Охирги сонда



Кўп ўқилган мақолалар



Долзарб мавзу



Мақолалар архиви

«    Dekabr 2018   
Du Se Cho Pa Ju Sha Ya
26 27 28 29 30 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31 1 2 3 4 5 6
23.02.2016

СОҒЛОМ БОЛАНИ СОҒЛОМ ОНА ДУНЁГА КЕЛТИРАДИ

Касбим шифокор бўлгани учун оиланинг сиҳат-саломатлиги, бахту иқболи, тинчлик-хотиржамлиги аввало онага боғлиқлигини яхши тушунаман. Она соғ­лом бўлса, фарзандлар соғлом, оила бахт­ли бўлади.

Мамлакатимизда соғлом авлодни тарбиялашга қаратилаётган доимий эътибор, оналар саломатлигини сақлашга оид эзгу ишлар халқимиз қалбидан чуқур жой олган. Бу борадаги давлат сиёсати ­«Соғлом она — соғлом бола» концепциясини ҳаётга чуқур татбиқ этишда муҳим аҳамият касб этмоқда.

Президентимиз Ислом Каримов томонидан 2016 йилнинг мамлакатимизда Соғлом она ва бола йили деб эълон қилиниши ҳамда мазкур йилдан кўзланган олижаноб вазифаларни амалга ошириш мақсадида жорий йил 9 февраль куни тасдиқланган ­«Соғлом она ва бола йили» Давлат дастури бугун умуммиллий ҳаракатга айланган ушбу ислоҳотларни янги босқичга кўтаришга хизмат қилади.

Дастурда «Она ва бола соғлом бўлса, оила бахт­ли, оила бахтли бўлса, жамият мустаҳкам бўлади» деган ҳаётбахш қадриятни қарор топтиришга йўналтирилган, оила, оналик ва болаликни муҳофаза қилиш, жамиятда аёлларга ҳурмат-эҳтиром муҳитини янада мустаҳкамлаш, баркамол авлодни тарбиялашда давлат ҳокимияти органлари ва жамоат ташкилотларининг ҳамкорлигини кучайтиришга қаратилган комплекс чора-тадбирларни изчил давом эттириш кўзда тутилган.

Мазкур вазифаларни ҳаётга татбиқ этишда аввало қизларимиз, бўлғуси оналар саломатлигига эътибор қаратиш, уларнинг таълим-тарбия олиши, касб-ҳунар эгаллаши, спорт билан шуғулланиши, бир сўз билан айтганда, ҳаётга тайёр бўлиши муҳим ўрин тутади.

Мамлакатимизда қизларни жисмонан соғлом, интеллектуал салоҳиятли этиб тарбиялаш, уларнинг замонавий билим ва касб-ҳунарга эга бўлишини таъминлаш, мустаҳкам ҳаётий позиция ва мустақил фикрлаш қобилиятини ривожлантириш йўлида кенг кўламли ишлар амалга оширилмоқда. Бундай саъй-ҳаракатлар самараси қизларимизнинг ҳаётда муносиб ўрин топиши, соғлом ва мустаҳкам оилалар барпо бўлишида намоён бўлмоқда.

Бугунги қизларнинг соғлиғи, фикрлаши, интилишлари 20-25 йил олдинги тенгдошлариникидан бутунлай фарқ қилади. Улар қобилияти, ҳаракатлари ва ютуқлари билан ҳаммани ҳайрон қолдирмоқда.

Коллежимизда тиббиёт ҳамшираси, даволаш иши ва фельдшерлик, фармацевт ассистенти, тиббий-профилактика иши, тиббий лаборатория иши йўналишларида 1420 ўқувчи, жумладан, 1074 нафар қиз таълим олаётир. Уларга 68 нафар педагог билим ва мутахассислик сирларини ўргатмоқда.

Ўқитувчиларимиз таълим жараёнида қизларга тиббий билимлар билан бирга, соғлом турмуш тарзи, оила қуришга тайёргарлик, она бўлиш масъулияти юзасидан мунтазам тушунтириш ишлари олиб боради. Ушбу машғулотлар давомида эрта турмуш, қариндошлар ўртасидаги никоҳнинг салбий оқибатлари хусусида етарли билимга эга бўлган қизларимиз туманимиз бўйлаб тарғибот ишларини олиб боришда ҳам фаол иштирок этмоқда.

Баъзи ота-оналарда ўз қизига, унинг келажагига нисбатан нотўғри қарашлар мавжудлигига гувоҳ бўламиз. Бундайлар қизларининг касб эгаллашига бефарқ қараб, уларни тезроқ турмушга беришга ҳаракат қилади. Ана шундай салбий муносабат таъсирида кўпчилик қизларнинг орзулари амалга ошмай қолиб кетар эди. У бирор соҳанинг бошини тутиши, оила қуришга жисмонан тайёр бўлиши шарт. Бу ҳақиқатни унутган, тан олмаган одам ўз фарзандига ёмонлик қилган бўлади.

Жорий йилда оналар ва болалар саломатлигини мустаҳкамлашга қаратилган бир қатор тиббиёт муассасалари ишга туширилиши кўзда тутилган. Шундан келиб чиққан ҳолда, уларни малакали ўрта тиббиёт ходимлари билан таъминлаш зиммамиздаги муҳим вазифадир. Умуман, қабул қилинган Давлат дастури ижросида барча бирдек фаол иштирок этиши талаб этилади.

Президентимиз ташаббуси билан «Соғлом она ва бола йили» Давлат дастурининг тасдиқланиши ва ҳаётга кенг жорий этилиши бу борадаги ишлар кўламини янада кенгайтириши ва самарадорлигини ошириши шубҳасиз.

 

Абдутолиб АБДУФАТТОЕВ,

Жиззах вилоятидаги Дўстлик тиббиёт коллежи директори.



DB query error.
Please try later.