01.03.2016

САЪДУЛЛО БОҒБОННИНГ БОҒЛАРИ

1000 гектардан ошди, яна 100 минг туп кўчат тайёр

Уни нафақат Китоб туманида, балки бошқа ҳудудларда ҳам яхши билишади. У етиштирган кўчатлардан яралган боғлар турли минтақаларда шовуллаб, мангуликнинг яшил қўшиғини куйлаб турибди. Айниқса, тоғ даралари-ю қир-адирларда барпо этган боғи таҳсинга лойиқ.

Мақоламиз қаҳрамони — Саъдулло Насимов билан етти йил бурун танишгандим. Боғдорчилик ривожига бағишланган кенгашда сўзга чиқиб, ўз тажрибалари ҳақида сўзлаб, кўпчиликнинг эътиборини торт­ганди.

Шундан сўнг кўп марта учрашиб, суҳбатлашдик. Яқинда яна йўқлаб бордим.

У юксак тоғлар бағридаги Сиёб қишлоғида туғилиб, ўсган. Мактабни битиргач,
Самарқанд иқтисодиёт ва сервис институтида таҳсил олади. Анча йиллар мутахассислиги бўйича ишлайди.

Тоғда яшаганларида отаси Фатхулло боғбон арча, дўлана, бодом дарахт­ларини кўчатдан ўстириш сирларини ўргатган, ўз касбига меҳр уйғотганди. Йиллар ўтса-да, ёшлигида кўнглига тушган чўғ сўнмади. Саъдулло ота касби билан шуғулланишга аҳд қилди. Шредер номли боғдорчилик институтининг
Самарқанддаги филиалига бориб, билим ва малакасини оширади.

Тўқсонинчи йилларнинг бошида Китоб ўрмон хўжалигидан 30 гектар ерни ижарага олади. Олманинг «Юлдуз», «Кремсон», «Голдень» сингари навлари кўчатини ўтқазади. Уларнинг униши, илдиз отиши осон кечмайди.

Сафармурод ака, Муртозахон ота сингари тажрибали соҳибкорлардан маслаҳат олади. Заҳматли меҳнат зое кетмади. Кўп ўтмасдан боғ тўкинчилик масканига айланди. Олинаётган тонна-тонна мевалар қишин-ёзин эл дастурхонига тортиқ этилиб, шундан келаётган даромад эвазига 40 га яқин кишининг оиласи обод бўлмоқда.

Бу гапни эшитгач, Саъдуллони саволга тутдим:

— Меваларни асраш учун шарт-шароит борми?

— Адирларнинг бағрида табиий омборхонамиз бор. Мевалар йил бўйи бузилмасдан туради, — дейди моҳир боғбон.

Унинг ҳозирги ишлари билан танишиш истагини билдирдим. Саъдулло мени Китоб шаҳрининг кунчиқар томонидаги бир масканга бошлаб борди. Бу ер ўнлаб мева ва манзарали дарахт кўчатлари ўсиб турган 2 гектарлик тажриба майдони экан. Мен Шаҳрисабз шаҳриниинг кўча ва хиёбонларига хориждан келтирилган манзарали дарахт­лар экилганини айтиб қолдим.

— Чет элларнинг тажрибасини ўргансак, зарар қилмайди, — дейди Саъдулло. — Бироқ ўша кўчатларни ўзимиз ўстирсак, янада яхшироқ бўлади. Мана бу майдонда олма, нашвати, гилос, олхўри каби мевали, шумтол, қрим қарағайи, япон софораси ва бош­қа манзарали дарахт кўчатлари етиштираяпмиз. Юртдошларимиз жон-жон деб олиб кетишаяпти.

— Бунақа хайрли иш билан қанча йилдан бери шуғулланасиз? — деб сўрайман.

— Боғбонликка қўл урганимдан бери. Ҳисоблаб кўрсам, мен кўчат етказиб берган боғлар ҳозиргача 1000 гектардан ошибди. Яна 100 минг туп кўчат тайёр. Харидорлар воҳамиздаги туманлардан, Жиззах, Самарқанд вилоятларидан келишади. 2011 йилда Қарши шаҳрининг боғ ва хиёбонлари учун 2000 туп манзарали дарахт кўчати етказиб бердик. Ғузор туманидаги 10 гектар майдонда дарахтларимиз барқ уриб ўсаяпти.

Суҳбатимиз устига бир киши келиб қолди. Саъдулло билан қучоқлашиб кўришди. У боғларини Саъдулло кўкартириб, парваришлаб берган «Агро Феруз» фермер хўжалиги раҳбари Самижон Қурбонов экан. Яна маслаҳатга келибди.

Тажриба майдонидаги боғбонлар билан хўшлашиб, Қашқадарё соҳилидаги паст бўйли боғ тарафга йўл олдик. Бу боғ ҳам Саъдуллонинг меҳнати билан барпо бўлган. Гап шундаки, юртимизда интенсив, серҳосил боғлар яратишга киришилганда, тадбиркор Саломжон Ҳамидов Сербия давлатидан мева кўчатлари келтиради. Иш бошига Саъдулло боғбонни қўяди. Қисқа фурсатда 4 гектар ерга олма, 7 гектардан ошиқ ерга олхўри кўчатлари ўтқазилади.

— Ўзим олий маълумотли агрономман, — дейди «Китоб мевалари» МЧЖ бошқарувчиси Ғайрат Эргашев. — Лекин Саъдуллога тан бердим. Биз чет элда ўсадиган мевали дарахтлар қандай экилиши, парвариш қилинишини билмасдик. Қарангки, Саъдулло эплади. Ўтган йили 60 тонна олхўри, 46 тонна олма етиштирдик. Бир-икки йилга қолмасдан барча харажатларни қоплаб, даромад ола бошлаймиз.

Кўп ўтмай Оқсув дарёси бўйидаги маҳаллага етиб келдик. Чоққина ҳовлига кирамиз. Бу ерда Саъдуллонинг ота-онаси яшар экан. Мевали дарахтлар, ихчам иссиқхона кўзга ташланади. Оддийгина уйнинг кенг хонасига дастурхон ёзилди.

Бизга мезбонлик қилаётган Фатхулло бобо 92, Сожида момо саксон ёшга кирибди. Иккаласи 7 ўғил ва 3 қизни улғайтириб, элга қўш­иб­­ди.

Табаррук инсонлар билан қилинган суҳбат давомида Саъдулло туман ўрмон хўжалигининг Сиёб бўлими бошлиғи бўлганини эшитдим.

Соҳа энди ўзининг ҳақиқий эгасини топибди, деб кўнгилдан ўтказдим. Демак, тоғ ва адирлар бағрида янгидан-янги кўчатзорлар барпо этилиб, юртимизда боғ-роғлар янада кўпаяди. Боғ яратган киши эса умрини эзгуликка бахш этиб, номини абадиятга боғлаган саодатли инсондир.

 

Юнус УЗОҚОВ,

Ўзбекистонда хизмат кўрсатган журналист. 



DB query error.
Please try later.