19.12.2015

«ЯГОНА ДАРЧА»

тадбиркорларга катта қулайликлар яратади

Ўзбекистон Савдо-саноат палатаси томонидан Адлия ва Иқтисодиёт вазирликлари, БМТ Тараққиёт дастурининг «Ўзбекистон бизнес форуми» лойиҳаси билан ҳамкорликда тадбиркорлик субъектларига давлат хизматларини кўрсатувчи «ягона дарча» марказлари фаолиятини ташкил этиш масалаларига бағишланган матбуот анжумани ўтказилди.

— Президентимизнинг «Тадбиркорлик субъектларига «ягона дарча» тамойили бўйича давлат хизматлари кўрсатиш тартибини янада такомиллаштириш чора-тадбирлари тўғрисида»ги қарорига мувофиқ, 2016 йилнинг 1 январидан бошлаб туман (шаҳар) ҳокимликлари ҳузуридаги тадбиркорлик субъектларини рўйхатга олиш инспекциялари негизида «ягона дарча» тамойили асосида тадбиркорлик субъектларига давлат хизматлари кўрсатиш бўйича марказлар иш бошлайди, — дейди Савдо-саноат палатаси раиси ўринбосари Анвар ­Икрамов. — Мазкур марказлар орқали тадбиркорлик субъектларини муҳандислик-коммуникация тизимига улаш, бино ва иншоотнинг ташқи кўринишини ўзгартиришни келишиш, объект­ни қайта ихтисослаштириш ва реконструкция қилиш, қурилиш-монтаж ишлари, турар-жойларни нотурар жой тоифасига ўтказишга рухсат бериш каби 16 давлат хизмати кўрсатилади. Тадбиркорларни ўйлантираётган саволларга ушбу марказларнинг ўзидан жавоб олиш мумкин бўлади.

— «Ягона дарча» марказларига тадбиркорлик субъектларини рўйхатдан ўтказиш, рухсат бериш ва лицензиялашда шаффофликни таъминлаш, давлат хизматлари кўрсатилишида бюрократик тўсиқларга йўл қўймасдан давлат органлари ва бошқа ташкилотлар билан яқин ҳамкорлик ўрнатиш, аризачиларга давлат хизматларини кўр­сатиш тартиби ва муддатлари тўғрисида бепул тушунтиришлар бериш каби вазифалар юклатилади, — дейди Савдо-саноат палатаси ходими Ғолиб Алимов. — Тадбиркор тегишли давлат хизматидан фойдаланиш учун марказга шахсан ташриф буюриши ёки «ягона дарча»нинг қўнғироқларга жавоб бериш хизмати, яъни «Call-centre»га мурожаат қилиши ёхуд Интерактив давлат хизматлари ягона портали орқали хизмат туридан фойдаланиши мумкин.

Бир сўз билан айтганда, марказлар фаолияти кичик бизнес ва хусусий тадбиркорлик вакилларининг давлат хизматларидан фойдаланишини янада соддалаштириш, шу билан бирга, давлат ташкилотларининг очиқлигини таъминлашда муҳим омил бўлиб хизмат қилиши кутилмоқда.

Тадбирда журналистларни қизиқтирган саволларга атрофлича жавоб қайтарилди.

 

Тоштемир ХУДОЙҚУЛОВ,

«Ўзбекистон овози» мухбири.


Фикр ва мулохазалар

Защита от автоматических сообщений

Сўнгги янгиликлар: