26.03.2016

ТИНЧЛИК, ТОТУВЛИК ТАРАННУМИ

Қува туманидаги Анорзор қишлоғи ширин-шакар анор, қантаки ўриклари билан машҳурдир. Бу ернинг ҳавоси тоза. Бир-бирига туташ қир-адирлар, айниқса, шу кунларда ўзгача чирой очган. Наврўз билан Анорзорга баҳорий иқлимгина эмас, шоду хуррамлик ҳам кириб келди.

Байрам куни аҳолиси аҳил ва бирдам бўлган анорзорликлар қишлоқнинг марказий майдонига тўп­ландилар. У ерни Наврўз рамзлари билан безадилар. Баҳорой сиймосидаги гўзал қизлар Наврўз неъматларини каттаю-кичикка улашди. Қишлоқнинг ҳофиз ва раққосалари, Фарғона шаҳридан ата­йин келган санъаткорлар даврага янада файз киритди.

— Қишлоғимизда 186 хонадон бўлиб, кеча дунёга келган Наврўзой исмли қизалоқни қўшганда, 1025 нафар аҳоли яшайди, — дейди «Анорзор» ҚФЙ раиси Шерали Жўраев. — Ҳудудимизда мактабгача таълим муассасаси, мактаб ва қишлоқ врачлик пункти бор. Анорзор қўшни давлат билан чегарадош. Ҳув тепаликдагиларни кўряпсизми, улар Анорзордаги Наврўз байрамини чегаранинг нариги томонида туриб кузатишяпти.

Чегара ортида Сирт қишлоғи борлигини билардим. Унинг элбошиси Женеш ота билан танишман. Анорзордаги тантаналарни томоша қилаётганлар орасида у киши ҳам бормикан, деб ўйладим...

Анорзорда эса байрам авжига чиққан. Сўз олганлар мусаффо осмонимиз, бахтли ҳаётимиз, обод юртда яшаш имконияти учун шукроналик сўзларини айтдилар. Дарвоқе, тун ва кун тенглашадиган, хал­қимиз Наврўзи олам дея эъзозлайдиган шукуҳли кун арафасида Фарғона вилоятида анъанага кўра «Энг обод маскан» кўрик-танлови ўтказилди. Натижада шаҳар ва қишлоқлар, маҳалла ва гузарлар, кўчалар, кўп қаватли уйлар, қўйинг­ки, ҳамма ер ободлик либосини кийди. Миллионлаб кўчатлар экилиб, янги боғ ва гулзорлар бунёд этилди. Ҳар бир хонадон пок ният, эзгу тилак ва шукроналик руҳига тўлди.

— Бу бежиз эмас, албатта. Муҳтарам Президентимиз «Ободлик кўнгилдан бошланади», деган. Кўрик-танлов мақсади ҳам юртни обод қилиш билан бирга, Юртбошимиз таъкидлаганидек, кўнгилларга обод­лик улашиш эди, — дейди қувалик шоира Зуҳрахоним Алиева.

Мазкур танловда иштирок этган анорзорликлар ҳам ғолиблар сафидан жой олишди. Қишлоқ кўчалари, хонадонлар, адирларга ниҳол қададилар.

— Бугун биз ўзига хос акция ўтказдик ва унинг ҳар бир иштирокчиси Мустақиллигимизнинг 25 йиллигига бағишлаб 25 тупдан ­мевали ва манзарали кўчат экди, — дейди ЎзХДП Қува туман ­кенгаши раиси ­Мастурахон ­Сайфутдинова.

ЎзХДП вилоят ва туман кенгашлари Президентимизнинг Наврўз умумхалқ байрамига тайёргарлик кўриш ва уни ўтказиш тўғрисидаги қарори ижросини таъминлаш мақсадида «Маҳалла» хайрия жамоат фонди вилоят бўлими, вилоят телера­диокомпанияси, Ички ишлар, Маданият ва спорт ишлари бошқармалари, Ўзбекистон автомобиль ва дарё транспорти агентлиги вилоят бўлими билан ижтимоий шерикликда «Ҳар кунимиз Наврўз бўлсин» шиори остида чегара ҳудудларда тантаналар ташкил этиш ҳақида қўшма қарор қабул қилинганди. Шуни алоҳида таъкидлаш керакки, вилоятнинг Данғара, Бешариқ, Риштон туманларида шу каби тадбирлар партия кенгашлари ташаббуси билан бўлиб ўтди.

Анорзорда эса айни давра қизиган чоғда қишлоқнинг ташаббускор, фаол ёшларига ЎзХДП сафига қабул қилинганлик ҳақидаги аъзолик гувоҳномалари топширилди.

— Мен қишлоғимиздаги ЎзХДП ҳудудий бошланғич партия ташкилоти тадбирларида ихтиёрий равишда иштирок этардим, — дейди 45-умумтаълим мактаби ўқитувчиси Гулнора Эргашева. — Партия ғоялари, дастури билан танишдим ва қатъий қарорга келиб, бу ҳақда БПТга мурожаат қилдим. Менга партияга аъзолик гувоҳномаси айнан Наврўз байрами куни топширилаётгани ҳаётимдаги унутилмас воқеалардан бўлиб қолади.

Анорзордаги байрамда болалар ва катталар халқ ўйинлари ҳисобланган арқон тортиш, қўлкураш, лапар айтиш бўйича беллашдилар. «Балли, қизлар» танлови ҳам ўтказилди.

— Наврўз шодиёналари ҳали узоқ давом этади. Биз вилоятимизнинг чегарага туташ барча қишлоқларида шу каби тантаналарни ташкил этишни мақсад қилганмиз, — дейди ЎзХДП ­Фарғона вилояти кенгаши раиси вазифасини бажарувчи Дилбархон Мамажонова.

 

Муҳаммаджон ОБИДОВ,

«Ўзбекистон овози» мухбири.



DB query error.
Please try later.