03.03.2016

МЕҲР ВА ЭЪТИБОР

инсонни улуғлайди, мартабасини оширади

Кимдандир яхшилик кўрсак, бошқаларнинг меҳр-эътиборини ҳис қилсак, кўнглимиз кўтарилади, ҳаёт кўзимизга янада жозибали кўринади. Республика «Меҳр-шафқат ва саломатлик» жамоат фонди томонидан ўтказилаётган хайрия тадбирлари юрт­дошларимиз ўртасидаги ўзаро ҳурмат, меҳр-оқибат, инсонпарварлик, ҳамжиҳатлик сингари фазилатларни янада мустаҳкамлашга қаратилган.

Бу фикрлар фонднинг 2015 йил якунлари ва 2016 йилга мўлжалланган режаларига бағишланган мажлисида ҳам алоҳида таъкидланди.

Бу ҳақда жамоат фонди васийлик кенгаши аъзоси, Тошкент шаҳар Хотин-қизлар қўмитаси раиси Фарида Абдураҳимова шундай дейди:

Бугунги кунда фондимиз томонидан ижтимоий ҳимояга муҳтож, жисмоний имконияти чекланган аҳоли қатламларини қўллаб-қувватлаш, соғ­лиқни сақлаш муассасаларини замонавий асбоб-ускуналар билан таъминлаш борасида кенг кўламли ишлар амалга оширилмоқда. Келгусида фонд фаолиятини янада такомиллаштиришимиз зарур. Хусусан, Соғлом она ва бола йилида тарғибот-ташвиқот ишларини янги поғонага кўтаришимиз лозим. Аҳоли ўртасида соғлом турмуш тарзини тарғиб этиш, тиббий маданиятни ошириш мақсадида тиббиёт муассасалари, хотин-қизлар қўмитаси ва бошқа жамоат ташкилотлар билан ҳамкорлик янада кучайтирилади.

— Ўтган йили фондимиз, унинг вилоят, туман ва шаҳар ваколатхоналари ҳамда ҳудудий муассасалари томонидан фуқаролар соғлиғини муҳофаза қилиш, муҳтож оилаларга инсонпарварлик ёрдами кўрсатиш борасида хайрли ишлар амалга оширилди, — дейди жамоат фонди бош­қаруви раиси Асрол Мирзаҳмедов. — «Кексаларни эъзозлаш йили» Давлат дастури ижросини таъминлаш мақсадида фонд томонидан «Кекса ва ногиронларни ижтимоий қўллаб-қувватлаш ва ҳаёт даражаси сифатини юксалтириш» борасидаги ижтимоий лойиҳа учун Олий Мажлис ҳузуридаги Нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фонди томонидан 120 миллион сўм грант олдик. Ушбу маблағ Меҳнат вазирлиги тизимидаги Мурувват уйларида яшаётган кекса ва ногиронларни манзилли ижтимоий ҳимоя қилишга йўналтирилди. Хусусан, Хўжайли, Зомин, Шаҳрисабз туманларидаги Мурувват уйларида хайрия тадбирлари ўтказилиб, мазкур муассасалардаги беморлар учун зарур воситалар олиб берилди.

Шунингдек, моддий ёрдам кўрсатиш, имтиёзли равишда даволаш масканларига жойлаштириш борасида фуқаролардан келиб тушган 80 га яқин мурожаат ҳамкор ташкилотлар кўмагида ижобий ҳал этилди.

2015 йил давомида фонд томонидан хайр-эҳсон ва ҳомийлик мақсадлари учун 1 миллиард 182 миллион сўм сарфланди.

Фонд васийлик кенгаши аъзоси Мухтор Усмонхўжаев қуйидаги фикр-мулоҳазаларни билдирди:

— Жорий йилда ижтимоий ҳимояга муҳтож оилалар фарзандларининг соғлиғини муҳофаза қилиш, малакали шифокор маслаҳати ва даволаш ишларини ташкил этиш, болаларни спортга жалб этиш масалалари диққат-эътиборимизда бўлиши лозим.

Оналар ва болалар саломатлигини асрашда даволаш-профилактика муассасаларини керакли асбоб-ускуналар билан жиҳозлашга кўмаклашиш ҳам долзарб вазифадир. Жамоат фондининг ҳудудлардаги ваколатхоналари эса «Соғлом она ва бола йили» Давлат дас­тури ижросида фаол иштирок этиши зарур.

Фонднинг Тошкент, Бухоро, Наманган ва Сирдарё вилоят ваколатхоналари фаолияти намунали ташкил этилган. Мисол учун, Наманган вилоят ваколатхонасининг «Биз учун ҳаёт давом этади» ижтимоий лойиҳаси учун Олий Мажлис ҳузуридаги Нодавлат нотижорат ташкилотларини ва фуқаролик жамиятининг бошқа инс­титутларини қўллаб-қувватлаш жамоат фонди томонидан 15 миллион, Сирдарё вилоят ваколатхонасининг «Болаларни сепсиз касаллигидан даволаш ва ташхис қўйишда замонавий усуллардан фойдаланиш» мавзусидаги ижтимоий лойиҳаси эса 14 миллион сўм миқдорида молиялаштирилди. Ушбу лойиҳалар йил давомида ҳаётга татбиқ этилди.

Йиғилиш якунида фонд фаолияти билан боғлиқ бошқа муҳим масалалар ҳам кўриб чиқилди.

 

Нурали ОРИПОВ,

«Ўзбекистон овози» мухбири.



DB query error.
Please try later.