27.02.2016

БАҲОР СУРХОНДАН БОШЛАНАДИ

Оламда соғинчлар

Нақадар бисёр,

Ҳар бир соғинчнинг ҳам

Ўз ранг туси бор,

Ҳар йил «Ахборот»да

Бир хабар такрор,

Бодомлар гуллади...

Сурхонда баҳор.

 

Сирожиддин Саййид,

Ўзбекистон халқ шоири.

 

Юртимизга баҳор на­фаси кириб келди. Қаҳратон қиш ўз ўрнини фасллар келинчаги баҳорга бўшатиб берди.

Баҳор фаслларнинг энг гўзали, энг дилбари. Бунда жонбахш она ер уйғонади. Дарахтлар гуллайди, қушлар хониш қилади. Чамандай гулларда, сайроқи булбулларнинг навосида тириклик, ҳаёт давомийлиги мужассамлашган.

Табиат... Сўз билан ифодалаш мушкул бўлган сирли хилқат. Унинг ҳар бир япроғи, тоғ-тоши тилсим. Бағрида эса биз билган, билмаган не бир асрорлар яширинган.

Она замин соғинчи бутун қалбини забт этган бободеҳқон кетмонини елкасида кўтариб даласига ошиқмоқда. Унинг бу йилги марралари янада улкан.

Дарвоқе, мамлакатимиз деҳ­қонлари ўтган йили ҳам улкан хирмон кўтаришган эди. Улар 7 миллион 300 минг тонна ғалла, 3 миллион 350 минг тоннадан зиёд пахта, шунингдек, пиллачилик, чорвачилик, мева-сабзавот ва бошқа тармоқлар бўйича белгиланган режаларни ортиғи билан уддалашди.

Президентимизнинг Ўзбекистон деҳқонлари ва фермерлари, барча меҳнаткашларига йўллаган табригида Қумқўрғон туманидаги ­«Сао­дат» фермер хўжалиги ҳам алоҳида эътироф этилган эди. Бундан руҳланган фермер хўжалиги аъзоларининг жорий йилдаги режалари янада юксак.

— Давлатимиз раҳбарининг дунёда ўзбек деҳқонига тенг келадиган заҳматкаш ва миришкор инсонларни топишнинг ўзи қийин ва бу ҳақиқатни сиз, азизларнинг бу йилги беқиёс ютуқларингиз яна бир бор исботлаб турибди. Том маънодаги жасорат ва қаҳрамонлик намунаси бўлган олижаноб меҳнатингиз учун ўз номимдан, хал­қимиз номидан чуқур миннатдорлик билдириб, чин қалбимдан таъзим қиламан... деган сўзларини ўқиб, кў­зим­га ёш келди, — дейди бойсунлик фермер Жўрақул ­Назаров. — Очиғи, у кишининг оддий деҳқонларга бунчалик ҳурмат-­эътибор кўрсатиши, меҳнатимизни эъзозлаши кўнглимизни кўтарди. Мен қарийб 22 гектар ерда деҳқончилик қиламан. Ўтган йилнинг кеч кузидан эътиборан синовлардан ўтган, харидоргир «Ботиркишмиш» узум навини кўпайтиришга киришдим. Бу йил янада катта марраларни кўзлаяпмиз. Баҳор бизнинг Сурхонда эрта келади. Биз баҳор юмушларини бошлаб юбордик.

Ҳа, Сурхонда баҳор бошланди. Эндигина гуллаётган мевали дарахтларнинг хуш­бўй ҳидини, барра ўтларнинг ширин тотини олиб яна баҳор келди. Президентимиз томонидан Соғлом она ва бола йили деб эълон қилинган умидбахш йилнинг баҳори янада қутлуғ, янада файзли келишига ишонаман.

Қорли тоғлар бағридаги Бойсунга ҳам баҳор келди. Бодом қийғос гулга кирди. Зеро, шоир айтганидек:

Бу тонг Бойсундаги

тоғларни эниб,

Бир ел бир севинчни

етказди келиб,

Кеч пайт «Ахборот» да

шу бўлди такрор,

Сурхонда бодомлар

гуллади, баҳор...

 

Абди ҚОДИРОВ,

«Ўзбекистон овози» мухбири.



DB query error.
Please try later.