17.03.2016

КОРХОНА ҚУВВАТИ ОШАДИ

Бу эса 90 нафар кишининг бандлигини таъминлаш имконини беради.

Президентимиз Вазирлар Маҳкамасининг 2015 йилда мамлакатимизни ижтимоий-иқтисодий ривожлантириш якунлари ва 2016 йилга мўлжалланган иқтисодий дастурнинг энг муҳим устувор йўналишларига бағишланган мажлисидаги маърузасида иқтисодиётни таркибий ўзгартиришни изчил давом эттириш, тармоқларни модернизация қилиш, техник ва технологик жиҳозлашга хизмат қилувчи инвестиция лойиҳаларини белгиланган муддатларда ишга туширишни таъминлаш зарурлигига алоҳида эътибор қаратиб, ушбу йўналишда Жиззахдаги цемент заводининг қувватини 1 миллион тоннагача портланд цемент ишлаб чиқариш даражасида кенгайтириш кўзда тутилаётганини айтган эди.

Айни кунларда «Элемент қурилиш» шўъба корхонасининг муҳандис ва қурувчилари хорижлик ҳамкорлар билан биргаликда ушбу вазифани амалга ошириш йўлида қизғин иш олиб боришмоқда.

Дарвоқе, ушбу заводнинг иш бошлаганига атиги икки йил бўлса-да, белгиланган режалар муваффақиятли бажариб келинмоқда. Йилига 350 минг тонна оқ ва 760 минг тонна портланд цемент тайёрлашга мўлжалланган, корхона жамоаси ўтган йили буюртмачиларга режадагидан 110 минг тонна кўп маҳсулот етказиб берди. Унинг бир қисми хорижга экс­порт қи­линди.

Асосий хомашё — оҳактошнинг корхона яқинидаги тоғдан қазиб олинаётгани эса оқ ҳамда портланд цемент таннархининг нисбатан арзон бўлишига асосий омил бўл­моқда.

— Ушбу корхона билан иш бошлаган пайтидан бери ҳамкорлик қилиб келамиз, — дейди «Жиззах фаввораси» қурилиш корхонаси муҳандиси Содиқ Сойибов. — Олаётган цементимиз қураётган бино ва иншоотларнинг мустаҳкам бўлишига хизмат қилишдан ташқари, уларга бетакрор кўрк бахш этмоқда.

Завод мамлакатимиздаги турдош корхоналар орасида ҳам замонавий, ҳам йирикларидан биридир. Кенг, ёруғ ва озода цехларини айлансангиз, харсанг тошлар ун каби майдаланаётган бўлса-да, чанг-тўзон сезилмайди. Цехлар замонавий техноло­гия­лар, шу жумладан, фильтрлаш ва тозалаш ускуналари билан жиҳозланган. Бу эса атроф-муҳит ҳавосини мунтазам назорат қилиб туриш, табиий газ ва электр энергияси сарфини камайтириш имконини бераяпти. Ишлаб чиқариш жараёнлари тўлиқ компьютерлаштирилган.

— Лойиҳанинг иккинчи нав­бати 35 миллион 800 минг АҚШ долларини ташкил этади, — дейди завод дирекцияси раҳбари Ойбек Зуфтаров. — 400 нафар малакали қурувчи ва муҳандис кучи билан иккита янги тегирмон, хомашёни тўхтовсиз етказиб беришга мўлжалланган ҳамда цементни ҳаво босими орқали ҳайдовчи қўшимча линиялар барпо этилмоқда. Бу эса бевосита корхонада иш унумдорлигини оширишга хизмат қилади. Чунки олдинлари порт­ланд­ цемент ишлаб чиқариш пайтида оқ цемент тайёрлашни вақтинча тўхтатиб туришга мажбур бўлардик. Лойиҳа амалга ошгандан сўнг бунга ўрин қолмайди. Ҳар иккала линия ҳам бир вақтнинг ўзида ишлаш имконига эга бўлади.

Жамоадаги 700 нафардан зиёд ишчининг асосий қисми касб-ҳунар коллежлари ҳамда олий ўқув юртларининг битирувчиларидан иборат. Корхонанинг қуввати ошгач, яна 90 нафар киши муносиб ҳақ тўланадиган барқарор иш билан таъминланади.

Бир сўз билан айтганда, юртимизда амалга оширилаётган бунёдкорлик ишларига ўзининг юқори сифатли маҳсулотлари билан ҳисса қўшаётган корхонанинг истиқболи порлоқ дейишга тўла асос бор.

 

Иброҳим ЖОНУЗОҚОВ,

«Ўзбекистон овози» мухбири.


Фикр ва мулохазалар

Защита от автоматических сообщений

Сўнгги янгиликлар: