25.02.2016

СОЛИҚ: ИМТИЁЗ ВА ИМКОНИЯТ

Тошкент вилояти давлат солиқ бошқармаси томонидан ўтказилган матбуот анжуманида кейинги йилларда солиқ қонунчилигига киритилган ўзгартиш ва қўшимчалар ҳақида маълумот берилди. Қайд этилдики, аҳолининг реал даромадларини ошириш мақсадида қатор солиқ ва мажбурий тўловларнинг ставкалари пасайтирилди, шунингдек, қонун ҳужжатларига асосан берилган имтиёзлар муддати узайтирилди.

Хусусан, микрофирмалар ва кичик корхоналар учун ягона солиқ тўлови ставкаси 2015 йилдаги 6 фоиздан 1 фоизли пунк­тга пасайтирилиб, 5 фоиз қилиб белгиланди. Шунингдек, божхона расмийлаштируви бўйича хизматлар кўрсатувчи юридик шахслар (божхона брокерлари) учун ягона солиқ тўлови ставкаси ҳам 1 фоизли пунктга пасайтирилиб, 5 фоиз бўлди. Эътироф этиш жоизки, ягона солиқ тўлови ставкасининг камайиши ҳисобига ушбу микрофирмалар ва кичик корхоналар ихтиёрида жорий йилда 58,4 миллиард сўм маблағ қолиши кутилмоқда.

2016 йилдан бошлаб мобиль алоқа хизматларини кўрсатувчи юридик шахслар (уяли алоқа компаниялари) учун фойда солиғини рентабеллик даражасидан келиб чиқиб тўлаш, яъни рентабеллик даражаси 20 фоизгача бўлганда — 7,5 фоиз ставкада, рентабеллик даражаси 20 фоиздан юқори бўлганда фойда суммасига — 50 фоиз ставкада солиқ тўлаш белгиланди.

Ноозиқ-овқат истеъмол товарлари ишлаб чиқаришга ихтисослашган корхоналар учун фойда солиғи, мол-мулк солиғи ва микрофирмалар ҳамда кичик корхоналар учун ягона солиқ тўлови ҳамда Республика йўл жамғармасига мажбурий ажратмалар тўлашдан озод этиш тарзидаги имтиёзларнинг муддати 2018 йилнинг 1 январига қадар узайтирилди.

Бундан ташқари, тўқимачилик саноати корхоналари учун мол-мулк солиғи тўлашдан озод этиш бўйича берилган имтиёзнинг муддати ҳам 2018 йилнинг 1 январига қадар узайтирилди.

Қонунчиликка киритилган ўзгартиришларга мувофиқ, автомобиль транспорти соҳасида фаолият юритувчи кичик корхоналар ходимлари сонини 25 нафардан 50 нафаргача оширган ҳолда кичик бизнес субъект­ларига яратилган имтиёз ва енгилликлардан фойдаланиш ҳуқуқи берилди.

Кирим қилинмаган товарлар учун қўлланиладиган молиявий жарима 2016 йил 1 январдан бошлаб, ушбу кирим қи­линмаган товарлар суммасининг 100 фоизи ўрнига 20 фоиз миқдорида ундирилиши белгиланди, яъни 5 баробарга камайтирилди.

Матбуот анжумани якунида журналист­лар саволларига мутасадди ходимлар томонидан батафсил жавоб қайтарилди.

 

Равшан ШОДИЕВ,

«Ўзбекистон овози» мухбири.



DB query error.
Please try later.