24.12.2015

МУРОЖААТЛАР ЖАВОБСИЗ ҚОЛМАСЛИГИ ЗАРУР

Давлат божхона қўмитаси «Жисмоний ва юридик шахсларнинг мурожаатлари тўғрисида»ги қонун ижроси юзасидан матбуот анжумани ўтказди.

— Божхона органларида жисмоний ва юридик шахсларнинг мурожаатларини ўз вақтида кўриб чиқишга алоҳида эътибор қаратилмоқда, — дейди Давлат божхона қўмитаси бошқарма бошлиғи Феруз Сафарбоев. — Вазирлар Маҳкамасининг «Давлат органлари ва давлат муассасаларида жисмоний ва юридик шахсларнинг мурожаатлари билан ишлаш тартиби тўғрисидаги Намунавий низомни тасдиқлаш ҳақида»ги қарорига мувофиқ, қўмита томонидан божхона органларида жисмоний ва юридик шахсларнинг мурожаатлари билан ишлаш тартиби тўғрисидаги низом тасдиқланди. Мазкур норматив ҳужжатларда назарда тутилган талабларни божхона органлари ходимларига батафсил етказиш мақсадида қўмитанинг марказий аппарати, Қорақалпоғистон Республикаси, вилоятлар, Тошкент шаҳар бошқармалари, Олий ҳарбий божхона инс­титути ва Миллий кинология марказида ўқув машғулотлари ўтказилди.

Қўмитада жисмоний ва юридик шахслардан келиб тушган мурожаатларнинг доимий таҳлили йўлга қўйилган. Жорий йилнинг 1 декабрига қадар жисмоний ва юридик шахслардан жами 1126 мурожаат келиб тушган. Уларнинг 509 таси ёки 45,2 фоизи Ягона давлат интер­актив хизматлари портали орқали йўлланган. Мурожаатларнинг 712 таси жисмоний, 414 таси юридик шахсларга тегишлидир. Бундан таш­қари, мурожаатларнинг 36,2 фоизи божхона назорати ва расмийлаштируви, 17,2 фоизи божхона тўловларидан озод қилиш, 16,4 фоизи божхона органларига иш ёки ўқишга кириш масалалари билан боғлиқ. Шунингдек, божхона ходимларининг ноқонуний хатти-ҳаракатлари юзасидан, божхона қоидабузарликларини аниқлаш вақтида олиб қўйилган товар-моддий бойликларни қайтаришга доир ва бош­қа масалалар юзасидан мурожаатлар ҳам йўлланган.

Таҳлиллар шуни кўрсатмоқдаки, республикамизда ишбилармонлик муҳитини яхшилаш, кичик бизнес ва хусусий тадбиркорликни ривожлантириш ва уларни ишончли ҳимоя қилиш борасида амалга оширилаётган ислоҳотлар самараси ўлароқ, ташқи иқтисодий фаолият иштирокчилари янада фаоллашиб, жорий қилинаётган божхона имтиёзларидан унумли фойдаланишга ҳаракат қилишмоқда. Шу сабабли мурожаатларнинг асосий қисми, яъни 53,2 фоизида товарларни божхонада расмийлаштириш ва божхона тўловларидан озод қилиш ёки имтиёзлар қўллаш масалалари кўтарилган. Мурожаатларни бевосита жойига чиқиб ўрганиш мақсадида Вазирлар Маҳкамаси томонидан тасдиқланган жадваллар асосида қўмита раҳбариятининг Қорақалпоғистон Республикаси, вилоятлар ва Тошкент шаҳри бўйлаб сайёр қабуллари ташкил қилинмоқда.

Шунингдек, тадбирда қўмитанинг (120-76-33) ишонч телефонига 32 мурожаат келиб тушган, ҳамда қўмитанинг жорий йил 1 августидан интернет тармоғида янгиланган сайтида 10 дан зиёд интерактив хизмат кўрсатилаётгани, фуқароларга тўғридан-тўғри боғланиш ва савол йўллаш имконияти яратилгани тўғрисида маълумот бериб ўтилди.

Тадбирда журналистларни қи­зиқтирган саволларга атрофлича жавоб қайтарилди.

 

Тоштемир ХУДОЙҚУЛОВ,

«Ўзбекистон овози» мухбири. 


Фикр ва мулохазалар

Защита от автоматических сообщений

Сўнгги янгиликлар: