15.03.2016

ИШЛАБ ЧИҚАРИШНИ МАҲАЛЛИЙЛАШТИРИШ

тармоқлараро саноат кооперациясини кенгайтириш, ички бозорни рақобатдош, сифатли ва импорт ўрнини босувчи маҳсулотлар билан тўлдиришнинг муҳим омилидир

Мамлакатимизда амалга оширилаётган Маҳаллийлаштириш дастури ички бозорни сифатли ва импорт ўрнини босувчи маҳсулотлар билан тўлдириш ҳамда ишлаб чиқарувчилар ўртасида кооперацион алоқаларни ривожлантиришда янги даврни бошлаб берди.

Бугунга келиб нефть ва газ соҳаси, йирик ҳамда озиқ-овқат саноати корхоналари учун ускуналар, полимер ҳамда пластмасса буюмлари, калийли ўғитлар, электр двигателлар, кабель ва симлар, спорт анжомлари, маиший техникалар, тежамкор ёритиш мосламалари, қурилиш ва пардозлаш материаллари маҳаллий хомашёдан тайёрланмоқда.

Тури юздан ошадиган маҳаллий маҳсулотлар фақат ички бозоримизни тўлдириб қолмасдан, ташқи бозорларга ҳам чиқарилмоқда. Фақатгина 2015 йилнинг ўзида қўшимча 52 турдаги 25 миллион долларлик маҳсулотлар экспорт қилингани ҳам бунинг тасдиғидир.

— Дастурга киритилган корхоналарнинг уч йилгача ягона солиқ тўлови, мулк ва фойда солиғи ҳамда божхона тўловларидан озод этилгани тадбиркорлар ва ишбилармонлар учун кенг имкониятлар эшигини очмоқда, — дейди Қарши туманидаги «Метролог» МЧЖ раҳбари Дилшод Зиятов. — Маҳаллийлаштириш лойиҳалари паспортларини ишлаб чиқиш ва кўриб чиқиш тизимининг автоматлаштирилгани туфайли тақдим этаётган лойиҳа ҳужжатларини тўлдиришга сарфланаётган вақтимиз тежалмоқда. Уларнинг тегишли вазирлик ва идоралар томонидан кўриб чиқилиш муддати ҳам сезиларли қисқарди.

— Корхонамиз 2006 йилда Дастурга юқори кучланишли сақлагичларни ишлаб чиқариш лойиҳаси билан кирган эди, — дейди Андижон вилоятидан «Фусункор» МЧЖ директори ўринбосари Иқболбек Раҳмонов. — Ўн йил мобайнида берилган имтиёз ва имкониятлардан унумли фойдаланган ҳолда яна беш турдаги янги маҳсулотлар ишлаб чиқаришни йўлга қўйдик. Агар 2010 йилда корхонамиз 400 мил­лион сўмлик маҳсулот ишлаб чиқарган бўлса, бугунги кунга келиб, бу кўрсаткич 3 миллиард 200 миллион сўмга, ишловчиларимиз сони 45 дан 80 нафарга етди. Айни пайтда яна 2 турдаги янги маҳсулот ишлаб чиқариш арафасида турибмиз.

— Ўзимизда чиқарилаётган маҳсулотлар нархи четдан олиб келинаётганидан анча арзонга тушмоқда, — дейди Иқтисодиёт вазирлигининг мутахассиси Отабек Разиқов. — Бу эса саноат корхоналари ўртасидаги кооперацион алоқаларнинг кучайишига олиб келмоқда. Дас­турни амалга оширишда дунёнинг етакчи хорижий компаниялари ва инвесторларини жалб этишга ҳам катта эътибор қаратилмоқда. Самарқанд вилоятидаги оғир юк машиналари ишлаб чиқарувчи «MAN» компания­си, қишлоқ хўжалиги техникалари ишлаб чиқарувчи «CLASS» ва «Lemken» компания­лари, маиший техника ишлаб чиқарувчи «TOSHIBA», «Candy», «LG» ва «SAMSUNG» корхоналари билан ҳамкорлик натижасида рақобатбардош тайёр маҳсулотлар ишлаб чиқарилмоқда. Бутловчи қисмлар ва материаллар ишлаб чиқаришга ихтисослашган кичик корхоналар билан йирик корхоналарнинг ҳамкорлиги тобора кучаймоқда.

Дарвоқе, ўтган йилги Хал­қ­­­аро саноат ярмаркаси ва Коо­п­ерация биржасида маҳсулот етказиб бериш бўйича умумий қиймати 11,9 триллион сўмлик 13,3 минг шартнома тузилган бўлса, шундан 2,1 триллион сўмлиги импорт ўрнини босадиган маҳсулотларни ўзимизда ишлаб чиқаришни ўзлаштириш ва етказиб бериш бўйича шартномалардир. Ушбу шартномаларнинг бажарилиши эса жорий йилда иқтисодиётимизда муҳим ўрин тутадиган корхоналарнинг чет элдан маҳсулот сотиб олиши учун ишлатиладиган 637,5 миллион доллар миқдоридаги маблағни тежаб қолиш имконини беради.

Айни пайтда Маҳаллийлаштириш дастури доирасида иш бошлайдиган корхоналар ва кичик бизнес субъектлари кўплаб янги иш жойларининг яратилишига олиб келади.

Энг асосийси, импорт ўрнини босувчи, харидоргир маҳсулотларнинг ўзимизда ишлаб чиқарилиши натижасида мамлакатимизнинг иқтисодий қудрати янада ошади, аҳолининг турмуш фаровонлиги юксалади.

 

Обиддин МАҲМУДОВ,

«Ўзбекистон овози» мухбири.


Фикр ва мулохазалар

Защита от автоматических сообщений

Сўнгги янгиликлар: