Охирги сонда



Кўп ўқилган мақолалар



Долзарб мавзу



Мақолалар архиви

«    Dekabr 2018   
Du Se Cho Pa Ju Sha Ya
26 27 28 29 30 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31 1 2 3 4 5 6
21.01.2016

БИТИРУВЧИЛАРГА МУНОСИБ ИШ ЖОЙЛАРИ

Тошкент молия институтида 2015-2016 ўқув йилида битирувчи бакалавр ва магистрларни иш жойларига тақсимлаш мақсадида «Карьера кунлари» меҳнат ярмаркаси ўтказилди. Унда мамлака­тимизнинг етакчи тижорат банклари, молия муассасалари, йирик корхона ва ташкилотлар вакиллари иштирок этиб, талабаларга бўш иш ўринлари таклиф этилди.

— Бир неча йиллардан буён анъанавий тарзда ўтказилиб келинаётган бундай меҳнат ярмаркалари ҳар томонлама ижобий самара бераётганини ҳаётнинг ўзи кўрсатиб турибди, — дейди тадбир ташкилотчиларидан бири, иқтисод фанлари номзоди, доцент Нарзулла Обломуродов. — 2015-2016 ўқув йилида институтимизни 1400 нафар бакалавр ва ­магистрлар битириб чиқади. Ҳозирги ҳисоб-китобларимизга қараганда, меҳнат ярмаркасида 700 нафардан зиёд бакалавр ва магистрлар билан шартнома тузилди. Ўқув йили якунигача барча битирувчиларимиз шартнома асосида муайян иш жойларига эга бўлишига эришамиз.

Битирувчи талабаларни ишга жойлаштиришда биргина меҳнат ярмаркаси билан кифояланиб қолаётганимиз йўқ. Ўқув йили давомида «Банк иши» таълим йўналиши бўйича институтни тамомлаётган 200 дан ортиқ талабага амалий кўмак бериш мақсадида Марказий банк ташаббуси билан Халқ банки, «Ўзсаноатқурилишбанк», «Агробанк», «Қишлоқ қурилиш банк», «Hamkorbank», «Ипотека-банк», «Алоқабанк» ва «Asia Alliance Bank» сингари 20 дан ортиқ етакчи тижорат банклари томонидан тақдимот тадбирлари ва турли танловлар ўтказилди.

«Энг яхши битирув-малакавий иши», «Энг иқтидорли талаба» каби ижодий танлов ғолиблари улар томонидан пул мукофотлари, қўшимча стипендиялар ҳамда ишга жойлашиш сертификатлари билан тақдирландилар. Кўпгина талабаларимиз ҳар йили тижорат банклари стипендияларини қўлга киритиш билан бирга келгусида иш ўринларига ҳам эга бўлмоқда.

Бундан ташқари, биз олдинги ўқув йилларида институтимизни битириб кетган ва уч томонлама шартнома асосида ишга жойлашган талабаларимизнинг фаолиятини ҳам мониторинг қилиб борамиз. Масалан, 2014-2015 ўқув йилида ўқишни битирган талабаларимизнинг иш фаолияти бўйича ўтган йилнинг октябрь-ноябрь ойларида мониторинг ўтказдик. Ўқитувчиларимиз бевосита вилоятларга бориб, шаҳар ва туманлар кесимида маҳаллий ҳокимият ва тегишли вазирликлар вакиллари билан улар фаолиятини ўрганиб, муаммо бўлса, ўша жойнинг ўзида ечимини топишга ҳаракат қиляпти.

Бу чора-тадбирлар туфайли институтимизни битирган талабаларимиз барқарор иш ўринларига эга бўлишмоқда.

 

Нуруллоҳ ДОСТОН

ёзиб олди.



DB query error.
Please try later.