26.12.2015

ОНАЛИК ВА БОЛАЛИК МУҲОФАЗАСИ

жаҳон ҳамжамияти томонидан эътироф қилинмоқда

Олий ва ўрта махсус таълим вазирлигида «Она ва бола соғлом бўлса, оила бахтли, оила бахтли бўлса, жамият мустаҳкам бўлади» мавзусида видеоконференция ўтказилди. Мазкур анжуман Хотин-қизлар қўмитаси, Бош прокура­тура, Халқ таълими, Соғлиқни сақлаш, Ички ишлар вазирликлари, Вазирлар Маҳкамаси ҳузуридаги Дин ишлари бўйича қўмита, Ўрта махсус, касб-ҳунар таълими маркази, Республика Маънавият тарғибот, Миллий ғоя ва мафкура ­илмий-амалий марказлари ҳамкорлигида ташкил этилди.

Тадбирни Ўзбекистон Республикаси Бош вазири ўринбосари, Республика Хотин-қизлар қўмитаси раиси ­Элмира Боситхонова ­кириш сўзи билан очди. Унинг ­таъкидлашича, мамлакатимизда ­Президентимиз ташаббуси билан яратилган оналик ва болаликни муҳофаза қилиш миллий модели бугунги кунда жаҳон ҳамжамияти томонидан эътироф этилмоқда.

Дарҳақиқат, умуммиллий ҳаракатга айланган «Соғлом она — соғ­лом бола» дастури ҳаётга изчил татбиқ этиб борилаяпти. Истиқлол йилларида мамлакатимиз дунёнинг 125 давлати орасида хотин-қизлар учун қулай шароитлар яратиш ва оналикни муҳофаза қилиш борасида етакчи ўринлардан бирини эгаллаб турибди. Жаҳон рейтингида ўсиб келаётган ёш авлод саломатлиги ҳақида энг кўп ғамхўрлик кўрсатаётган давлатлар ўнталигига киради.

Яқинда Жаҳон Соғлиқни Сақлаш Ташкилоти ҳисоботида 1990 — 2015 йилларда Ўзбекистонда оналар ўлими 33,3 фоизга қисқаргани қайд этилди. Бугун мамлакатимиз хотин-қизлари тинч-омон, фаровон турмуш кечирмоқда. Буни барча оилалар ўз тақдири мисолида кўриб, билиб турибди. 2016 йилнинг ­Соғ­­­­лом она ва бола йили, деб эълон қилиниши ҳам бу борадаги саъй-ҳаракатларни янги босқичга олиб чиқади. Анжуманда бу борада амалга оширилиши лозим бўлган ишлар юзасидан фикрлашилди.

— Бугунги онлайн мулоқотда соғлом турмуш тарзи, жисмоний маданиятни юксалтириш, оилавий спорт тадбирлари кўламини кенгайтириш, хотин-қиз мураббийларни рағбатлантириш, оналар ва болалар саломатлиги борасида жойларда амалга оширилган ишлар билан танишдик, — дейди Болалар спортини ривожлантириш жамғармаси Тошкент шаҳар филиали етакчи мутахассиси Маҳбуба Қурбонова. — Шу билан бирга, истиқболдаги вазифалар хусусида ҳам келишиб олинди.

Анжуманда тиббиёт ходимлари малакасини ошириш, аҳолининг тиббий маданиятини юксалтиришда давлат ва жамоат ташкилотлари ўртасидаги ҳамкорликни янада кенгайтириш зарурлиги таъкидланди. Хотин-қизлар қўмиталари, маҳалла фаол­лари, диний маърифат ва маънавий-ахлоқий тарбия масалалари бўйича маслаҳатчиларнинг фаоллигини оширишга оид тавсиялар берилди. 

 

Озода БЕКМУРОДОВА,

«Ўзбекистон овози» мухбири.



DB query error.
Please try later.