20.02.2016

ЗАМОН ЎЗГАРДИ, ТАЛАБ КУЧАЙДИ

Бундай шароитда партия фаоллари, депутатлар чуқур билимга эга бўлиши, чинакам фидойилик кўрсатиши керак

Партиямиз Қашқадарё вилоят кенгаши ахборот-маърифат хонасида ўқув семинар бўлиб ўтди. Партия фаоллари, депутатлар, маърифатчилар иштирокидаги тадбир машғулот тарзида «Мамлакатни демократик янгилаш шароитида фуқаролик жамияти институтларининг ҳолати ва ривожланиш истиқболлари. Сиёсий тизимлар ва сиёсий партиялар келиб чиқишининг тарихий, ҳуқуқий илдизлари. Миллий ва хорижий тажриба» мавзусида ўтказилди.

Бош маърузачи фуқаролик жамияти шаклланишини мониторинг қилиш мустақил институти ҳудудий бўлинмаси гуруҳ раҳбари Носир Ҳалимов бир неча йил давомида турли тадбирларда иштирок этиб келяпти. Ташкилотчилиги, ташаббускорлиги туфайли у ўтган сайловда ЎзХДПдан Қарши туман Кенгаши депутатлигига сайланди.

Очиғи, мавзу кенг, катта тайёргарликни талаб қиларди. Нотиқ бунинг уддасидан чиққан. Дастлаб, мамлакатимизда 5 мингдан ортиқ, вилоятда 661 нодавлат нотижорат ташкилотлар борлигини қайд этди. Шунингдек, юртимизда 10 мингга яқин фуқароларнинг ўзини ўзи бошқариш органлари фаолият кўрсатаётганини, буларнинг ҳаммаси демократик жараёнларни тезлаштиришда муҳим аҳамият касб этишини таъкидлади.

Нотиқ «Ўзбекистон Республикасида жамоат бирлашмалари тўғрисида»ги, «Нодавлат нотижорат таш­килотлари тўғрисида»ги ва бошқа қонунларни кенг шарҳ­лаб берди. «Ижтимоий шериклик тўғрисида»ги қо­нуннинг қабул қилиниши ҳам катта воқеа бўлганини қайд этди. Ижтимоий шериклик давлат ҳокимияти органлари, фуқаролик жамияти инс­титутлари, шунингдек, тадбиркорлик фаолияти субъ­ект­ларининг ўзаро келишилган ижтимоий-иқтисодий сиё­сатни амалга ошириши ҳа­қида тўхталди. Имтиёзлар борасида ҳам фикр юритилди. 2014 йилнинг январидан бошлаб ННТни давлат рўйхатидан ўтказиш учун тўланадиган давлат божи 5 мартага, уларнинг рамзларини рўйхатга олиш тўловлари 2,5 баробарга қисқартирилди ва бошқа имтиёзлар яратилди.

Нотиқ вилоятдаги партия ташкилотлари, жумладан, депутатлар олдида турган вазифалар, ҳуқуқ-бурчларига тўхталди ва қатор таклифларни илгари сурди. Хусусан, партия гуруҳлари ўз­ларининг йиллик режа дастурини ишлаб чиқиш, вилоят ҳокимлиги веб-сайтида улар фаолиятини ёритиб бориш масаласига урғу берди. Шунингдек, турли лойиҳалар тайёрлаш, сес­сия­ларга киритилаётган масалани аввал партия гуруҳлари, доимий комиссия йиғилишларида кўриб чиқиш кераклиги айтилди. Йилига икки марта вилоят ҳамда туман партия гуруҳлари қўшма йиғилишларини ўтказиш ва бошқа масалалар бўйича зарур таклифларни ифода этди.

Вилоят партия кенгаши раиси ўринбосари Музаффар Туропов ўз сўзида мавзуни тўлдирди, кенгайтирди. Айниқса, сиёсий партияларнинг ҳуқуқий асослари, сайловларда иштироки, Ҳаракат дастурини ижро этиш борасидаги фаолияти, уларни молия­лаштириш, бошқа имконият ва вазифаларини очиб беришга эътибор қаратди. Партиялараро сиёсий рақобат, бу борада ЎзХДПнинг устувор вазифаларига тўхталди.

Қайд этилишича, вилоятда 15 ахборот-маърифат хонаси мавжуд бўлиб, 2000 га яқин турли мавзудаги адабиётлар, қўлланма, матбуот нашрларидан фойдаланилмоқда. Маърузачилар сиёсий ва фуқаролик маърифати тизимидаги вазифалар, керакли тавсияларни ҳам айтиб ўтишди.

Семинарда сўзга чиққан вилоят партия кенгаши мафкуравий ва тарғибот-ташвиқот ишлар бўлими бошлиғи Шаҳло Худойқулова «Аёллар соғлиғи — жамият бойлиги» лойиҳасини амалга ошириш юзасидан ўз таклифини билдирди. Жамоат ташкилотлари, «Фаол аёллар» қанотига таяниш самаралари бўйича фикр юритди.

— Семинарда жамоат ташкилотлари билан ҳамкорлик, партиямизнинг устувор мақсад-вазифалари ҳақидаги фикрларни эшитар эканман, имкониятларимизни кўз олдимга келтирдим, — дейди ЎзХДП Касби туман кенгаши раиси ­Султон Ҳамроев. — Айни пайт­да туманда 46 бошланғич ташкилот 2277 нафар аъзони бирлаштирган. Туман кенгашининг 28 депутатидан 13 нафари партиямиздан сайланган. Аммо олдинги сайловда депутатларнинг 18 нафари Ўз­ХДПдан бўлганини ҳам эсдан чиқармаймиз. Демак, бошқа партиялар фаолияти ҳам кучайиб бормоқда. Хатолардан кўз юммаслик керак. Биз ҳозир қишлоқ хўжалиги тараққиётига оид масалани тайёрлаяпмиз, насиб этса, апрель ойида уни сессия муҳокамасига киритамиз.

— Семинарда муҳим назарий масалалар ҳақида фикр юритилди, — дейди халқ депутатлари вилоят Кенгашидаги ЎзХДП гуруҳи аъзоси Саломат ­Комилова. — Фуқаролик институт­лари, сиёсий пар­тияларнинг ­фао­лияти жаҳон мамлакатларидаги тажриба ва бош­қа мавзулар жуда муҳим. Чунки ўқиб, ўрганмаган одам замон билан ҳамнафас бўлолмайди. Депутат сифатида фаол ҳаракат тарафдориман.

— Семинардан олган таассуротларим бир талай, — деди Чироқчи туман партия кенгаши раиси Қўчқор Ғаниев. — Туманда уларни қандай амалга ошириш ҳақида ўйладим. Чироқчи аҳолиси 400 мингга етиб қолган. Қишлоқлар тарқоқ жойлашган. Аммо шароитдан келиб чиқиб, депутатларимизни «Соғлом она ва бола йили» Давлат дастурини амалга оширишга сафарбар этамиз. Масалан, қиш­лоқ врачлик пунктлари қандай ишлаётгани ўрганилмоқда. Нима демоқчиман, ишлайман, ҳаракат қиламан, деган депутат ташаббус кўрсатиши учун керакли имкониятга эга. Биз ундан одамлар манфаати ҳимояси йўлида фойдаланишимиз, керак пайтда, қатъийлик ҳам кўрсатишимиз керак.

 

Юнус УЗОҚОВ,

«Ўзбекистон овози» мухбири.



DB query error.
Please try later.