29.12.2015

ИНТЕРНЕТ-ЖУРНАЛИСТИКА:

имкониятлар, изланишлар

Ўзбекистон Миллий кутубхонасида Чет тилларни ривожлантириш ва оммавийлаштириш маркази — «Your school» томонидан «Замонавий интернет-журналистика» мавзусида давра суҳбати ўтказилди.

Тадбирда журналистлар, блогерлар, замонавий интернет-журналистикага қизиққан кутубхона фойдаланувчилари ва «Your school» маркази аъзолари иштирок этди.

1995 йил 29 апрелда «uz» домени рўйхатга олинганидан буён ундаги веб-сайтлар сони йил са­йин кўпайиб бормоқда. Масалан, 2010 йилнинг февраль ойида мамлакатимиз интернет маконида 10 мингдан ортиқ веб-сайт рўйхатга олинган бўлса, жорий йилнинг сентябрида улар сони 20 мингдан ошди.

Таъкидлаш жоизки, интернет оламида янги-янги соҳалар пайдо бўлмоқда. Кечагина «блогер» тушунчаси биз учун мавҳум эди. Бугун эса ҳар биримиз ўз блогимизни очиш ва унда мустақил равишда ахборот бериб бориш имкониятига эгамиз.

Бу борада ўнлаб меъёрий-ҳуқуқий ҳужжатлар, жумладан, ахборотлаштириш тўғрисидаги қонун, Президентимизнинг замонавий ахборот-коммуникация технологияларини жорий этиш ва ривожлантириш тўғрисида, Вазирлар Маҳкамасининг интерактив давлат хизматлари кўрсатишни ҳисобга олган ҳолда интернет тармоғида Ўзбекистон Республикаси ҳукумат портали фаолиятини янада такомиллаштириш тўғрисидаги қарорлари ва бошқа ҳужжатлар қабул қилиниб, ҳаётга татбиқ этилмоқда.

Блогерлар давра суҳбати давомида қатнашчиларга интернет-журналистика ҳақида батафсил маълумот беришди. Ўзбекистонда фаолият юритаётган 100 дан зиёд интернет-нашрлар, блоглар, олий ўқув юртларида ташкил этилган курслар ҳақида ҳам тўхталишди.

— Интернет учун ёзилаётган хабарларнинг бошқа оммавий ахборот воситаларидаги ахборотлардан фарқи ҳажмнинг қисқалигидадир, — дейди Ўзбекистон Футбол Федерацияси матбуот хизмати ходими, блогер Аброр Қодиров. — Чунки интернет фойдаланувчиларининг асосий қисми — ёшлар. Ўқувчидаги қизиқишни ушлаб туриш мақсадида хабарларнинг ҳажми катта бўлмайди. Бугунги семинарнинг яна бир ижобий жиҳати шундаки, журналистикага, хусусан, интернет-журналистикага қизиқиши юқори бўлган ёшлар билан мулоқотга киришдик.

Давра суҳбатида Ўзбекистонда ёшларнинг маънавий иммунитетини шакллантириш, ахборот маданиятини ошириш, ахборотни тўғри ва соғлом таҳлил қилиш, борасида амалга оширилаётган ишлар ҳақида ҳам фикр алмашилди.

Ўзбек ва инглиз тилларида ташкил этилган тадбирда иштирок этганлар замонавий интернет-журналистика тушунчасига доир ўзларини қизиқтирган саволларга жавоб олишди.

 

Наврўз ШОДМОНҚУЛОВ,

«Ўзбекистон овози» мухбири.



DB query error.
Please try later.