Охирги сонда



Кўп ўқилган мақолалар



Долзарб мавзу



Мақолалар архиви

«    Noyabr 2018   
Du Se Cho Pa Ju Sha Ya
29 30 31 1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 1 2
07.01.2016

БОЛАЛАР ШАҲАРЧАСИ

Бу масканга одамлар «Меҳр кошонаси» деб таъриф бермоқда

Хива туманида салкам бир асрки, фаолият юритиб келаётган даргоҳ бир пайтлар оддий халқ тили билан «детдом» деб аталарди... Собиқ тузум даврида ота-онасиз қолган болалар яшаган маскан шу атамага мос эди. «Ранг кўр, ҳол сўр» деганларидек, бу даргоҳнинг шароити, таъминоти ўз номига яраша эди. Фақат истиқлолдан сўнг қаровсиз қолган болалар тарбияланаётган бундай масканларга давлатимиз томонидан алоҳида эътибор қаратилди.

Меҳрибонлик уйи номини олган даргоҳ ҳақиқатда кўнгли ярим болажонларга меҳр улашувчи, кам-кўстини бутловчи, уларни бошқа тенгқурлари каби ҳеч нарсадан қийналмай, кўнглига озор етказмай тарбиялаб, воя­га етказадиган, ҳаётга йўлланма берадиган масканга айлантирилди.

Меҳрибонлик уйи директори Вера Пакка «Ўзбекистон Қаҳрамони» унвони берилганининг ўзиёқ давлатимизнинг бу даргоҳга алоҳида эътиборининг ёрқин мисолидир.

Аммо Меҳрибонлик уйи қанчалар шинам, барча шарт-шароит­ларга эга, энг сўнгги замонавий мебель ва жиҳозлар билан таъминланган, бўлса-да... Барибир кўнгилнинг бир жойида кемтик бор эди.

Конституциямиз қабул қи­линганлигининг 23 йиллиги тантаналари арафасида Хива шаҳрида Меҳрибонлик уйи тарих мулкига айланди. Унинг ўрнига Болалар шаҳарчаси ташкил этилди.

Қадим ва ҳамиша навқирон Хива шаҳрига кириб бораверишда, йўлнинг чап томонида бири-биридан чиройли икки қаватли уйлар кўзга ташланади. Бинолар ёнида спорт зали, майдончалари, бассейн, ахборот-ресурс маркази... бутун бир шаҳарчани ташкил этади...

Шаҳарчага кўм-кўк майсазорлар, арча ва қарағай дарахтлар ўзгача кўрк ва шукуҳ бахш этиб турибди. «Болалар шаҳарчаси» ёзуви ўрнатилган, шарқона услубда қурилган маҳобатли дарвозадан кирибоқ, гўё ўзга бир дунёга тушиб қолгандай бўласиз.

Қурувчилар томонидан бунёд этилган ўн саккизта икки қаватли уйнинг ҳар бирида олти нафардан саккиз нафаргача бола истиқомат қилади. Барча хоналарга чўғдек гиламлар тўшалган. Кенг, ёруғ ётоқхона замонавий мебеллар билан жиҳозланган. Дам олиш хонасида болажонлар китоб ўқишлари, дарс қилишлари учун ҳамма шароит тахт. Энг замонавий русумдаги компьютер, телевизор, радио улар ихтиёрида. Ошхона ва ювиниш хоналари ҳам ҳавасингизни келтиради.

Шу ўринда бир гап: эндиликда ҳар бир уйда болажонлар танлов асосида ишга қабул қилинган тарбиячи она ва тарбиячи хола билан бирга истиқомат қилишади. Улар кеча-ю кундуз болажонлар ёнида. Болалар билан бирга бозор-дўконларга бориб, озиқ-овқат харид қилишади. Таомлар ҳам болалар истагига кўра, ҳар бир уйнинг ўзидаги ошхонада тайёрланади. Бу жараёнларда болажонлар ҳам иштирок этади, яъни улар ўзларини оила муҳитида ҳис этишади.

Бундан ташқари, ҳар икки турар-жойда яшаётган болажонлар ҳолидан доимо хабар олиб туриши учун бир нафардан тарбиячи, яъни хола тайинланган.

Болалар шаҳарчасида ўндан ортиқ тўгарак ташкил этилган. Болалар ўзлари қизиққан фан бўйича билимини ошириши, касб-ҳунар сирларини ўрганиши мумкин. Шаҳарчада истиқомат қилаётган 110 нафардан зиёд болажоннинг Хива шаҳридаги иккита мактабга ўз вақтида бориб, сабоқ олиши учун алоҳида автобус ажратилган. Касб-ҳунар коллежларида таҳсил олаётган болалар учун ҳам қулайликлар яратилган.

...Янги шаҳарчадаги барча шарт-шароитлар борасидаги тасаввурларимизни Болалар шаҳарчаси директори, ЎзХДП фаоли Вера Пак янада тўлдиради: Меҳрибонлик уйига ўттиз йил раҳбарлик қилдим. Эндиликда бу атама ўз аҳамиятини йўқотди. Бугун эса, унинг ўрнида замонавий Болалар шаҳарчаси барпо этилди.

— Болалар шаҳарчасида яшаётган болалар ҳар томонлама баркамол бўлиб ўсишлари учун барча шарт-шароитлар яратилган, — дейди вилоят соғ­лиқни сақлаш бош­қармаси бошлиғи, пар­тиямиз фаоли Кўпал Тангрибердиев. — Шаҳарчада алоҳида тиббиёт хонаси бор. Бу ерда малакали шифокор хизмат қилади ва болалар соғ­лиғини ҳар доим назорат қилиб боради. Болалар қатор спорт турлари билан мунтазам шуғулланишлари, бассейн­да чўмилишлари мумкин.

...Хивадаги 20-сон Меҳрибонлик уйи атамаси тарих мулкига айланди, дедик. Ушбу даргоҳ тарбияланувчиларига туҳфа қилинган янги маскан — Болалар шаҳарчаси деб юритилса-да, бу даргоҳни оддий одамлар «Меҳр кошонаси» деб номлашибди. Хаёлга келмаган, тушга кирмаган бундай шаҳарчанинг Соғ­лом она ва бола йили арафасида болажонларга туҳфа этилиши ҳам қадим қадриятларимизни намоён қилиб турибди.

 

Рўзимбой ҲАСАН,

«Ўзбекистон овози» мухбири.



DB query error.
Please try later.