24.03.2016

ГАЗ ТАЪМИНОТИ ЯХШИЛАНМОҚДА

Мамлакатимизнинг олис ва чекка ҳудудларида, ҳали табиий газ етиб бормаган ёки газ қувури тортиш қийин бўлган қишлоқ ва овулларда, яйловларда яшовчи хонадонларни суюл­тирилган табиий газ билан мунтазам таъминлаш муҳим ижтимоий вазифалардан бири ҳисобланади.

Мухбиримизнинг «Ўзтрансгаз» акциядорлик компанияси газ таъминоти бўйича ишлаб чиқариш ва фойдаланиш хизмати бошлиғи Иброҳим Маҳмудов билан суҳбати ана шу мавзуга бағишланди.

— Кейинги йилларда аҳолига суюлтирилган газ етказиб бериш соҳасида ижобий ўзгаришлар юз берганини кўпчилик эътироф этмоқда. Бунга нималар ҳисобидан эришилди?

— Саволингизга жавоб бериш учун сал орқага чекинишга тўғри келади. Аҳолига суюлтирилган газ етказиб беришда узилишлар содир бўлаётгани ҳақида ариза ва шикоятлар кўпайгандан сўнг, 2012 йилда «Ўз­трансгаз» акциядорлик компаниясида ушбу масала жиддий ўрганиб чиқилди. Аниқланган муаммоларни бартараф этишнинг чора-тадбирлари тузилиб, унда ҳар йили 1 июлга қадар республикамизнинг шаҳар ва туманлар ҳокимликлари, қишлоқ ва маҳалла фуқаролар йиғинлари билан биргаликда суюлтирилган газдан фойдаланадиган хонадонлар ва улардаги мавжуд газ жиҳозлари сони хатловдан ўтказилиши белгилаб қўйилди. Шунингдек, суюлтирилган газ ишлаб чиқарувчи корхоналар билан ҳудудлар­аро газ таъминоти унитар корхоналари ўртасида шарт­номалар тузиш ва уларнинг бажарилишини таъминлашга ҳам алоҳида эътибор қаратилди. Биринчи навбатда, суюлтирилган газ тўлдириш пунктлари (ГТП) сонини кўпайтириш чоралари кўрилди. Натижада 2014 йилда 20 пункт қуриб, ишга туширилди. 2015 йилга келиб, уларнинг сони яна 14 тага кўпайтирилди.

Ҳар бир пунктга «Ўзбекхиммаш» корхонаси томонидан тайёрланган умумий ҳажми 100 метр куб бўлган суюлтирилган газ сақлаш сиғимлари ўрнатилиб, Хитой ва Россия давлатларидан келтирилган компрессор ускунаси, электрон тарози ва газ ҳайдаш насослари ўрнатилган.

Уларни қабул қилиш ва ишга тушириш тартиби қай тарзда амалга оширилади?

— Пунктлар қуриб битказилгандан сўнг синовдан ўтказилади. Бу жараёнда иштирок этган тегишли назорат органларининг вакиллари хулосалари асосида керакли ҳужжатлар тайёрлангач, очишга рухсат берилади.

— Бу борада қайси корхоналар билан ҳамкорлик қилинади?

— Ҳужжатлар республикамизнинг ваколатли органлари жумладан, «Саноатгеоконтехназорат» Давлат инспекцияси, «Ўздавнефтгазинспекция», жойлардаги ёнғин хавфсизлиги бошқармалари, лойиҳалаштириш ва бошқа тегишли корхоналар билан биргаликда тайёрланади.

— Ҳар бир ГТП неча кишини иш билан таъминлайди?

— Ҳар бир пунктда 10-13 иш ўрни бор. Ишга қабул қилинаётган ходимлар, пунктдаги мавжуд ускуналардан тўғри фойдаланиш, техника ва ёнғин хавфсизлиги бўйича қисқа курсларда ўқитилади, хизмат йўриқномалари билан таништирилади.

— ГТПларда ёнғин хавф­сизлигига қарши қандай чоралар кўрилган?

— Барча пунктлар ёнғин хавфсизлиги қоидаларида талаб этиладиган мосламалар билан таъминланган. Бундан таш­қари, ҳар бирида сув насос ёрдамида тортиб олинадиган артезиан қудуғи мавжуд. 100 куб метр сиғимдаги очиқ ҳавзаларнинг сувидан эса гидравлик ускуна (мотопомпа) ёрдамида фойдаланилади.

Асосий мавзуга қайтсак, 2015 йилда аҳолига қанча миқдорда суюлтирилган газ тарқатилди?

— Ўтган йили 2 мил­лиондан ортиқ хонадонга 176 минг тоннага яқин суюлтирилган газ етказиб берилди.

— 2016 йилга режалар қандай?

— Бу йил компания тизимидаги корхоналар томонидан аҳоли хонадонларига 215 минг тонна суюлтирилган газ етказиб берилиши режалаштирилган. Шу мақсадда 189 темир йўл вагон-цистерналаридан, 88 та МАN русумли тиркамали ва 400 дан ортиқ ISUZU русумли махсус автотранспортлардан фойдаланамиз.

— 2016 йилда ҳам ГТПлар қуриш режалаштирилганми?

— Аҳолининг бу борадаги эҳтиёжлари ўрганилмоқда. Агар талаб бўлса, албатта янгилари қурилади.

Эл-юрт фаровонлиги йўлида амалга ошираётган шарафли ишларингизда омад тилаймиз.

 

Равшан ШОДИЕВ,

«Ўзбекистон овози» мухбири.



DB query error.
Please try later.