02.02.2016

ИНСОНПАРВАРЛИКНИНГ ЁРҚИН ИФОДАСИ

Президентимиз тақдимномасига мувофиқ, Олий Мажлис Сенатининг «Ўзбекистон Республикаси Конституцияси қабул қилинганлигининг йигирма уч йиллиги муносабати билан амнистия тўғрисида»ги қарорида аёлларни, вояга етмаганларни, 60 ёшдан ошган эркакларни, чет давлатларнинг фуқароларини, шунингдек, бир қатор бошқа тоифадаги маҳкумларни жавобгарликдан ва жазодан озод қилиш назарда тутилган.

Маълумки, амнистиянинг моҳиятида инсонпарварлик, кечиримлилик, бағрикенглик каби тушунчалар ётади. Мус­тақиллик йилларида қабул қилинган амнистияларнинг маъно-мазмунига эътибор қаратадиган бўл­сак, асосан аёллар, вояга етмаганлар, кекса ёшлилар, биринчи марта жиноят содир этган шахслар жазодан озод қилиниб келинмоқда. Жиноят ва бош­қа турдаги ҳуқуқбузарликни содир этган шахслар жазодан тўла ёки қисман озод этилади, тайинланган жазо тури енгилроғи билан алмаштирилади.

Жаҳон амалиётини таҳлил қилиш шуни кўрсатадики, ҳамма давлатларда ҳам амнистия қабул қилиш қонунчиликда белгиланмаган, айримларида эса белгиланган бўлса-да, 10-20 йилда бир қабул қилинади. Бизда эса мамлакатимиз Конституциясининг муқаддимасида айтиб ўтилган инсонпарварлик тамойилларига изчил амал қи­либ келинмоқда.

Айни кунларда мамлакатимизнинг барча ҳудудларида бўлгани каби Тошкент вилоя­тида ҳам амнистия тўғрисидаги қарор ижросини таъминлаш бўйича бир қатор ишлар амалга оширилмоқда. Шу ўринда айрим ми­сол­ларни келтириб ўтсак. ­

Тўхтамурод Нарзиқулов ўтган йилнинг сентябрида автомашина ҳайдаб кетаётганида, эҳтиётсизлик туфайли қоидабузарлик содир этиб, «Дамас» автомашинаси билан тўқнашиб кетади. Натижада йўловчилардан бири жароҳатланиб, шифохонага ётқизилади. Суд унинг 60 ёшдан ошгани, қилган жиноятига чин кўнгилдан пушаймон эканини ҳисобга олиб, амнистия актини қўллади. Шунингдек, жиноят ишлари бўйича Чирчиқ шаҳар суди томонидан амнис­тия акти қўлланилиб, Серик Икромов, Равшан Ҳасанов, Лобархон ­Соҳибова, Иззат Маҳамадалиев, Сардор ­Турсуналиев каби фуқаролар давлатимизнинг инсонпарварлиги, кечиримлилиги туфайли ўз оилалари, фарзандлари бағрига қайтди.

Амнистия қанчадан-қанча оилаларга қувонч келтирмоқда. Адашганларга эса ҳаётда ўз ўрнини топиб олишига имкон бермоқда. ­Фақат бундай кечиримлиликнинг, инсонпарварликнинг қадрига етиш керак бўлади.

 

Шавкат САТТОРОВ,

жиноят ишлари бўйича Чирчиқ шаҳар суди судьяси.



DB query error.
Please try later.