28.01.2016

ЎЗБЕКИСТОН НОМИ БИЛАН

халқаро саҳналарга чиқаётган истеъдодли болалар Ватанимизни бутун дунёга танитмоқда

В.Успенский номидаги Республика ихтисослаштирилган мусиқа академик лицейининг 250дан ортиқ ўқувчиси Италия, Германия, Руминия, Греция, Англия, Испания, АҚШ, Голландия, Япония, Португалия сингари давлатларда ўтказилган ­халқаро танловларда ғолиб бўлишган. Биргина 2015 йилнинг ўзида 74 нафар ўқувчи халқаро танлов ва фестивалларда юқори ўринларни эгаллаган. Лицейнинг 2 нафар ўқувчиси — Тамила ­Саримсоқова ҳамда Нодира Дадамуҳаммедова Зулфия номидаги Давлат мукофотига сазовор бўлди, ­Достон Мирзакаримов эса «Ниҳол» мукофотига муносиб кўрилди.

Бугунги кунда ёш истеъдодларни кашф этиш, малакали мутахассислар тайёрлаш ва мусиқа санъатини янада ривожлантириш бўйича Ўзбекистондаги етакчи таълим маскани ҳисобланган мазкур лицейда ўқувчиларга фортепиано, торли чолғу, мусиқа назарияси, композиторлик, хор дирижёрлик, ўзбек халқ чолғулари, анъанавий ижрочилик, овоз оператори, академик хонандалик ҳамда эстрада созандалиги каби йўналишларда таълим берилмоқда.

— Бизда ўқув жараёни икки босқичда амалга оширилади, — дейди лицей директори, Ўзбе­кис­тонда хизмат кўрсатган ­ма­­даният ходими Дилдора ­Жамолова. — У бир-бири билан узвий равишда 12 йил бўлиб биринчи босқич 9, иккинчи босқич 3 йил давом этади. Ҳозирда таълим муассасамиздаги ўқувчилар профессорлар, фан номзодлари, машҳур артистлардан мусиқа сирларини ўрганишмоқда. 2011 йилда лицейимизнинг асосий бинолари қайта таъмирланиб, энг замонавий асбоб-ускуналар билан жиҳозланди. Бугунги кунда лицейимизда ўсмир ёшлар симфоник, пуфлама чолғулар, халқ чолғулари, юнисон скрипкачилар оркестри, анъанавий созандалар, дуторчилар ансамбллари фаолият кўрсатмоқда.

2016 йилда ўқувчиларимиз яна қатор халқаро танловларда иштирок этиши кўзда тутилган. Ютуқларимиз янада кўпаяди, деб ўйлайман.

 

Шаҳбоз САИДОВ



DB query error.
Please try later.