21.01.2016

«ЎЗБЕКИСТОН ТЕМИР ЙЎЛЛАРИ»:

2015 йилда 20,7 миллион йўловчи ўз манзилига етказилди

«Ўзбекистон темир йўллари» акция­дорлик жамиятининг бошқарув йиғилиши бўлиб ўтди. Унда 2015 йил якунлари муҳокама қилиниб, тизим олдидаги муҳим ­устувор вазифалар ва амал­­даги инвестиция дас­турлари юзасидан бажариладиган ишлар белгилаб олинди. Бу ҳақда акциядорлик жамияти матбуот хизмати хабар бермоқда.

Йиғилишни «Ўзбекистон темир йўллари» акциядорлик ­жамияти бошқаруви ­раиси ­Ачилбой Раматов олиб борди. Маълумотларга кўра, ўтган йили 20,7 миллион йўловчи ўз манзилига етказилди. Темир йўл станцияларидан 67,7 миллион тонна юк ташилди. Экс­порт хизматлари кўрсаткичи 347,7 миллион АҚШ доллар миқдорига тенг бўлиб, бу прог­нозга нисбатан 100,2 фоизни ташкил этган. Саноат корхоналарида 388,2 миллиард сўмлик маҳсулот ишлаб чиқарилди. Аҳолига пуллик хизмат кўрсатиш турларини кўпайтиришга катта аҳамият берилиб, 2015 йилда бу кўрсаткич 323,8 миллиард сўмни ташкил этди.

Инвестиция дастурига мувофиқ барча манбалар ҳисобидан 2015 йил прогнози бўйича 734,9 миллион АҚШ доллари миқдорида маблағ ўзлаштириши кўзда тутилган эди. Йиғилишда ўтган йилда ушбу йўналишда 17 лойиҳа бўйича, жами 755,16 миллион АҚШ доллари миқдорида ёки прог­нозга нисбатан 102,8 фоиз капитал маблағлар ўзлаштирилганлиги айтиб ўтилди.

2015 йилда 105 локомотив секциялари таъмирланиб, 1258 вагоннинг хизмат муддати узайтирилди. 240 километр темир йўл реабилитация қилиниб, 98,5 километр янги темир йўл қурилганлиги алоҳида қайд этиб ўтилди.

Йиғилиш сўнгида 2016 йилда ҳам темир йўл тизимида ўсиш суръатларини янада юксалтириш, жорий йилда бажарилиши зарур бўлган асосий вазифалар белгилаб олинди. Хусусан, инвестиция дастури бўйича режалаштирилган маблағларни тўлиқ ўзлаштириш, «Ангрен — Поп» электрлаштирилган янги темир йўл линияси қурилишини тугатиш, «Самарқанд — Бухоро» йўналишида юқори тезликда ҳаракатланувчи поездлар ҳаракатини ташкил этиш лойиҳаси бўйича ишларни якунлаш, «Қарши — Термиз» участкаларини электрлаштириш ишларини давом эттириш ва асосий фаолият кўрсаткичларини ўз вақтида, ортиғи билан бажариш зарурлиги алоҳида таъкидланди.



DB query error.
Please try later.