Охирги сонда



Кўп ўқилган мақолалар



Долзарб мавзу



Мақолалар архиви

«    Aprel 2019   
Du Se Cho Pa Ju Sha Ya
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 1 2 3 4 5
05.12.2015

КОЛУМБИЯГА ЙЎЛ ТОШКЕНТДАН БОШЛАНАДИ

Пойтахтимизда футзал бўйича XIV Осиё чемпионати финал босқичи учрашувларига қуръа ташланди

Юртимизда спортни, жумладан, футбол ва футзални ривожлантиришга қаратилаётган юксак эътибор ўз самараларини бераётир. Мазкур спорт турлари бўйича терма жамоаларимизнинг халқаро майдонларда эришаётган юқори натижалари, мамлакатимизда йирик нуфузли мусобақалар мунтазам ўтказиб келинаётгани бунинг тасдиғидир.

 

2016 йилнинг 10-21 февраль кунлари Тошкент шаҳри футзал бўйича навбатдаги Осиё чемпионати финал босқичи баҳсларига мезбонлик қилади. Бунгача мазкур нуфузли мусобақа пойтахтимизда икки (2006 ва 2010 йиллар) бор юксак савияда уюштирилган эди.

Ўзбекистон футзалчилари қитъа чемпионатида мунтазам иштирок этиб келаётганлиги эътиборлидир. Ҳамюртларимиз ушбу нуфузли мусобақанинг уч карра (2001, 2006, 2010 йиллар) кумуш медали совриндори саналишади.

Аҳамиятли жиҳати, XIV Осиё чемпионатида қитъамизнинг энг кучли ўн олти терма жамоаси келаси йили футзал бўйича Колумбияда бўладиган жаҳон чемпионати йўлланмалари учун кураш олиб боради. Унда барча ярим финалчилар ҳамда энг яхши кўрсаткичга эга чорак финал босқичи иштирокчиси жаҳон чемпионатида қатнашиш ҳуқуқини қўлга киритади.

Куни кеча пойтахтимиздаги «Зарафшон» концерт залида ана шу нуфузли мусобақага тантанали қуръа ташлаш маросими бўлиб ўтди. Унда Ўзбекистон футбол федера­ция­си ва Миллий Олимпия қўмитаси президенти Мираброр Усмонов учинчи марта мини-футбол бўйича Осиё чемпионатини ўтказиш мамлакатимизга ишониб топширилгани учун Осиё футбол конфедерациясига миннатдорлик билдирди ва нуфузли мусобақани юқори савияда ташкил этиш учун барча чора-тадбирлар амалга оширилишини таъкидлади.

Қуръа ташлаш маросимида Осиёнинг икки карра «Энг яхши футболчиси» номинацияси ғолиби, Ўзбе­кистон миллий терма жамоаси ярим ҳимоячиси Сервер Жепаров ҳам қатнашди.

Катта ҳаяжон остида ўтган қуръа натижасига кўра, Ўзбекистон терма жамоаси «A» гуруҳида Ливан, Қирғизистон ва Саудия Арабистони терма жамоалари билан куч синашадиган бўлди.

Мусобақанинг қолган гуруҳлари қуйидагича кўриниш олди:

«В» гуруҳи. Эрон, Ироқ, Хитой, Иордания

«C» гуруҳи. Таиланд, Вьетнам, Хитой Тайпейи, ­Тожикистон.

«D» гуруҳи. Япония, ­Австралия, Малайзия, Қатар.

Тақвимга кўра, XIV Осиё чемпионати финал босқичи баҳслари 2016 йилнинг 10 февраль куни  Ўзбекистон — Саудия Арабистони терма жамоалари учрашуви билан бошланади. 

Футзалчиларимиз гуруҳдаги иккинчи учрашувни 12 февралда Қирғизистон терма жамоасига қарши ўтказса, сўнгра 14 февралда ливанликларга қарши майдонга тушадилар.

— Осиё чемпионатида кучсиз жамоанинг ўзи бўлмайди, — дейди Ўзбе­кис­тон футзал ассо­циа­ция­си масъул вакили ­Жаҳонгир Раҳматуллаев. — Гуруҳда барча жамоаларнинг имконияти деярли бир хил. Олдимизга Колумбияда бўладиган навбатдаги жаҳон чемпионатига йўл­ланмани қўлга киритиш вазифаси қўйилган. Терма жамоамиз аъзолари баҳсларга жиддий ҳозирлик кўрмоқда. Ҳозир қуръа ташлаш маросими ўтказилаётган паллада футзалчиларимиз Белорусь пойтахти Минскда навбатдаги ўқув-машғулот йиғинида иштирок этишяпти. Шунингдек, ассоциациямиз январь ойида Қозоғис­тон футзалчилари билан назорат ўйини ўтказиш борасида музокаралар олиб бормоқда. Бу каби ўртоқлик учрашувлари ор­қали кучли таркибни шакллантириб олишга интиламиз. Ишонамизки, Ўзбекистон футзал терма жамоаси чиройли ўйинлар намойиш этиб, жаҳон чемпионатига йўлланмани қўлга киритиш учун бор куч ва имкониятини ишга солади.

Эркин ХОЛБОБО,

«Ўзбекистон овози» мухбири.



DB query error.
Please try later.