26.12.2015

ОЛИМПИЯЧИЛАРИМИЗ ТАҚДИРЛАНДИ

Ўзбекистон Миллий олимпия қўмитасида 2014-2015 йилларда қатор спорт турлари бўйича жаҳон чемпионатларида ғолиб ва совриндор бўлган ҳамда 2016 йилги XXXI ёзги Олимпия ўйинларига йўлланмаларни қўлга киритган бир гуруҳ спортчилар ва уларнинг мураббийларини тақдирлаш маросими бўлиб ўтди.

Ўзбекистон Миллий олимпия қўмитаси раиси М.Усмонов, маданият ва спорт ишлари вазирининг биринчи ўринбосари ­М.Алиев ва бошқалар Президентимиз ­Ислом Каримов раҳнамолигида спортни ривожлантиришга қаратилаётган юксак эътибор ёш авлоднинг ҳар томонлама соғ­лом ва баркамол инсонлар бўлиб вояга етишини таъминлаш, Ватанимизнинг халқаро майдондаги обрў-эътиборини юксалтиришда муҳим аҳамият касб этаётганини таъкидлади.

Президентимизнинг 2013 йил 25 февралдаги «Ўзбекистон спортчиларини 2016 йилда Рио-де-Жанейро шаҳрида (Бразилия) бўлиб ўтадиган XXXI ёзги Олимпия ва XV Паралимпия ўйинларига тайёрлаш тўғрисида»ги қарори ижросини таъминлаш мақсадида аниқ чора-тадбирлар дастури ишлаб чиқилиб, изчил ишлар амалга оширилмоқда.

Давлатимиз раҳбарининг қарори ижроси доирасида 2013 йил 2 апрелда Ўзбекистон Республикаси Вазирлар Маҳкамасининг «Ўзбекистон Миллий олимпия қўмитаси ҳузуридаги Ўзбекистон олимпиадачиларини қўллаб-қувватлаш жамғармаси фаолиятини ташкил этиш тўғрисида»ги қарори қабул қилинди. Жамғарма маблағлари республика спорт федерацияларининг моддий-техник базасини янада мустаҳкамлашга йўналтирилмоқда. Олимпия ва ­Паралимпия ўйинлари дастурига киритилган спорт турлари бўйича Ўзбекистон спортчи ва мураббийларига стипендия тўлаш тартиби тўғрисидаги низом тасдиқланиб, спортчи ва мураббийлар муносиб рағбатлантирилмоқда.

Пойтахтимизда Ўзбекистон Миллий олимпия қўмитасининг янги биноси фойдаланишга топширилди, Ўзбекистон спортчиларини тиббий-биологик хизмат ва спорт психологияси билан таъминлаш бўйича ихтисослаштирилган марказ ташкил этилди. Спортчиларимиз мамлакатимиз ва хорижда ташкил этилган ўқув-машғулот йиғинларида иштирок этиб, тажриба ва маҳоратини ошириб бормоқда. Мураббийларнинг билим ва малакасини ошириш мақсадида халқаро ўқув ва илмий-амалий семинарлар ташкил қилинмоқда.

Бу каби эзгу ишлар натижасида спортчиларимиз жаҳон ва қитъа миқёсидаги мусобақаларда улкан ғалабаларни қўлга киритмоқда. Жорий йил спортчиларимиз учун янада масъулиятли бўлди. Жорий йилда 26 спортчимиз Олимпиада йўлланмаларини қўлга киритди, 24 нафари Паралимпия ўйинлари йўлланмасига эга бўлди.

Рио-де-Жанейро Олимпиадасига енгил атлетикачиларимиз еттита, бокс, байдарка ва каноэда эшкак эшиш, оғир атлетика бўйича бештадан, таэквондо (WTF), сузиш, эркин ва юнон-рум кураши усталарида биттадан йўлланма бор. 2016 йилги спорт мавсумида ҳам йўлланмалар берувчи қатор чемпионатлар ва нуфузли турнирлар кутилмоқда.

Тадбирда жаҳон чемпионатларида совринли ўринларни эгаллаган спортчилар, уларнинг мураббийлари рағбатлантирилди.

Маросимда Ўзбекистон Республикаси Бош вазирининг ўринбосари ­Б.Ҳодиев сўзга чиқди.

 

Байрам АЙТМУРОДОВ,

ЎзА мухбири.



DB query error.
Please try later.