни яхши кўрган, унинг анъаналари, урф-одатларига амал қилган халқ эса нафақат оиласи, юртида, балки бутун дунёда тинчлик ва тараққиёт бўлишини истайди.

Шунинг учун Юртбошимизнинг тантанали маросимдаги сўзи қишлоқ ва маҳаллаларда давом этаётган байрам сайилларида, партия ташкилотимиз, депутатлар иштирокида ўтказилаётган тадбирларда қайта-қайта тилга ­олиняпти. Айниқса, тинчликнинг қадри, мамлакатимиз тараққиёти, хал­қимиз фаровонлиги ҳақидаги фикр­лар мазмун-моҳиятини ёш авлод вакилларига чуқурроқ тушунтиришга ҳаракат қиляпмиз.

Турли учрашув ва давра суҳбатларида кўпни кўрган отахону онахонлар, фахрийларимиз фаол қатнашяпти. Улар ёшларга ўтган замон қийинчиликлари, бугунги кун имкониятлари, қулайликлари ҳа­қида ўз кўрган-кечирганлари ­асосида гапириб беришмоқда. Партия­миз тизимида бундай тадбирлар, учрашувларни нафақат муайян байрамлар ёки саналарда, балки йил — ўн икки ой ўтказишимиз зарур, деб ўйлайман.

 

Ҳимматой АЛЛАЁРОВА, Денов туманидаги «Чўнтош» маҳалла фуқаролар йиғини раиси, ЎзХДП аъзоси:

– Шу кунларда мамлакатимизнинг барча ҳудудларида бўлгани каби, бизнинг маҳалламизда ҳам Наврўз катта шоду-хуррамлик билан нишонланмоқда. Ҳозир маҳалламизда 2 минг 800 нафардан ортиқ аҳоли истиқомат қилади.

Президентимизнинг Наврўз маросимидаги сўзини телевидение орқали эшитиб, очиғи, бир аёл, маҳалла фаоли сифатида кўнглим тоғдек кўтарилди, қалбимда янги орзу-умидлар уйғонди. Ўтган йилдаги Наврўз байрамини эсладим.

Ўшанда олдимизга катта мақсадлар қўйган эдик. Бу йилги байрам арафасида ниятларимиз рўёбга чиқди. Қисқа даврда «Чўнтош» ва «Яккатут» қишлоқларида 8 савдо ва маиший хизмат кўрсатиш объекти ишга тушди. Замонавий талаблар асосида бунёд этилган 37-умумтаълим мактабида 450 нафарга яқин истиқлол фарзандлари таълим олмоқда. Қишлоқ врачлик пункти хизматидан одамларимиз мамнун. Боғдорчилик ва деҳқончилик йўналишида 6 фермер хўжалиги фаолият кўрсатмоқда. Улар байрам тадбирларини ўтказишга бош-қош бўлишди.

Ободлик кўнгилдан бошланади, дейдилар. Шунга монанд оқсоқол ва фаоллар билан бамаслаҳат иш олиб бораяпмиз. Қишлоғимизда тоза ичимлик суви таъминотида айрим муаммолар бор эди. Яқинда масала ижобий ечим топди. Давлат бюджетидан 682 миллион сўм маблағ ажратилиб, 6,5 километрга сув қувури ётқизилди. 25 тонна сиғимли сув иншооти ўрнатилди. Бир сўз билан айтганда, бу йил Наврўз ўз қувонч­лари, яхшиликлари билан келди.

Ота-боболаримиз дуо қилганда «Келаси кўкламгача, келаси Наврўзгача эсон-омон етайлик», деб ният қилади. Бу сўзларда улуғ ҳикмат бор. Бу тилак орқали юрт­га тинчлик, халққа фаровонлик сўралади. Келаси Нав­рўзгача қувончлар, эзгуликлар давом этаверсин, ютуқларимиз кўпаяверсин.

 

«Ўзбекистон овози» мухбирлари

Носиржон ДЕҲҚОНОВ,

Абдумалик ҲАЙДАРОВ тайёрлади.



DB query error.
Please try later.