15.03.2016

«БОЛАГА ЙЎНАЛТИРИЛГАН ТАЪЛИМ» ЛОЙИҲАСИ

– Болани мактабга тайёрлаш мураккаб ва узоқ муддатни талаб этадиган жараён, – дейди Самарқанд шаҳридаги 76-мактабгача таълим муассасаси мудираси Лайло Раҳматова. –Бугунги кунда ЮНИСЕФнинг «Болага йўналтирилган таълим» лойиҳасида иштирок этмоқдамиз. Унинг асосий мақсади – янги инновацион технологиялардан кенг фойдаланиш, болага индивидуал ёндашиш, уларни мустақил фикрлашга, мулоқотга киришишга, ўз фикрини ҳимоя қилишга йўналтиришдан иборат.

Муассасада ташкил этилган ўқув фаоллик марказларида ҳар бир боланинг индивидуал хусусиятлари, қизи­қишлари, иқтидоридан келиб чиқиб, иш олиб борилмоқда. Ҳар бир маш­ғулотдан олдин болаларга хоҳлаган марказни танлаш таклиф этилади. Тарбиячи эса берилган мавзу асосида болалар билимини аниқлайди.

Ўқув фаоллик марказида табиатшуносликдан болаларга турли жонли ва жонсиз табиат ҳақида тушунча берилади. Санъат марказида эса расм чизиш нафақат қоғозда, балки қум, шиша ва тошлар устида, махсус доскаларда бўёқлар, шам, табиий материаллар ёрдамида бажарилади. Пазандачилик марказида болалар турли таомлар тайёрлайди. Математика марказида ўйинлар асосида фикрлашга ўргатилади.

Ҳар бир йўналиш бўйича олиб борилаётган ишлар маълум бир мақсад ва мазмунга, тарбиявий аҳамиятга эга.

 — Бугунги кунда муассасамизда Европа Иттифоқининг Инклюзив таълим лойиҳаси бўйича ҳам иш олиб бориляпти, — дейди муассаса педагог-психологи Нилуфар Нуриддинова. — Бунда алоҳида эҳтиёжи бўлган болаларни умумтаълим мактабларига тайёрлаш бўйича иш олиб борилади. Бизда тарбияланаётган 350 нафар боладан 39 нафари енгил кўринишдаги, эшитиш қобилияти паст ёки сўзлашув нутқида нуқсон бўлган болалар ҳисобланади. Уларда ўзига бўлган ишонч ҳиссини шакллантиришга дои­мий эътибор қаратилади. Масалан, ҳар бир боланинг ривожланиш варақаси, анамнез маълумотлари, хулқ-атвори, хатти-ҳаракатлари бўйича индивидуал ишлар амалга оширилади. Муассасамиз раҳбари Лайло Раҳматова томонидан ишлаб чиқилган, «Мактабгача таълим муассасаларида инклюзив таълимни ташкил этиш» бўйича тавсиялар вилоят ва республика миқёсида оммалаштирилди.

 Муассасада болалар кўз гимнастикаси, тетиклаштирувчи гимнастика, сузиш, нафас олиш, ясси оёқлиликнинг олдини олиш каби бир қатор машқлар асосида соғломлаштирилмоқда. Йил давомида ўтказиладиган спорт мусобақалари, «Алпомиш ва Барчиной» махсус тестлари, «Соғ­ломжон-полвонжон», «Бўш келма қизалоқ», «Кичкинтой-ширинтой», «Дадам ишда, мен ва ойим спортда» каби қизиқарли тадбирлар болаларнинг жисмонан соғлом бўлиб улғайишига хизмат қилмоқда. Муассасада ўғил болалар учун таэквандо, қизлар учун бадиий гимнас­тика тўгараги мавжуд.

Мамлакат миқёсида мактабгача таълим муассасаларида қўлланилаётган бундай инновацион технологиялар Соғлом она ва бола йилида амалий натижаларга эришиш имконини бермоқда.

 

Абдурасул САТТОРОВ,

«Ўзбекистон овози» мухбири.



DB query error.
Please try later.