Охирги сонда



Кўп ўқилган мақолалар



Долзарб мавзу



Мақолалар архиви

«    Dekabr 2019   
Du Se Cho Pa Ju Sha Ya
25 26 27 28 29 30 1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31 1 2 3 4 5
15.03.2016

«ҲАЁТИМИЗНИНГ ЧИРОҒИ, УМРИМИЗНИНГ ГУЛИ»

хотин-қизларга кўрсатилаётган юксак эҳтиром бизни фидойиликка ундайверади

Озода ҚЎШБОҚОВА, Пахтакор туманидаги «Ипак йўли» қишлоқ фуқаролар йиғини раиси, туман Кенгашидаги ЎзХДП гуруҳи аъзоси, «Дўстлик» ордени соҳиби

Кечагидек ёдимда. Президентимиз 1998 йилнинг 5 декабрь куни Конституциямизнинг 6 йиллигига бағишланган тантанали маросимда 1999 йилни мамлакатимизда Аёллар йили, деб эълон қилар экан, биз — аёлларни «Ҳаётимизнинг чироғи, умримизнинг гули», дея эъзозлаган, улуғлаган эди.

Йиллар ўтди. Юртимизда аёлни улуғлаш муқаддас тушунчага айланди ва у оилани, ­Ватанни, ҳаётни шарафлаш даражасига кўтарилди. Биз буни ҳар кун, ҳар соат ҳис этиб яшаяпмиз. Аввало, мамлакатимизда хотин-қизларнинг оиладаги, давлат ва жамият қурилишидаги ўрни кучайди, уларнинг ҳуқуқий, ижтимоий, иқтисодий ва маънавий манфаатларини ҳимоя қилиш тизими яратилди. Бугун аёлларимиз давлат ва жамият бошқарувида, ижтимоий-сиёсий ҳаётимизда ва яна бошқа соҳаларни ислоҳ қилишда фаол иштирок этишяпти.

Давлатимиз раҳбарининг Халқаро хотин-қизлар куни муносабати билан бизга йўллаган байрам табригида ҳам ана шу жиҳатларга алоҳида эътибор қаратилди. Табрикда таъкидланганидек, қанчадан-қанча опа-сингилларимиз Олий Мажлис Қонунчилик палатаси ҳамда маҳаллий Кенгашларда хотин-қизлар манфаатларини ҳимоя қилиш, оналик ва болаликни асраш ишларида ўз ўрни, позициясини намоён этишмоқда. Жамият ҳаёти, мамлакат тараққиё­ти йўлида таълим-тарбия, маданият ва илм-фан соҳаларида меҳнат қилаётган ходимларнинг 73 фоизини, соғлиқни сақлаш тизимида 75, ишлаб чиқариш тармоқларида 42, қишлоқ хўжалигида 43 фоизини айнан аёллар ташкил этаётгани уларнинг ҳақиқатан ҳам бирор-бир соҳада ҳеч кимдан қолишмаслигини кўрсатади, дейилди табрикда.

Ўзимдан қиёс. Кўп йиллар деҳқончилик қилдим. Пилла боқдим. Хўжаликни бош­қардим. Аммо меҳнатим қадр топмади, косамиз оқармади. Оилам билан кичкинагина лойсувоқ уйда яшадик. Истиқлол туфайли елкамизга офтоб тегди. Фермер бўлдим. Мулкдорга айландим. Кўнгилдагидек уй-жой қурдик. Енгил машинали бўлдик. Фарзандларимизни ўқитдик. Бугун уларнинг бири фермер, бири тадбиркор, яна бири муаллим. Каму кўстимиз йўқ. Ҳаётдан рози бўлиб яшаяпмиз.

Қишлоғимиз Буюк Ипак йўли бўйида, «Катта Ўзбек тракти»нинг шундоққина чеккасида жойлашган. Ўндан ортиқ турли миллат ва элат вакилларидан иборат 7855 нафар аҳоли, 1390 хонадон бор. 2 умумтаълим мактаби, касб-ҳунар коллежи, мактабгача таълим муассасаси ҳамда қишлоқ врачлик пункти фаолият кўрсатмоқда. Ўнлаб савдо, умумий овқатланиш ва хизмат кўрсатиш шохобчалари ишлаб турибди. Яқинда намунали лойиҳа асосида 10 уй қуриб битказилди. Уларга кўчиб кирган фуқароларнинг қувончини кўринг. Шаҳарникидан асло қолишмайдиган қулай шароитдан бошлари осмонга етган.

Меҳнат қилган кам бўлмас экан. Ҳам­қишлоқларим туман Кенгаши депутатлигига, қишлоқ фуқаролар йиғини раислигига сайлашди. Камтарона хизматларим инобатга олиниб, «Дўстлик» ордени билан тақдирландим. Айни пайтда ҳам депутат, ҳам раис сифатида ҳам­қишлоқларимнинг турмуш шароитларини янада яхшилаш, қишлоғимизни бундан-да файзли, шинам, обод этишга ҳисса қўшаётганимдан хурсандман.

Яқинда ЎзХДПдан туман Кенгашига сайланган депутатлар қишлоқларда ишлаб чиқариш корхоналарини кўпайтириш ҳисобига янги иш ўринлари яратиш тўғрисидаги масалани атрофлича ўрганиб чиқдик ва у тегишли доимий комиссияда муҳокама қилинди. Масала туман Кенгаши сессиясига киритилди. Натижада партиямиз электорати манфаатларига дахлдор қарор қабул қилинишига эришдик.

Аёл — жамият гултожи. Шундай экан, хотин-қизларга қарата ҳамиша фидойилик, садоқат ва меҳр-муҳаббат тимсоли бўлиб қолайлик дегим келади. Биз — хотин-қизларга билдирилаётган ишонч, ҳурмат ва эътибор доим олдинга интилишга, ўз устимизда ишлашга ундайди.


Фикр ва мулохазалар

Защита от автоматических сообщений

Сўнгги янгиликлар: