03.12.2015

ҚУЙИ БЎҒИН ФАОЛЛИГИ

партиямизнинг нуфузи, таъсир кучи ошишига хизмат қилади

ЎзХДП Жиззах вилоят кенгаши томонидан ташкил этилган «Бошланғич партия ташкилотлари иш фаолияти самарадорлигини ошириш: амалий ишлар, муаммо ва ечимлар» мавзуидаги семинар-тренинг бошланиши арафасида Жиззах шаҳридаги Сангзор маҳалласи қошидаги бошланғич партия ташкилоти етакчиси Феруза Азизова билан суҳбатлашиб қолдик.

— Бошланғич партия ташкилотларининг фаолиятини яхшилаш, таъсирчанлигини ошириш жуда муҳим, — деди семинар қатнашчиси. — Нимага десангиз, бугун ҳар қайси партия одамлар, электорат билан алоқаларини ҳар қачонгидан кўпроқ мустаҳкамлаши зарур. Бошланғич партия ташкилоти эса партиянинг аҳолига энг яқин қатлами сифатида бу ишда асосий вазифани бажаради. Шундай экан, жойларда бошланғич ташкилотларни партиянинг ишончли таянчи, бош бўғинига айлантиришдан туман ва шаҳар кенгашларидан тортиб Марказий Кенгашгача манфаатдор эканини унутмаслик лозим, деб ҳисоблайман.

Семинар-тренингда вилоятдаги шаҳар ва туман кенгашлари раислари, маҳаллий Кенгашлардаги партия гуруҳлари раҳбарлари, йирик бошланғич ташкилотлар етакчилари иштирок этди. Улар дастлаб Жиззах шаҳридаги «Қипчоқ» маҳалласи қошидаги бошланғич партия ташкилоти фаолияти билан яқиндан танишишди.

— Маҳалламизда 25 нафар партиямиз аъзоси бор, — дейди Тўлқин Тўрақулов. — Яқинда яна 3 нафар ёш йигит-қизни сафимизга қабул қилдик. Партиядошларимиз ҳудудда бўлаётган барча хайрли ишларда фаол иштирок этяпти. Хусусан, яқинда 3,5 гектар фойдаланилмаётган ерда янги боғ барпо этилишида партия аъзолари бош-қош бўлишди. Аҳолининг эҳтиёжманд қатламларини ижтимоий ҳимоялашга алоҳида эътибор қаратяпмиз. Республика миқ­ёсида ўтган «Намунали маҳалла» кўрик-танловида фахрли иккинчи ўринга муносиб топилишимизда ҳам, шубҳасиз, бошланғич ташкилотимизнинг ўрни бор.

Фуқаролик жамияти шаклланишини мониторинг қилиш мустақил инс­титути Жиззах вилоят ҳудудий бўлинмаси катта мутахассиси Элдор Жабборов, ЎзХДП Жиззах шаҳар кенгаши раиси Носир Сиддиқов, шаҳар Кенгаши депутати Ҳамроқул Маматқулов, «Жиззахпластмасса» акциядорлик жамияти қошидаги бошлан­ғич партия ташкилоти етакчиси Фотима Холмирзаева ва бошқалар бошланғич партия ташкилотлари фаоллигини янада ошириш, электорат манфаатларини ҳимоя қилишда халқ депутатлари маҳаллий Кенгашларидаги партия гуруҳлари билан ўзаро ҳамкорлигини кучайтириш, партияга янги аъзолар қабул қилиш, тадбирларни таъсирчан ўтказиш масалалари бўйича ўз фикр-мулоҳазаларини билдиришди.

— Барча бошланғич ташкилотларимизни ҳам фаол ва ташаббускор, деб айта олмаймиз, — деди семинарга якун ясар экан, ЎзХДП вилоят кенгаши раиси Мўътабар Каримова. — Шунинг учун ҳар бир туман, шаҳарда ана шундай тадбирлар, ўқувларни мунтазам ўтказиб боришга қарор қилдик. Ўйлайманки, бу партия­миз дастурий мақсадларига ҳамоҳанг равишда амалий ишларимизни кучайтиришга, бошланғич ташкилотларнинг фаол ишлаши, партиямизнинг жамиятдаги нуфузи ошиши, электорат билан алоқаларимизнинг янада мустаҳкамланишига хизмат қилади.

 

Иброҳим ЖОНУЗОҚОВ,

«Ўзбекистон овози» мухбири.



DB query error.
Please try later.