Охирги сонда



Кўп ўқилган мақолалар



Долзарб мавзу



Мақолалар архиви

«    Yanvar 2019   
Du Se Cho Pa Ju Sha Ya
31 1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31 1 2 3
26.03.2016

ОДАМНИ МЕҲНАТ ҚАРИТМАЙДИ,

нафси, жаҳли қаритади, — дейди тўрақўрғонлик 118 ёшли Садияхон момо ИНОМОВА.

Тўрақўрғоннинг «Ибрат» маҳалласига қарашли Пахта­обод кўчасидаги Садия момонинг хонадони кўп йиллардан буён ўзига хос зиёратгоҳга айланган.

Салкам бир юз йигирма ёшда ҳам тўй-маъракаларга бемалол ўзи бориб келадиган Садияхон момони кейинги пайтларда фарзандлари, невара-эваралари толиқасиз, дея маросимларга камроқ чиқарадиган бўлишгач, катта-ю кичик ихлосмандлар уни ўзлари йўқлайдиган бўлишди. Ҳовлидан одам аримай қолди.

Табаррук момонинг зиёратига боришдан олдин биз ҳам эвараси, таниқли муаллима, «Дўстлик» ордени соҳиби Лобар Рустамова билан боғландик. Унинг ҳамроҳлигида файз­ли хонадон дарвозасидан ичкари кирдик.

Биринчи бўлиб, эътиборимизни боғ ўзига тортди.

Салом-аликдан сўнг момо ҳам шу ҳақда гап бошлади.

— Ҳовлимизда ҳар доим мевали дарахтлар бўлган. Ўрик, беҳи, дилафрўзнок, узум менга жуда қадрдон. Бу мевалар очарчилик йилларида қанчадан-қанча одамларни ўлимдан сақлаган. Ҳозир ҳам туршак, майиз ейман. Умримни шулар узайтирган бўлиши мумкин. Рўзғордан сут-қатиқни узмадим. Болаларимга ҳам шуни тайинлайман.

— Узоқ умр кўриш учун кўпроқ пиёда юриш керак, дегандингиз-ку? — дея савол беради Лобар опа.

— Тўғри-да. Пиёда юриш фойдали. Елкангни ғоз тутиб, қаддингни баланд кўтариб, қадамингни ўктам босиб юришинг керак. Одамни меҳнат қаритмайди, ҳоритмайди. Одамни нафси қаритади, жаҳли қаритади, ўз танасини ўзи билмаслик, ўзига эътибор бермаслик қаритади. Отам раҳматли зиёли эди. Ибрат домлага ёрдамчи бўлиб, доим ўша киши билан юрарди. Онамни топқирликлари ва сўзамолликлари учун Ибодат муаллим дейишарди. Бошимиз оғриб қолса, дарров нима еб, қандай сув ичганимизни суриштирарди. Дори ичмасдан бош оғриғидан қутулиш усулларини онамдан ўрганганман. Аёл зоти табобатдан хабардор бўлиши керак. Мана мен бир умр касал бўлмадим, дўхтирга учрамадим. Саккиз фарзанд кўрдим. Болаларимнинг отасини Исомиддин уста дейишарди. Раҳматли темирчилик билан шуғулланиб, пичоқ, кетмон, ўроқ, хуллас рўзғор буюмлари ясарди. Ўзим ҳам чеварликда ҳеч кимдан кам бўлмаганман...

Садия момо токчага узаниб, медалларини сўради. ­келини Муҳаббатхон 2007 йилда Президентимиз ­фар­мони билан берилган «Шуҳрат» медалини келтирди.

 Шу орада Садия момони йўқловчилар кўпайди. Кетишга ижозат сўрадик. Хайрлашув чоғида билдикки, 80 ёшли қизлари Саодат буви девор-дармиён қўшни яшаркан. Фарзанд­ларидан 78 ёшли Ғиёсиддин бобо билан 76 ёшли Салоиддин бобо оналари ёнида умргузаронлик қилишмоқда экан.

Саккиз фарзанд ўзларидан кўпайган. Ҳозирда Садияхон Иномова 45 набира, 141 эвара, 139 чевара, 4 нафар бегонанинг момоси ҳисобланади. Невара, эвара, чевараларининг кўпчилиги ўқи­мишли. Улардан бири Наманган муҳандислик технология институти профессори, иқтисод фанлари доктори Шермирза Саидбоевдир.

Момонинг зиёратида бизга ҳамроҳлик қилган «Ибрат» маҳалла фуқаролар йиғини фаоли Фотимахон Умарованинг айтишича, маҳаллада истиқомат қилувчи яна бир онахон Сидиқа Райимқулова 102 ёшда экан. Ҳар икки момо билан маҳалла аҳли беҳад фахрланишади. Кетар чоғда Садия момодан дуо олдик:

— Илоҳим, юртимиз ҳамиша тинч, фаровонлигимиз зиё­да, фарзандларимиз омон бўлсин. Элу халқимиз жумлаи олам қатори униб-ўссин..!

 

Носиржон ДЕҲҚОНОВ,

«Ўзбекистон овози» мухбири.



DB query error.
Please try later.