13.02.2016

БОБУР МЕРОСИ ВА ЁШЛАР МАЪНАВИЯТИ

Ўзбекистон Ҳалқ демократик партияси Марказий Кенгаши Ёшларнинг ижтимоий-сиёсий фаоллигини ошириш масалалари сектори ташаббуси билан Бобур таваллудининг 533 йиллигига бағишлаб «Ёшлар камолотида Заҳириддин Муҳаммад ­Бобур ижодий меросининг ўрни ва аҳамияти» мавзусида адабий кеча бўлиб ўтди.

Унда партия фаоллари, бобуршунос олимлар, шоирлар, Ўзбек Миллий академик драма театри ­актёрлари, ёшлар ва кенг жамоатчилик вакиллари иштирок этди.

Тадбирда Заҳириддин Муҳаммад Бобур қолдирган бой мероснинг жаҳон илм-фани ривожидаги ўрни, унинг ҳарбий санъат ва давлат бошқарувидаги маҳорати хусусида сўз юритилиб, ўзига хос дилбар шеърияти бугун ҳам ёшларни ватанпарварлик, миллий ва умуминсоний қадриятларга ҳурмат руҳида тарбиялашга хизмат қилаётгани алоҳида таъкидланди.

— Бобурнинг ҳаёти, ижоди ва фаолияти ёшларимизнинг маънавий камолотини юксалтиришда муҳим аҳамият касб этади, — дейди Ўзбекистон халқ ҳофизи Ҳасан Ражабий. — Бутун дунё китобхонларининг меҳрига мушарраф бўлган «Бобурнома» асаридаги она юртимиз табиати тасвири, аждодларимиз қиёфасига чизгилар, ўша пайтдаги ижтимоий ва сиёсий ҳаёт манзаралари она юртимизни янаям севиб ардоқлашга, кўз қорачиғидек асрашга ўргатади.

— Улуғ аждодимизнинг ижоди умумтаълим мактаблари, коллеж ва лицейлар, олий ўқув юртлари, илмий-тадқиқот институтларида кенг ўрганилмоқда дейди. — Ўзбекистон ХДП Марказий Кенгаши Ёшларнинг ижтимоий-сиёсий фаоллигини ошириш масалалари сектори мудири Умурбек Бектемиров. — Шу билан бирга, шоир мероси бастакор ва хонандалар, созандалар, мусаввирлар учун битмас-туганмас илҳом манбаи бўлиб хизмат қилаётир. ­Юртбошимиз таъкидлаганидек, бобомиз Заҳириддин Муҳаммад Бобур номи билан ҳар қанча фахрлансак арзийди.

— Бобур ижоди нафақат мамлакатимизда, балки бутун дунё халқлари томонидан севиб ўқилади, — дейди Зулфия номидаги Давлат мукофоти ­совриндори Юлдузой Ўрмонова. — Масалан, ­«Бобурнома» дунёдаги ўттиздан ортиқ тилга таржима қилиниб, китоб ҳолида чоп этилган. Бобур ва унинг авлодлари даврига оид бебаҳо манбалар жаҳоннинг етмишдан зиёд музейларида сақланмоқда. Бобур ижодини чуқур ўрганиш, ундан сабоқ чиқариш биз ёшларнинг бурчимиз, вазифамиз ҳисобланади.

Тадбирда Бобур ғазалларидан намуналар ўқилди. Шоир шеърлари билан айтиладиган мумтоз қўшиқлар ижро этилди.

Бундай тадбирлар ЎзХДП ташкилотлари томонидан республикамизнинг барча ҳудудларида ўтказилмоқда.

 

Наврўз ШОДМОНҚУЛОВ,

«Ўзбекистон овози» мухбири. 



DB query error.
Please try later.