12.03.2016

СОҒЛОМ АЁЛ БАХТЛИ АЁЛДИР

Давлатимиз раҳбарининг Халқ­аро хотин-қизлар куни байрами муносабати билан йўллаган табригини ҳар йили катта ҳаяжон, фахр-ифтихор билан тинглайман. Бу гал ҳам табрикда айтилган фикр­лар, келтирилган факт ва рақамлар, айниқса, оналик ва болаликни муҳофаза қилиш ҳақидаги сўзлар мени тўлқинлантириб юборди.

Буни қаранг, Соғлом она ва бола йили Давлат дастурида белгиланган вазифаларни амалга ошириш учун жами 7 триллион 483 миллиард 300 миллион сўм ва 194 миллион 400 минг доллар ҳажмдаги маблағ ажратилар экан. Бу рақамлар мамлакатимизда оналар ва болаларга қаратилаётган эътибор кўлами, қилиниши керак бўлган ишлар миқё­си нақадар улкан эканини кўрсатиб турибди.

Ўз соҳам мисолида гапирадиган бўлсам, «Саломатлик-2» ва «Саломатлик-3» лойиҳалари асосида юртимизнинг барча жойларида бўлгани каби, вилоятимиздаги қишлоқ врачлик пунктлари ҳам тиббий асбоб-ускуна ҳамда замонавий жиҳозлар билан таъминланди. Бу йил ана шу эзгу мақсадларнинг давоми сифатида кўплаб ишлар амалга оширилишини ўйлаб, ҳозирдан хурсанд бўлиб кетаяпман, қалбим ғурурга тўлмоқда.

Албатта, Давлат дастуридаги ишлар кўп жиҳатдан ЎзХДП Сайловолди мақсадларига уйғунлиги депутат сифатида бизга катта масъулият юклайди. Хотин-қизлар бандлигини таъминлашнинг қонуний асосларини янада такомиллаштириш, уларнинг ижтимоий-иқтисодий фаоллиги, сиёсий-ҳуқуқий маданиятини оширишимиз зарур. Бу борада турли тадбирлар ўтказишни режалаштирганмиз.

Ҳар бир лойиҳа, ҳар бир тадбир ўзининг самараси билан аҳамиятли, деб ўйлайман. Шу вақтгача вилоятимизда аёлларни иш билан таъминлашга қаратилган ҳамкорликдаги тадбирлар натижасида кўплаб хотин-қизлар ишга жойлашишига ёрдамлашилди. 700 нафардан ортиқ аёллар ва коллеж битирувчиларига кредит олишда кўмаклашилди. 4 мингдан ортиқ хотин-қиз касаначилик меҳнатига жалб қилинди.

Бу йил хотин-қизларимиз ўртасида соғ­лом турмуш тарзи бўйича тушунтириш-тарғибот ишларини изчил йўлга қўйишимиз зарур. Туманларимизда, олис қишлоқларимизда бу масала муҳим аҳамият касб этади. Чунки оиланинг саломатлиги, бахти аёлга, онага боғлиқдир.

 

Мақсуда БОЗОРОВА,

Қарши шаҳридаги 3-оилавий поликлиника бош врачи,

халқ депутатлари Қашқадарё вилоят Кенгашидаги ЎзХДП гуруҳи аъзоси.



DB query error.
Please try later.