11.02.2016

САВОЛ ВА ЖАВОБ

— Касб-ҳунар коллежлари битирувчиларига микрокредитлар ажратилиши тўғрисида кўп эшитамиз. Меъёрий-ҳуқуқий ҳужжатларда ушбу масала қандай акс этган?

Зайнабхон МАМАЖОНОВА,

Бухоро вилояти.

 

 

Шуҳрат ТУРСУНБОЕВ, Олий Мажлис Қонунчилик палатасидаги ЎзХДП фракцияси аъзоси:

— Яқинда Марказий банкнинг тегишли қарорига асосан касб-ҳунар коллежлари битирувчиларига тижорат банклари томонидан микрокредитлар ажратилиш тартиби белгиланди. Унга кўра, тадбиркорлик фаолиятини амалга ошириш учун давлат рўйхатидан ўтган ёки юридик шахс устав фондида (устав капиталида) 50 фоиз ёки ундан ортиқ акцияга (улушга) эга бўлган битирувчиларга имтиёзли микрокредитлар берилади. Шунингдек, касб-ҳунар коллежларида ўқишни якунлаган кунидан бошлаб 3 йилдан ортиқ вақт ўтмаган битирувчилар кредитлаш субъектлари ҳисобланади.

Эътиборлиси шундаки, микрокредит юридик шахс ташкил этмаган ҳолда фаолият юритаётган қарз олувчиларга — энг кам ойлик иш ҳақининг 200 бараваригача, юридик шахс ташкил этган ҳолда фаолият юритаётган қарз олувчиларга эса, энг кам ойлик иш ҳақининг 300 бараваригача миқдорда қайтариш муддатини узайтириш ҳуқуқисиз берилади.

Микрокредит қарз олувчига кредит ажратилаётган лойиҳанинг ўзини ўзи қоплашини ҳисобга олиб, фаолиятни бошлаш учун айланма маблағларни шакл­лантиришга, инвестиция лойиҳасининг техник-иқтисодий асосини ишлаб чиқиш 12 ой муддатгача белгиланди. Бундан ташқари, микрокредитлар қиш­лоқ хўжалиги маҳсулотларини етиштириш ва қайта ишлашни ташкил этиш учун айланма маблағларини тўлдиришга, шунинг­дек, асбоб-ускуналарни сотиб олишга 2 йил муддатгача ҳамда инвестиция лойиҳаларини молия­лаштириш учун 3 йилдан ортиқ муддатга берилади.

Шунингдек, микрокредитдан фойдаланганлик учун фоиз ставкаси миқдори Марказий банкнинг қайта молиялаш ставкаси даражасидан юқори бўлмаган миқдорда, банкнинг имтиёзли кредитлаш жамғармаси ҳисобидан микрокредит ажратилган тақдирда Марказий банкнинг қайта молиялаш ставкасининг 50 фоизи миқдорида белгиланади. Марказий банкнинг қайта молиялаш ставкаси оширилган тақдирда шартномада кўрсатилган фоиз ставкаси ўзгаришсиз қолдирилади.

Қарз олувчилар микрокредит олиш учун банкка буюртма тақдим этади. Буюртмага қарз олувчининг банк ҳисобварағига пул тушумлари (пул оқими) прог­нози кўрсатилган бизнес-режа, қарз олувчининг тегишли давлат солиқ инспекциясига тақдим қилган охирги ҳисобот даври учун бухгалтерия баланси илова қилинади. Бундан таш­қари, 90 кундан ортиқ муддатдаги қарзларга доир солиштириш далолатномалари, молиявий натижалар тўғрисида ҳисобот ҳам кўрсатилади, касб-ҳунар коллежи дипломининг нотариал тасдиқланган нусхаси тақдим этилади.

Банк буюртмани олганидан сўнг уч иш куни ичида уни кўриб чиқиши ва микрокредит бериш ёки микрокредит беришни асослантирилган ҳолда рад этиш ҳақида қарор қабул қилиши шарт.



DB query error.
Please try later.