01.03.2016

«DIPLOMAT MAGAZINE»

Ўзбекистоннинг ижтимоий-иқтисодий тараққиёти ҳақида

Ўзбекистон Республикаси ­Президенти Ислом Каримовнинг мамлакатимизни 2015 йилда ижтимоий-иқтисодий ривожлантириш якунлари ва 2016 йилга мўлжалланган иқтисодий дастурнинг энг муҳим устувор йўналишларига бағишланган Вазирлар Маҳкамасининг кенгайтирилган мажлисидаги маърузаси хорижий мамлакатлар оммавий ахборот воситаларида ҳам катта қизиқиш уйғотмоқда.

Нидерландия ва Бельгиядаги оммабоп нашрлардан бири ҳисобланадиган «Dip­lomat Magazine» журналида мамлакатимиз раҳбарининг маърузасида ўз ифодасини топган асосий жиҳатларга бағишланган мақола босилиб чиқди.

Унда қайд этилганидек, дунёнинг ривожланган демократик давлатлари қаторидан ўрин эгаллаш мақсадида мамлакатимизда амалга оширилаётган ўзгаришлар, кучли ижтимоий йўналтирилган иқтисодиётга асосланган сиё­сатнинг ҳаётга изчил татбиқ этилиши аҳолининг муносиб ҳаёт кечириш даражаси ва сифатини оширмоқда.

«Мамлакат эришган муваффақиятлар халқаро ҳамжамиятда кенг эътироф этилмоқда. Катта нуфузга эга бўлган Жаҳон иқтисодий форуми рейтингига кўра, Ўзбекистон 2014 — 2015 йиллардаги ривожланиш якунлари ва 2016 — 2017 йилларда иқтисодий ўсиш прогнозлари бўйича дунё­даги энг тез ривожланаётган бешта мамлакат қаторидан жой олди. Бундан ташқари, ўтган йили республика Бирлашган Миллатлар Ташкилотининг Озиқ-овқат ва қишлоқ хўжалиги ташкилоти (ФАО)га аъзо давлатларнинг озиқ-овқат хавфсизлигини таъминлаш соҳасида Минг­йиллик ривожланиш мақсадларига эришгани учун мукофотга сазовор бўлган 14 давлатдан бири сифатида эътироф этилди», деб ёзади нашр.

«2015 йили 15 миллиард 800 миллион АҚШ доллари миқдорида инвес­тициялар ўзлаштирилди. Уларнинг 3 миллиард 300 миллион доллардан зиёди хорижий инвестициялардир. Бу маблағнинг катта қисми янги ишлаб чиқариш қувватларини барпо этишга йўналтирилди ва натижада йирик ишлаб чиқариш объект­лари қурилишларини якунлаш ва фойдаланишга топшириш имконини берди».

 Шу билан бирга, мақолада Ўзбекистон қишлоқ хўжалигида рўй бераётган тизимли ўзгаришларга ҳам ­алоҳида эътибор қаратилган. «Республикада деҳқон ва фермерларнинг фидокорона меҳнати ва омилкорлиги туфайли қишлоқ хўжалиги маҳсулотларидан мўл ҳосил олинмоқда. Мева ва сабзавотчилик, боғдорчилик, чорвачилик жадал суръатларда ривожланмоқда», деб ёзади журнал.

«Diplomat Magazine» қайд этганидек, замонавий технологиялар асосида пахта толасини ва мева-сабзавот маҳсулотларини чуқур қайта ишлаш ташқи ва ички бозорда талаб юқори бўлган тайёр, экологик тоза тўқимачилик ва енгил саноат маҳсулотлари ишлаб чиқариш ҳажмини 2030 йилда 5,6 марта, мева-сабзавот маҳсулотларини қайта ишлаш ҳажмини эса 5,7 карра ошириш имконини беради.

Мақола якунида 2016 йил Ўзбекистонда Соғлом она ва бола йили, деб эълон қилингани қаламга олинган. Шу ўринда Ўзбекистоннинг ҳар йили ҳаётга татбиқ этадиган давлат дастурларидан муваффақиятли тажриба орттиргани эътироф этилар экан, жорий йилда ҳам оила, оналик ва болалик муҳофазаси тизимини мус­таҳкамлаш юзасидан улкан ишлар амалга оширилиши мўлжалланаётгани европалик ўқувчиларнинг эътиборига ҳавола қилинган.

 

«Жаҳон» АА,

Брюссель.



DB query error.
Please try later.