29.12.2015

«ЭЗГУЛИК ЎЗБЕКИСТОНДАН ТАРАЛАДИ»

Исроилнинг «The Jerusalem Post» газетасида чоп этилган мақола ана шундай номланади

«Шарқ тароналари» Х халқаро мусиқа фестивалига дунёнинг кўплаб мамлакатларидан санъаткорлар билан бирга журналистлар ҳам ташриф буюрган эди. Улар орасида Исроилнинг «The Jerusalem Post» газетаси мухбири Виктория Мартинова ҳам бор. У Ўзбекистондаги нуфузли фестивалдан олган таассуротлари тўғрисида мақола ёзди. Биз уни қисқартирилган ҳолда эътиборингизга ҳавола этяпмиз.

«Исроиллик санъаткорлар ҳам Самарқандда ўтказилган «Шарқ тароналари» Х халқаро мусиқа фестивалида иштирок этди.

Исроил билан Ўзбекистонни узоқ тарихга бориб тақаладиган алоқалар боғлаб туради.

Фестивалда жаҳоннинг 67 мамлакатидан келган санъаткорлар беллашди. Исроилдан Илана Элия бошчилигидаги гуруҳ ўз санъатини намойиш этди.

Қадимда Буюк Ипак йўли фақат савдо эмас, балки турли халқлар ўртасида маданий алоқаларни мустаҳкамлашга ҳам хизмат қилган. Бугунги кунга келиб «Шарқ тароналари» ана шу эзгу ғояни давом эттирмоқда. Фестиваль шарқ халқларининг анъанавий мусиқасини асл ҳолича сақланишида муҳим аҳамиятга эга.

«Шарқ тароналари» фестивали доирасида Самарқанд вилоятининг турли ҳудудларида концерт дастурлари ташкиллаштирилди. Шу билан бирга, мусиқашунослар, композиторлар ва хонандалар иштирокида илмий-амалий конференция ҳам бўлиб ўтди.

Анжуман кўлами йилдан-йилга кенгайиб бормоқда. 1997 йилда ўтказилган илк фестивалда 31 мамлакатдан санъаткорлар иштирок этганди. Тўққизинчи бор ўтказилган фестивалда эса улар сони 53 нафарга етди.

Самарқанд вокзалида бизни катта тантаналар билан кутиб олишди. Ўзбек миллий куй-қўшиқлари, рақслари ижро этилди. Доира, карнай, сурнай наволари меҳмонларга хуш кайфият улашди.

Ўзбекистон Президенти Ислом ­Каримов фестивалнинг очилиш маросимида бир фикрни алоҳида таъкидлади: «Самарқанд руҳи ва фалсафаси» деган чуқур маъноли ибора халқлар ўртасида дўстлик ришталарини янада мустаҳкамлашга, маданий мулоқотни ривожлантиришга, мумтоз мусиқа анъаналарини асраб-авайлашга олиб келаётгани барчамизни қувонтиради, албатта...»

Фестивалда қатнашиш исроиллик санъаткорлар учун нафақат олис юрт­лардан келган иштирокчилар билан, балки Яқин Шарқдаги қўшниларимиз бўлган Саудия Арабистони, Покистон, Миср ва Эрондан келган мусиқачилар билан суҳбатлашиш, фикр алмашиш имконини берди. Элия қадимий, классик қўшиқларнинг моҳир ижрочиси. Унинг миллати гарчи курд бўлса ҳам, у икки миллат маданиятидан яхши хабардор. Буни унинг чиқишлари давомида кўп марта кўрганмиз.

Элия Ўзбекистонга боргунга қадар ўзбек санъатидан деярли бехабар бўлган. Унинг фестивалда қатнашиши аниқ бўлганидан кейин бир неча ўзбек миллий қўшиқларини тинг­лаб, ҳайратга тушди. Унинг айтишича, ўзбек ва яҳудий қўшиқчилик санъатида ўхшашлик бор.

«Тушундимки, бундай ўхшашликнинг боиси бизнинг қадим тарихимизга бориб тақалади» дейди Элия.

Бир гапни алоҳида таъкидлашни истардим, Самарқандда Элияни жуда яхши кутиб олишди. «Сўғдиёна» боғида уюштирилган концертда жуда кўпчилик у билан суҳбатлашди, сурат­га тушди. Улар орасида нафақат катталар, балки болалар ҳам бор эди.

Концерт тугагандан сўнг саккиз ёшли бола менга савол берди: «Айтолмайсизми, булар эртага ҳам концертга келишадими? Биз исроиллик санъаткорларни жуда ҳам яхши кўриб қолдик».

«Шарқ тароналари» турли миллатлар маданияти бирлашадиган фес­тивалдир. Фестивалнинг биринчи куниёқ исроиллик мусиқачилар Қоҳира опера театридан келган миср­лик қўшиқчилар билан узоқ вақт араб тилида қўшиқ куйлади. Бу ҳолатни кўриш жуда ёқимли эди.

Бизнинг мусиқачилар покистонлик ҳамкасблари Шарун ва Харун Лев билан жуда яқин бўлиб қолди. Фестиваль давомида беш кун улар вақтни бирга ўтказди. Бу ака-ука санъаткорлар ажойиб мусиқачи бўлиши билан бирга кўнгли очиқ инсонлар экан».

 

«Ўзбекистон овози» мухбири

Темур АЪЗАМ тайёрлади.



DB query error.
Please try later.