01.01.2016

БАХТЛИ ЮРТНИНГ БАХТИЁР БОЛАЛАРИ

Бугун бутун Ўзбекистон бўй­лаб болаларнинг шодлиги, қувончи кезиб юрибди.

29 декабрь куни «Туркистон» саройида «Президент арчаси» тантаналари юксак савияда, ўзгача шукуҳ билан ўтди.

Тадбир Халқ таълими вазирлиги ҳамда «Sen yolg’iz emassan» республика болалар жамоатчилик жамғармаси томонидан ташкил этилди. Унда болалар учун «Томоша» гуруҳи томонидан саҳналаштирилган «Меҳримизда сеҳримиз» мусиқий дастури намойиш этилди.

— «Президент арчаси»га 100 нафар ўқувчи олиб келдик, — дейди 22-Меҳрибонлик уйи тарбиячиси Илҳом Раҳимхўжаев. — Болалар бу байрамга катта тайёргарлик кўришди. Уларнинг баъзи бирлари эртак қаҳрамонлари қиёфасида ташриф буюришди. Мен ва Милана Қодирова эса Қорбобо ва Қорқиз бўлиб келдик...

— «Президент арчаси»га «Болажон» номли қўшиқ ва «Бувижон» номли шеър ёдлаб келдим, — дейди Бахтиёр Муҳаммадалиев. — Яқинда Мурувват уйимизда ҳам янги йил байрамини нишонладик. Дўстларим билан маза қилиб ўйнадик. Бугун бизга Президент совғасини беришди, бундан жуда ҳам хурсандман. Менинг учта катта орзум бор эди, энди тўртта бўлди. Биринчи орзум машина олиш, иккинчиси тезроқ катта бўлиш. Учинчиси эса соғ-саломат юриш. Янги орзум эса юртимизда байрамлар кўп бўлсин...

Ушбу тадбирда 446 нафар Меҳрибонлик уйлари ва 83 нафар «SOS — болалар маҳалласи» тарбияланувчилари иштирок этди.

— Янги йил арафасида болалар учун 12 номдаги ўқув қуроллари ва 15 хил ширинликлардан иборат 11 минг дона Президентимиз совғаси бутун Ўзбекистон бўйлаб тарқатилди, — дейди Халқ таълими вазирлиги масъул ходими Санам Ражабова. — 26 декабрь куни Тошкент шаҳри, Тошкент, Сирдарё, Жиззах вилоятларига жами 3762 дона Президент совғалари етказилди. Шунингдек, 5969 дона Президент совғалари «Ўзбекистон ҳаво йўллари» Миллий авиакомпаниясининг самолётлари орқали 25-27 декабрь кунлари Қорақалпоғистон Республикаси ва вилоя­тларга жўнатилди.

«Президент арчаси» тантаналарида Меҳрибонлик уйларининг 2292 нафар ва Болалар шаҳарчаларининг, оилавий болалар уйларининг 10 нафар, Мурувват уйларининг 1577 нафар тарбияланувчилари, шунингдек, 3 ёшдан 15 ёшгача бўлган 4472 нафар ота-онасининг қарамоғидан маҳрум бўлган болалар ҳамда юртимиз тинчилиги йўлида ҳалок бўлган ҳарбий хизматчиларнинг 297 нафар фарзанди — жами 9471 нафар бола иштирок этди.

 

Шаҳбоз САИДОВ

 

Алишер Навоий номидаги Наманган вилоят театри саҳнасига ўрнатилган улкан арча безакларидан таралаётган рангин ёғдулар байрамга вилоятнинг барча ҳудудларидан таклиф этилган болажонларга олам-олам шодлик бағишлади.

Байрам тадбирида 26-Меҳрибонлик уйи тарбия­ланувчилари, юртимиз тинчлиги ва барқарорлигини асраш йўлида ҳалок бўлган ҳарбий хизматчиларнинг фарзандлари, махсус муассасаларда таълим-тарбия олаётган болалар жам бўлди.

«Президент арчаси» тантаналарини Наманган вилояти ҳокими, Олий Мажлис Сенати аъзоси Хайрулло Бозоров кириш сўзи билан очди.

— Азиз болажонлар, — деди у. — Кириб келган янги 2016 йил мамлакатимизда Соғлом она ва бола йили деб эълон қилинди. Бу бутун йил давомида сизларга чексиз меҳр ва эътибор кўрсатилади деганидир. Бугунги байрам тантанаси сизнинг хотирангизда узоқ вақт сақланиб қолади. Чунки сиз бугун Президентимиз совғасини олдингиз. Эртага сизларнинг орангиздан таниқли спортчилар, олимлар, шифокор ва ўқитувчилар етишиб чиқишига ишонамиз. Янги йил ҳаммангизга бахт, омад олиб келсин...

Шу куни жами 256 нафар болажонга 27 турдаги ўқув қуроллари, ширинликлар ва ўйинчоқлардан иборат Президент сов­ғалари топширилди.

Бахтли болалик, келажакка ишонч, юксак орзу-умидлар тараннум этилган куй-қўшиқ ва рақслар, «Янги йил саргузаштлари» номли саҳна асари намойи­ши болажонларга байрамона кайфият бағишлади.

— «Президент арчаси» жуда зўр бўлди, — дейди 26-Меҳрибонлик уйи тарбияланувчиси Шодия Машрабова. — Президентимизнинг бизга юборган совғалари ичида менга, айниқса, рангли қалам ва фломастер, расм дафтарлари жуда ёқди. Катта бўлсам рассом бўламан.

— Биз Учқўрғонданмиз, — дейди ўзини Умида Абдуғаффорова, деб таништирган қизалоқ. — Байрамга Моҳигул, Ҳожиакбар, Нозимжон, Шермуҳаммадлар билан бирга келдик. Бир жойда яшасак ҳам «Президент арчаси»да учрашиб, танишдик.

— Мен учинчи бор Президент сов­ғасини олишим, — дейди Уйчи туманидаги 44-мактаб ўқувчиси Нозимжон Иминжонов. — Совғамни кўриш учун бугун бизникига бувим ва қариндошлар келишади.

Болажонлар совғаларини кўтариб, автобуслар томон йўл олишди. Қорбобо билан Қорқиз, айиқ­полвон, йўл­барс, Она бўғу уларни қўл силкиб кузатиб қолди...

 

Носиржон ДЕҲҚОНОВ,

«Ўзбекистон овози» мухбири.



DB query error.
Please try later.