16.02.2016

ЛИЦЕНЗИЯСИЗ ТРАНСПОРТ ХИЗМАТИ КЎРСАТИШ

тақиқланади

Тошкент шаҳар ҳокимлигида йўловчи ташиш билан ноқонуний равишда шуғулланаётган фуқаролар фаолиятига чек қўйиш ҳамда йўл-транспорт ҳодисаларини олдини олиш, фуқаролар хавфсизлигини таъминлаш масаласига бағишланган брифинг ташкил этилди. Унда таъкидланганидек бугунги кунда пойтахтимизда йўловчиларнинг узоғини яқин қилиш ва уларни манзилига ўз вақтида хавфсиз етиб боришини таъминлаш мақсадида бир қатор ижобий ишлар қилинмоқда.

2016 йилнинг 13 февраль ҳолатига кўра, Тошкент шаҳрида жами 304 корхона аҳолига транспорт хизмати кўрсатмоқда. 103 корхонага 262 йўловчи ташиш йўналишлари бириктирилган. Шунингдек, 16 корхонада 1169 жадвал асосида 139 автобус, 86 корхонада 993 жадвал асосида 117 йўналишли такси ва 1 корхонада 49 жадвал асосида 6 трамвай ҳамда 213 йўналишсиз такси корхоналарида 2792 автомобиль йўловчиларни ўз манзилига етказмоқда.

Лекин шунга қарамай йў­ловчи ташиш фаолияти билан ноқонуний шуғулланаётган фуқароларимиз ҳам бор. Тошкент шаҳар ҳокими томонидан 2016 йил 13 январда тасдиқланган чора-тадбирлар режасига асосан бир қатор тегишли ташкилотлар ходимлари томонидан йўловчи ташиш йўналишларида лицензиясиз фаолият кўрсатаётган ташувчилар бўйича рейдлар ўтказиб келинмоқда.

2016 йилнинг 10 февраль ҳолатига кўра, ўтказилган 310 рейд давомида 9200 автотранспорт воситалари кўздан кечирилганда, жами 1850 қоидабузарлик ва камчиликларга йўл қўйилганлиги аниқланган.

— Йўл ҳаракати хавфсизлиги бошқармаси ходимлари томонидан қоидабузарлик бўйича жами 18651 баённома тузилди, — дейди Тошкент шаҳар ички ишлар бош бошқармаси йўл ҳаракати хавфсизлиги бошқармасининг оммавий ахборот воситалари ва ­жа­моатчилик билан ишлаш ­бўлими бошлиғи ўринбосари ­Алишер Абдуқодиров. — Йўловчи ташиш йўналишларида тегишли ҳужжатларсиз, хусусан, техник носоз транспорт воситасидан фойдаланиш, йўналиш чизмаси, йўл варақаси, ҳайдовчилик гувоҳномаси, автомобилнинг техник паспорти, мажбурий суғурта полиси йўқ бўла туриб фаолият юритаётган автотранспорт эгалари томонидан 814 қоидабузарлик ҳолатлари аниқланиб, ­автотранспорт воситалари қонун доирасида вақтинчалик жарима майдонларига қўйилган. Шунингдек, 12466 ҳолатда бош­қа қоидабузарликлар бўйича баённомалар тузилган.

Брифингда таъкидланганидек, бу ҳаракатлардан кўзланган мақсад Тошкент шаҳри аҳолиси хавф­сизлигини таъминлаган ҳолда йўналишларда йўловчиларни ташиш фаолиятини амалга ошираётган тадбиркорлар фаолиятига янада кўпроқ эркинлик беришдан иборат.

Тошкент шаҳрида 2016 йил 15 февралдан бошлаб 47 ишчи гуруҳдан иборат бўлган гуруҳлар тузилди ва уларнинг барчаси зиммасига қўшма рейдлар ўтказиш юклатилди.

Мазкур тизимга Тошкент шаҳар ички ишлар бош бош­қармаси, Давлат солиқ инспекцияси, Автомобиль ва дарё транспорти агентлиги ҳамда «Тошшаҳартрансхизмат» уюшмасидан ходимлар бириктирилади. Уларнинг зиммасига биринчи нав­батда ноқонуний йўловчи ташиш фаолияти билан шуғулланаётган фуқароларни аниқлаш ва уларга нисбатан қонунда белгиланган чораларни кўриш, йўловчи ташиш фаолияти билан шуғулланаётган ташкилотлар томонидан транспорт воситаларининг йўналишга чиқарилиши, уларнинг йўловчиларни эҳтиёжларини қондириши бўйича амалга оширилаётган ишларни назорат қилиш юклатилган.

Ҳозирги кунда Тошкент шаҳрида йўловчи ташиш фаолияти билан ноқонуний шуғулланиб келаётган турли хилдаги транспорт воситалари кўпайиб кетган. Улар қонуний равишда йўловчи ташиш фаолияти билан шуғулланаётган транспорт воситаларига, хусусан, автобус ва микроавтобусларга салбий таъсирини кўрсат­япти. Махсус рейд орқали ноқонуний йўловчи ташиш билан шуғулланганлиги учун улар транспорт воситаларини жарима майдонларига вақтинчалик қўйиш билан жазоланади, шунингдек, ушбу фаолиятни қонуний амалга ошириш бўйича амалий ёрдам қилинади.

Айни пайтда экспертларнинг таҳлилига кўра, Тошкент шаҳрида 8000 га яқин автотранспорт воситаси йўловчи ташиш билан шуғулланаётган бўлса, улардан 2318 тасигина қонуний фаолият олиб бормоқда.

Шу ўринда бир савол туғилади: фуқаролар ўз шахсий автомашинаси орқали йўловчи ташиш билан қонуний шуғулланмоқчи бўлса, қаерга мурожаат қилиш керак? Тошкент шаҳрида махсус автокорхоналар ва махсус автосервислар бор. Автотранспорт эгалари ана шу автокорхоналар раҳбарларига учрашса, керакли маълумотларни олиши мумкин. Автотранспорт воситаси қонунда белгиланган тартибда вақтинчалик ижарага берилса, корхона балансига ўтади. Корхона ушбу автотранспорт воситасини фил суяги рангига бўяб, унинг том қисмига такси белгисини қўйиш, шунингдек, автотранспорт воситасини лицензия варақаси билан таъминлаб беришни ўз зиммасига олади.

Йўловчи ташиш билан қонуний шуғулланаётган ҳайдовчиларга ойлик маош тайинланади ва пенсия ёшига етганда, нафақа билан таъминланади. Шунингдек, ҳайдовчи турли сабабларга кўра, бетоб бўлиб қолса, даволаниш учун таътил олиши мумкин. Бу чора-тадбирлар ташувчига ҳам, йўловчиларга ҳам қулайлик яратиб беради ва биринчи нав­батда хавфсизликни таминлайди.

 

Шаҳбоз САИДОВ



DB query error.
Please try later.