Охирги сонда



Кўп ўқилган мақолалар



Долзарб мавзу



Мақолалар архиви

«    Aprel 2019   
Du Se Cho Pa Ju Sha Ya
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 1 2 3 4 5
16.02.2016

БОЛАЛАР СПОРТИ — СОҒЛОМ КЕЛАЖАК ДЕМАКДИР

Президентимиз Ислом Каримов раислигида Ўзбекистон Болалар спортини ривожлантириш жамғармаси Ҳомийлик кенгашининг навбатдаги йиғилиши ҳақидаги кўрсатувни телевидение орқали кўрдим, газетадан ўқидим.

Тўғрисини айтсам, унда билдирилган фикр-мулоҳазалар мени тўлқинлантириб юборди. Ўтган қисқа давр, яъни, 14 йил ичида Болалар спортини ривожлантириш жамғармаси ўз олдига қўйган мақсад-муддаоларига тўла маънода эришди, дейишга бугун етарли асосимиз бор.

Йиғилишда таъкидланганидек, биргина 2015 йилда 1 минг 668 нафар спортчимиз 165 халқаро мусобақада иштирок этиб, 983 медални қўлга киритган.

Бу айтишга осон. Агарда Юртбошимиз томонидан болалар спортига ўз вақтида эътибор қаратилмаганда эди, бу иш учун миллиардлаб маблағ сарф­ланмаганда эди, бугун бу ғалабалар, юксак натижалар тушимизга ҳам кирмасди.

Хусусан, қишлоқ жойларда болаларни спортга жалб этиш, улар учун жаҳон талабларига жавоб берадиган муҳташам спорт саройлари қуриш борасида Ўзбекистонда йўлга қўйилган тизимга, тўпланган тажрибага бугун дунё ҳавас қилмоқда. Керак бўлса, биздан ўрганмоқда.

Йиғилишда қайд этилган бир маълумот эътиборимни ўзига тортди. 2015 йилда қиз болаларнинг спорт билан шуғулланиши бизнинг Самар­қанд вилоятида 47,4 фоизни ташкил этган. Бу эса бошқа ҳудудларга қараганда юқори кўрсаткичдир.

Келинг, шу ўринда ўзимнинг кўз ўнгимда юз берган бир ҳолатни таҳлил қилиб кўрайлик. Бир пайтлар, яъни мустабид тузум даврида мен ўқиган Каттақўрғон туманидаги 17-умумтаълим мактабида икки нафар, ўша пайтлардаги техникумни тугатган жисмоний тарбия ўқитувчиси бўлар эди. Бугун эса беш нафар олий маълумотли жисмоний тарбия ўқитувчиси фаолият кўрсатмоқда. Таққослаб кўрганда ер билан осмонча фарқи бор, албатта. Ёш, интилувчан, изланувчан ўқитувчиларимиз томонидан бадиий гимнастика, кураш, волейбол, футбол тўгараклари ташкил этилган.

Ўтган йили Шодиёр Нарзуллаев, Комилжон ­Фозилов, Бекзод Турдимуродов, Аҳрор Бердиев, ­Фарҳод Чиндалиев каби ўқитувчи-мураббийларимиз сафига Ўзбекистон давлат жисмоний тарбия институтини бадиий гимнастика йўналиши бўйича битирган Ирода Эргашева келиб қўшилди. Шундан сўнг мактабимизда бадиий гимнастика тўгараги ташкил қилинди. Бугунги кунда унда 100 нафарга яқин қиз шуғулланмоқда.

Мактабимиз полвонлари эришаётган ютуқлар ҳам кишини қувонтиради. Эркин кураш бўйича ўтказилган вилоят чемпионатида Жавлон Мухторов иккинчи, Асадбек Хайруллаев учинчи ўринни эгаллади. «Умид ниҳоллари» спорт ўйинларининг туман бос­қичида муваффақиятли иштирок этган Фарид ­Аҳмедов ва Саид Лутфуллаев ўз вазн тоифасида биринчи ўринни эгаллаб, вилоятга йўлланма олишди.

Шу ўринда яна бир гап. Ота-оналар мактабга келиб, болаларини спорт билан шуғулланаётганини ўз кўзлари билан кўрмоқда. Улар билан ўқитувчилар ўртасида доимий алоқа ўрнатилган. Бу эса ҳаётимиз ўзгараётганини, онгимиз, дунёқарашимиз тобора юксалаётганини, болаларимиз соғлиғига, келажагига бефарқ эмаслигимизни кўрсатади.

Президентимиз томонидан йиғилишда билдирилган фикр-мулоҳазаларни атрофлича муҳокама қилдик. Режаларимиз ҳақида Каттақўрғон туман халқ таълими муассасалари фаолиятини методик таъминлаш ва ташкил этиш бўлими раҳбари ­Алишер ­Жуманазаров билан маслаҳатлашдик.

Бизнинг фикримизча, ҳар бир мактаб ўзининг анъанавий — спорт мусобақаларига эга бўлиши керак. Катта спортга йўл айнан мактаблардан бошланади.

Энг муҳими, мактабда орттирилган кўникма туфайли фарзандларимиз спорт билан бир умр ошно бўлиб қолади. Бу эса, соғлом турмуш тарзи, ­соғлом авлод демакдир.

 

Ҳақиқат ҲАМРОЕВА,

Каттақўрғон туманидаги 17-умумтаълим мактаби директори, ЎзХДП аъзоси.



DB query error.
Please try later.