14.01.2016

МУҚАДДАС БУРЧ

Ватан ҳимоячилари куни муносабати билан Ўзбекистон ХДП ташкилотлари, депутатлик бирлашмалари мамлакатимизнинг барча ҳудудларида маънавий-маърифий тадбирлар, турли учрашувлар ўтказмоқда.

Ўзбекистон ХДП Марказий Кенгаши ва Тошкент вилоят кенгаши ташаббуси билан 14 январь — Ватан ҳимоячилари кунига бағишлаб «Миллий армия — тинчлигимизнинг мустаҳкам қал­қони» мавзусида маънавий-маърифий тадбир ўтказилди. Унда Чирчиқ олий танк қўмондонлик-муҳандислик билим юрти курсантлари, ҳарбий қисм командирлари ҳамда партия фаоллари иштирок этди.

Тадбирда мамлакатимиз Қуролли Кучлари тизимида изчиллик билан амалга оширилаётган ислоҳотлар хусусида сўз борди. Ҳарбий хизматчиларнинг юрт тинчлигини асраш йўлида кўрсатаётган жасорати эътироф этилди.

Дунёда шарафли вазифалар кўп, аммо улар ичида энг шарафлиси киндик қонинг тўкилган Ватанингни ҳимоя қилишдир. Зеро, Ватан – бу инсонга ато этилган энг улуғ неъмат, ота-боболаримиздан мерос замин, улуғ аждодларимизнинг излари қолган табаррук тупроқдир. Ана шу муқаддас заминни қўриқлаётган Ватан ҳимоячиларининг зиммасида эса катта масъулият бор.

— Истиқлол йилларида мамлакатимизда замон талабларига жавоб берадиган тезкор ва ихчам, юқори даражадаги жанговар қобилият ва салоҳиятга эга миллий армия барпо этилди, муддатли ҳарбий хизматни ўтаётган ёшларга бир қатор имтиёзлар берилди, — деди Олий Мажлис Қонунчилик палатаси депутати, ЎзХДП фракцияси аъзоси Комила Каромова. — Бугун хал­қимиз Ватанимиз сарҳадлари ишонч­ли қўлларда эканини яхши билади. Дунёда турли қарама-қаршиликлар, геосиёсий манфаатлар тўқнашуви авж олаётган ҳозирги қалтис шароитда юрт тақдирига дахлдорлик туйғуси билан яшашимиз талаб этилмоқда. Ёшларни ана шу руҳда тарбиялаш ҳаммамизнинг фуқаролик ва фарзандлик бурчимиздир.

Йиғилишда сўз олганлар мамлакатимиз мустақиллиги, хавфсизлиги ва ҳудудий яхлитлигини таъминлаш, бар­қарор ва изчил тараққиётимизнинг ишончли кафолати бўлган миллий армиямизни шакллантириш йўлида амалга оширилган кенг кўламли ислоҳотлар самарадорлиги ҳақида фикр билдирилди.

— Болалигида ҳарбий бўлишни орзу қилмаган ўғлон бўлмаса керак. Мен ҳам тенгдошларим қатори Ватан ҳимоячиси бўлишни жуда хоҳлаганман, — дейди Чирчиқ олий танк қўмондонлик-муҳандислик билим юрти курсанти Музаффар Эрназаров. – Шукрки, ниятимга эришдим. Бир пайтлар ҳарбийликни орзу қилган, бироқ кейинчалик бошқа касбларни эгаллаган дўстларим бугун менга ҳавас билан қарашади. Шу ерга ўқишга кирганимда онам қанчалик қувонганини сўз билан ифодалаб беролмайман. Ана шундай ҳислар касбимга бўлган меҳримни янада оширади.

Тадбирда ватанимиз мудофаа қудратини ошириш, соҳага оид ислоҳотлар изчиллигини таъминлаш, ҳарбий хизматчилар ҳуқуқ ва манфаатларини муҳофаза қилиш, соҳага оид қонунчиликни янада такомиллаштириш масалаларида ҳам фикр-мулоҳазалар билдирилди.

Тадбир санъаткорлар иштирокидаги концерт дастури билан давом этди.

 

Наврўз ШОДМОНҚУЛОВ,

«Ўзбекистон овози» мухбири.



DB query error.
Please try later.