25.02.2016

«АЁЛЛАР СОҒЛИҒИ – ЖАМИЯТ БОЙЛИГИ»

ЎзХДП Марказий Кенгаши Хотин-қизларнинг ижтимоий-сиёсий фаоллигини ошириш сектори янги ло­­й­иҳа ташаббускори бўлди.

Ўзбекистон ХДП Сайловолди дастурида биринчи тиббий ёрдамдан қулай ва тезкор фойдаланишни таъминловчи қишлоқ врачлик пунктлари, айниқса, олис қишлоқлар аҳолиси учун ҚВП тармоғини кенгайтириш, жисмоний имконияти чекланган кишилар ва бошқа айрим тоифаларга имтиёзли асосда бериладиган дори воситалари ва тиббий жиҳозлар рўйхатини кенгайтириш масалаларига алоҳида эътибор қаратилиб, бу борада қатор вазифалар белгиланган.

Шундан келиб чиқиб, соғлом болани вояга етказиш учун оилада хотин-қизларнинг масъулиятини кучайтириш, соғлом муҳитни шакллантириш, оналар ва болаларга тиббий хизмат кўрсатиш сифатини яхшилашга кўмаклашиш ҳамда партия дастурий мақсад ва ғояларини тарғиб қилиш мақсадида «Аёллар соғлиғи – жамият бойлиги» лойиҳаси ишлаб чиқилди.

Сектор мудири Гулшан Асатова билан лойиҳанинг мақсади, уни ўтказиш тартиби, кутилаётган натижалар тўғрисида суҳбатлашдик.

— Лойиҳада хотин-қизларнинг ижтимоий-сиёсий фаоллиги, ҳуқуқий, тиббий маданиятини ошириш, оналар ва болаларга кўрсатилаётган тиббий хизмат ҳамда улар учун яратилаётган имтиёз ва имкониятлардан фойдаланиш даражасини ўрганиш ва мониторинг қилиш назарда тутилган, — дейди у. — Бу орқали аниқланган муаммоларни бартараф этиш чораларини кўриш, зарур бўлган тақдирда уларни маҳаллий Кенгаш сессиялари кун тартибига киритишни режалаштирдик.

Шунингдек, долзарб масалалар бўйича Олий Мажлис Қонунчилик палатасидаги фракциямизга таклифлар киритиш, қонунчиликни такомиллаштиришда ЎзХДП «Фаол аёллар» қанотининг амалий иштирокини янада кучайтиришни мақсад қилдик.

— Лойиҳа қандай тартибда амалга оширилади?

— Лойиҳа туман, шаҳар партия кенгашлари томонидан март ойидан бошлаб ҳар ойда бир марта ўтказилади. 7 кишидан иборат ишчи гуруҳи тузилиб, Марказий Кенгаш томонидан тавсия этилган режа асосида ишлар олиб боради. Ишчи гуруҳига туман, шаҳар кенгаши раиси раҳбарлик қилади.

— Ишчи гуруҳининг вазифаси нималардан иборат бўлади?

— Ишчи гуруҳи уч босқичда иш олиб боради. Дастлаб, танланган ҳудудда қишлоқ врачлик пунктлари саволнома асосида ўрганилади. Оналар ва болаларга тиббий хизмат кўрсатиш сифатини яхшилаш борасида олиб борилаётган ишлар жамоатчилик ва депутатлик назорати тартибида таҳлил этилади. Аҳоли, айниқса, оналар ва болалар, мактаб ва мактабгача таълим муассасаларида тиббий хизмат кўрсатиш сифати, тиббиёт муассасасининг моддий-техник базаси, кадрлар билан таъминланганлик даражаси ўрганилиб, аниқланган камчиликлар юзасидан партия гуруҳларига таклифлар берилади.

Сўнг, маҳаллалардаги хотин-қизлар ўртасида сўровномалар ўтказилади, давра суҳбатлари, учрашувлар ташкил этилади.

Шунингдек, лойиҳа доирасида соғ­лиқни сақлаш тизими, «Соғлом авлод учун» халқаро хайрия жамғармаси, «Маҳалла» хайрия жамоат фонди билан ҳамкорликда тиббий акциялар ташкил этилади, касаллиги аниқланган аёллар ҳамда болаларга даволаниш учун тавсия ва йўлланмалар берилади.

Ойнинг иккинчи ярмида таклифлар ва ҳисоботлар тайёрланиб, белгиланган тартибда вилоят партия кенгаши томонидан Марказий Кенгашга тақдим этилади.

— Лойиҳа доирасидаги тадбирлардан қандай натижалар кутиляпти?

— «Соғлом она ва бола йили» Давлат дастури ижросини таъминлашга ҳар биримиз ўз ҳиссамизни қўшишимиз керак. Лойиҳа ана шу мақсадда ташкил қилинди. Шу орқали оналар ҳамда болаларга тиббий хизмат кўрсатиш сифатини яхшилаш борасида олиб борилаётган ишлар устидан жамоатчилик ҳамда депутатлик назорати ўрнатилади, партия электоратига тиббий хизмат кўрсатиш сифати янада яхшиланади, уларнинг саломатлиги мустаҳкамланади.

Ижтимоий ҳимояга эҳтиёжманд оилалардаги болалар ва аёлларни бепул тиббий кўрикдан ўтказиш, имтиёзлардан фойдаланиш ҳуқуқларини тушунтириш орқали партия электорати манфаатини ҳимоя қилишни кўзда тутганмиз.

Лойиҳанинг яна бир аҳамиятли томони шундаки, мониторинг натижалари асосида аниқланган камчиликларни бартараф этиш ишларига халқ депутатлари маҳаллий Кенгашларидаги партия гуруҳларини жалб қилмоқчимиз. Аҳолини ўйлантираётган масалаларни доимий комиссия ва сессия кун тартибига киритсак, кўплаб муаммоларга ечим топилади, мутасадди ташкилотларнинг масъулияти янада ошади, деб ўйлайман.

 

«Ўзбекистон овози» мухбири

Гулруҳ ОДАШБОЕВА

суҳбатлашди.



DB query error.
Please try later.