22.12.2015

БОШЛАНҒИЧ ТАШКИЛОТЛАР

маҳаллалар билан ҳамкорликни янада ривожлантирмоқда

Ўзбекистон ХДП Сирдарё вилоят кенгаши томонидан Янгиер шаҳридаги «Обод юрт» маҳалла фуқаролар йиғинида бошланғич партия ташкилотлари фаолияти самарадорлигини ошириш масалалари бўйича семинар ўтказилди.

Семинар-тренингни Сирдарё вилоят партия кенгаши раиси Алишер Тошматов кириш сўзи билан очиб, тадбирдан кўзланган мақсад, бошлан­ғич ташкилотларнинг партия тизимида тутган ўрни, электорат манфаатларини ҳимоя қилишдаги аҳамияти ҳақида фикр билдирди.

Шуни айтиш керакки, ке­йинги пайтларда вилоятда партиямиз аъзолари сони сезиларли даражада ортиб бормоқда. Айни пайтда вилоят кенгаши атрофига 15 минг нафардан ортиқ аъзо бирлашган. Жорий йилнинг ўтган 10 ойи давомида партия сафига 1375 нафар янги аъзо қабул қилинди.

— Бугун шаҳримизда пар­тиямизнинг 20 бошланғич ташкилоти фаолият юритмоқда, — дейди Ўзбекистон ХДП Янгиер шаҳар кенгаши раиси Исматулла Исоқов. — Уларга 1165 нафар партия аъзоси бирлашган. Сўнгги пайтларда маҳаллалар билан алоқаларни кенгайтириш, депутатларнинг қуйи бўғин билан ҳамкорлигини янада кучайтириш, электорат вакилларининг хоҳиш-истаклари, муаммоларини ўрганиш ҳамда депутатлар ва ҳамкор ташкилотлар кўмагида уларни ҳал этиш масалаларига жиддий эътибор қаратаяпмиз. Шуни алоҳида қайд этиш лозимки, партиямиз оилаларга ҳам ­чуқур кириб боришга ҳаракат қилаяпти. Мисол учун шаҳримизда яшовчи Сайид­аҳме­довлар оиласи аъзоларининг 22 нафари партиямиз сафига қўшилди. Буларнинг барчаси партиямиз ғояларини аҳоли ўртасида кенг тарғиб қилишнинг самарасидир.

— Бошланғич ташки­лотимизда 55 нафар партиямиз аъзоси бор, — дейди «Обод юрт» маҳалласидаги ­ҳудудий бошланғич ташкилот етакчиси Насриддин ­Нажмиддинов. — Улар билан ҳар шанба куни йиғилишиб, сиёсий, ижтимоий-иқтисодий мавзуларда машғулотлар ўтказиб турамиз. Маҳаллий Кенгашлардаги депутатларимиз билан алоқа ўрнатганмиз. Электорат мурожаатлари бўйича депутатлар билан фикрлашамиз.

Семинарда партия Марказий Кенгаши Бошланғич ташкилотлари билан ишлаш сектори ходими Рустам Раҳимов ЎзХДП Боёвут туман кенгаши раиси Раббимқул Ибрагимов, ЎзХДП Гулистон туман кенгаши раиси ўринбосари Ёқубжон Мадаминов, ЎзХДП Ховос туман кенгаши раиси, Марказий Кенгаш аъзоси Назира Маҳкамова, Фуқаролик жамияти шаклланишини мониторинг қилиш мустақил институти вилоят бўлими эксперти Мурод Ҳаитов, ЎзХДП вилоят кенгаши раиси ўринбосари Ҳаётхон Ортиқ­боева ва бошқалар сўзга чиқиб, маҳаллий партия кенгашлари билан қуйи бўғинларнинг узвий алоқасини йўлга қўйиш бош­лан­ғич партия ташкилотлар фаолиятини, айниқса, қишлоқ жойларда қўллаб-қувватлаш, рағбатлантириш кераклигини таъкидлашди.

 

Жанглиш ҲАСАНОВА



DB query error.
Please try later.