24.12.2015

БОШЛАНҒИЧ ТАШКИЛОТ ФАОЛИЯТИ

унинг етакчиси кимлигига боғлиқ

Шу кунларда Ўзбекистон Халқ демократик партияси ташкилотлари тизимида бошланғич партия ташкилотлари фаолиятини янада кучайтириш масалалари бўйича ҳудудий семинарлар ташкил этиляпти. Яқинда ана шундай семинарнинг бирида иштирок этдим. Ўзим бошлан­ғич ташкилот етакчиси бўлганим учун унда билдирилган фикр-мулоҳазаларни диққат билан тингладим. Семинарда қуйи бўғин ишини янада кучайтириш бўйича қатор таклифлар билдирилди. Тадбирдан олган таассуротларим асосида мен ҳам бу борада ўз мулоҳазаларимни билдиришни маъқул топдим.

Ҳақиқатан ҳам, партия дастурий мақсадларининг ҳаётга татбиқ этилиши кўп жиҳатдан бошланғич ташкилот етакчисининг ­фаоллигига, сиёсий-ҳуқуқий билимдонлигига боғлиқ. Айрим кишилар борки, ўтказилаётган тадбирлар моҳияти, ғоясини тўлиқ тушунмайди. Бундай ҳолатларда бошланғич ташкилот етакчисининг ҳуқуқий жараёнларни оддий тил билан аҳолига тушунтира билиши зарур бўлади. Шунингдек, айрим ҳолларда тадбирларда партиянинг оиламга қандай нафи тегади, эртанги кунимга, болаларимнинг келажагига қандай таъсири бор, деган саволларга ҳам дуч келамиз. Бунақа вазиятда етакчи партия дастурий ғоя ва мақсадларини уларга теран тушунтириб бера олиши керак. Электорат манфаати йўлида олиб борилаётган ишлар билан таништириш бунда яхши самара беради.

Ҳудудимизда партия аъзолари сони кундан-кунга ортиб бораяпти. Ҳозир улар 40 нафарга етди. Одамларнинг ўзлари партия­миз ғоялари ортидан эргашмоқда. Чунки биз бошланғич ташкилот самарали ишлаши учун барча имкониятлардан тўлиқ фойдаланишга ҳаракат қиляпмиз. Тажриба кўрсатяптики, бошланғич ташкилотларга қанчалик аҳамиятли бўлсак, хайрихоҳларимиз ҳам шунчалик кўпаяди.

Ҳаммамиз яхши биламизки, партия ташкилотлари тизимида мунтазам равишда ўқув-семинарлар ўтказиб келинади. Лекин очиғини айтиш керак, уларда кўрилаётган масалалар, партия фаолиятига оид янгилик ва жараёнлар ҳар доим ҳам бошланғич ташкилотга етиб бормайди. Партия кенгашлари жойларда, айниқса, чекка ҳудудларда, узоқда жойлашган қуйи бўғинларда ўқувлар қай даражада ўтказилаётгани билан қизиқмайди. Семинарлар керакли ҳужжатлар билан таъминланмайди. Масала ви­лоят, туман ёки шаҳар миқёсида қолиб кетади. Юқори партия ташкилотларида бўлиб ўтадиган тадбирларда кўпинча бир-иккита бошланғич ташкилотлар етакчилари таклиф қилинади. Аммо ҳар бир ҳудудда қанчадан-қанча бошланғич ташкилотимиз бор? Уларнинг ҳар бирига кўрилган масала, қўйилган вазифалар етиб бормас экан, фаолиятимиз самарали бўлмайди, деб ўйлайман. Бу камчиликларни бартараф қилишимиз, етакчиларга вазифаларини англашига кўмак беришимиз керак. Бунинг учун бошланғич ташкилотлар билан мунтазам алоқада бўлиб туриш талаб этилади.

 

Файзулло ҲИКМАТОВ,

Булунғур тумани Мингчинор бошланғич партия ташкилоти етакчиси.



DB query error.
Please try later.