18.02.2016

КЕЧАГИ ТУШУНЧА, ДУНЁҚАРАШ БИЛАН

ишлашга ҳаққимиз йўқ

Ўзбекистон ХДП Тошкент шаҳар кенгаши Ижроия қўмитасининг кенгайтирилган йиғилиши бўлиб ўтди. Унда электорат манфаатларини ҳимоя этиш, партия таш­килотлари ва гуруҳлари фаоллигини ошириш масалалари атрофлича муҳокама этилди.

Хусусан, шаҳар партия кенгаши раиси Ҳайдар Бобохонов партия ташкилотлари олдида турган устувор вазифалар ҳақида сўз юритди.

— Аҳолини иш билан таъминлаш, касб-ҳунар коллежлари ва олий ўқув юртлари битирувчиларини мутахассислиги бўйича ишга жойлаштириш бугунги куннинг энг долзарб масалаларидан биридир, — деди у. — Бу масалага партиямиз Сайловолди дас­турида ҳам алоҳида эътибор қаратилган. Шундай экан, партиямиз ташкилотлари ва депутатлик бирлашмалари бандлик дас­тури ижроси устидан жамоатчилик ва депутатлик назоратини кучайтириши талаб этилади.

Биз, айниқса, битирувчиларни ўз мутахассислиги бўйича ишга жойлаштириш, катта-кичик корхоналарда иш бошлаган ёш мутахассисларни қўллаб-қувватлаш чораларини кўришимиз зарур.

Жорий йилда аҳоли саломатлигини мустаҳкамлаш, оналик ва болаликни муҳофаза қилиш масаласи ҳам алоҳида эътиборимизда бўлади. Тарғибот тадбирларида мамлакатимизда аҳоли саломатлигини сақлаш йўлида олиб борилаётган ишлар, эришилаётган ютуқлар, мазкур соҳага доир меъёрий-ҳуқуқий ҳужжатлар хусусида батафсил маълумотлар берилади.

Шаҳар Кенгашидаги пар­тиямиз гуруҳи қонунлар ва давлат қарорлари бажарилиши устидан депутатлик назоратини изчил давом эттиради. Шунингдек, маҳаллий давлат ҳокимияти мансабдор шахсларининг муҳим ижтимоий масалалар бўйича ҳисоботларини эшитиш режалаштирилган.

Йиғилишда партия ташкилотининг 2015 йилдаги фаолияти натижалари аниқ факт ва рақамлар асосида атрофлича таҳлил қилинди.

— Ўтган йили электорат манфаатлари билан боғлиқ 11 масала партия гуруҳи, 2 масала тегишли доимий комиссия йиғилишлари ва шаҳар Кенгаши сессиясида муҳокама этилди, — дейди Тошкент шаҳар партия кен­гаши раиси ўринбосари­ ­Шоҳруҳ ­Абдураҳмонов. — Партия гуруҳимиз аъзолари томонидан электорат вакиллари мурожаатлари асосида мутасадди ташкилот ва корхоналар раҳбарларига 84 депутатлик сўрови юборилди. Шундан 71 сўровга ўз вақтида ижобий жавоб олинди.

Шаҳар, туманлар ва «Ёш­лик» талабалар шаҳарчаси кенгашлари қошида фаолият юритаётган ­Жамоатчилик қабулхоналарига йил давомида 400 дан ортиқ мурожаат тушган. Кўтарилган масалаларнинг 70 фоизи ижобий ечим топди. Қолган мурожаатлар бўйича ҳуқуқий маслаҳатлар берилган.

Тан олиш керак, ҳисобот даврида ютуқлар билан бирга, камчиликларга ҳам йўл қўйилди. Имкониятлардан етарли даражада фойдаланмаслик ҳолатлари бўлди. Бунинг оқибатида жойларда аҳолини ўйлантираётган айрим ­масалалар ечилмасдан қолди. Ҳар биримиз бундан тўғри хулоса чиқаришимиз зарур, деб ўйлайман.

— Бугунги кунда пойтахтимизда партиямизнинг 1086 бошланғич ташкилоти фаолият юритмоқда, — дейди Тошкент шаҳар партия кенгаши сектор мудири Ихтиёр Салаев. — Уларга 36 минг нафардан ортиқ аъзо бирлашган. Бу катта куч, кенг имконият дегани. Шунинг учун бошланғич ташкилотлар фаолиятини янада жонлантириш йўлларини излашимиз, электорат вакилларини ўйлантираётган масалалар бўйича аъзоларимиздан кўпроқ таклифлар олишимиз керак.

Шу мақсадда ўтган йили қуйи бўғинларда қатор ўқув-семинарлар ташкил этилди. Бошлан­ғич партия ташкилотларида иш юритиш, ҳужжатлар билан ишлаш тартиби, тар­ғибот воситаларидан фойдаланиш, етакчиларнинг касб маҳоратини ошириш масалаларига ҳам алоҳида эътибор қаратилди. Шу билан бирга, аъзолардан қуйи бўғин фаолиятини кучайтириш, аҳо­лини ўйлантираётган масалалар ечими бўйича кўплаб таклифлар олинди. Бундан хулоса қилиш мумкинки, партия ташкилотлари, депутатлар ва бошлан­ғич ташкилотлар ҳамкорлигини янада кучайтириш ишимиз самарадорлигини оширишга хизмат қилади.

Йиғилишда сўз олганлар бугун сиёсий партия фаоли, депутат кечаги тушунча, кечаги дунёқараш билан ишлашга ҳаққи йўқлигини, сайловчилар улардан аниқ натижалар, амалий ишлар кутаётганини таъкидлашди. Партиямиз Сайловолди дастури ижросига муносиб ҳисса қўшиш, одамлар ишончини оқлаш зарурлигига эътибор қаратишди.

Партия ташкилотлари фаолиятига танқидий баҳо берилди. Таклиф ва мулоҳазалар асосида тегишли қарорлар қабул қилинди.

 

Гулруҳ ОДАШБОЕВА,

«Ўзбекистон овози» мухбири.



DB query error.
Please try later.