26.03.2016

«ЎЗБЕКИСТОН — БАҒРИКЕНГ ДИЁР»

Вазирлар Маҳкамаси ҳузуридаги Дин ишлари бўйича қўмита «Мустақиллик йилларида диний таълим соҳасидаги ислоҳотлар» мавзусида матбуот анжумани ўтказди.

Тадбирда Ўзбекистон мусулмонлари идораси, Тошкент проваслав ва протестант семинариялари, давлат ва жамоат ташкилотлари, диний таълим муассасалари вакиллари, талабалар ҳамда оммавий ахборот воситалари ходимлари иштирок этди.

Анжуманда соҳада амалга оширилаётган ислоҳотлар, диний таълим муассасаларида юксак маънавиятли, мустақил фикрловчи, миллатлараро тотувлик ва динлараро бағрикенглик муҳитини мус­таҳкамлаш, ёшларимизни диний ақидапарастлик ва экстремизм хатаридан ҳимоя қилиш масалалари хусусида сўз борди.

Маълумки, мустақилликнинг илк йилларидан Ўзбекистон мусулмонлари идораси таркибида замонавий талабларга жавоб берадиган диний таълим тизимини яратишга катта эътибор қаратилмоқда. Давлатимиз раҳбари ташаббуси билан 1999 йилда диний ва дунёвий фанларни ўзаро уйғунликда ўрганиш, илмий тадқиқотлар олиб боришга қодир юқори малакали кадрлар тайёрлаш мақсадида Тошкент ислом университети ташкил этилган. Мазкур университет қошида Исломшунослик илмий-тадқиқот маркази самарали иш олиб бормоқда.

Вазирлар Маҳкамасининг дин соҳасидаги маънавий, маърифий таълим ишларини ва фаолиятини янада такомиллаштиришда ижтимоий кўмак ва имтиёзлар бериш тўғрисидаги қарорига мувофиқ Тошкент ислом инс­титути ва ўрта махсус ислом билим юртлари дипломлари давлат таълим ҳужжати сифатида эътироф этилади.

Ўтган давр ичида мамлакатимизда диний таълим муассасалари учун ақоид, фиқҳ, (ислом ҳуқуқи), тафсир, ҳадисшунослик, араб тили ва грамматикасига оид ўнлаб ўқув қўлланмалар чоп этилди. Шунингдек, ёшлар учун мўлжалланган «Муқаддас динимизга юксак эътибор ва эҳтиром», «Ўзбекистонда давлат ва дин муносабатлари», «Ўзбекистон — бағрикенг диёр», «Ислом ва ақидапараст оқимлар» каби кўплаб китоб, рисола ва ўқув-услубий қўлланмалар нашр қилинган. 2008 йилдан буён Самарқандда Имом-Бухорий халқ­аро маркази фаолият юритиб келмоқда. Марказ Қуръони карим ва ҳадис илми бўйича илмий тадқиқотлар олиб бориш ва республика имом-хатибларининг касбий маҳоратларини оширишга ихтисослашган таълим масканига айланди.

Мамлакатимизда диний таълим тизимида олиб борилаётган кенг кўламли ишлар ҳақида батафсил ахборот тақдим этилди.

Тадбир сўнггида мутахассислар журналистларни қизиқтирган саволларга жавоб беришди.]

 

Бардамбек САЪДУЛЛАЕВ,

«Ўзбекистон овози» мухбири. 



DB query error.
Please try later.